Pepsi-deild karla - Góð aðsókn á fyrri hluta mótsins
1.200 áhorfendur hafa mætt að meðaltali á leikina til þessa
Nú er keppni í Pepsi-deild karla liðlega hálfnuð, því 11. umferð var leikin í gær að undanskildum leik Fylkis og KR sem var frestað vegna þátttöku liðanna í Evrópudeild UEFA. Aðsóknin á leikina hefur verið með besta móti en á leikina 65 hafa 77.794 áhorfendur mætt á leikina til þess sem gerir 1.200 áhorfendur að meðaltali á hvern leik.
Nú er Heimsmeistarakeppnin í Suður Afríku að renna sitt skeið á enda og eins og búast mátti við, datt aðsóknin niður meðan á keppninni stóð. Meðaltalsaðsóknin hingað til er engu að síður mjög góð en á síðasta tímabili mættu 1.029 að meðaltali á leiki Pepsi-deildarinnar og 1.106 árið 2008. Besta meðalaðsóknin var hinsvegar 2007 þegar 1.329 mættu að meðaltali á leikina.
Flestir hafa mætt á KR völlinn til þessa eða 1.831 að meðaltali á leik en næstflestir mæta á Kaplakrikavöll en þar eru 1.581 áhorfendur að meðaltali á leik í Pepsi-deildinni. Flestir mættu á leik FH og KR í 7. umferðinni eða 2.373 og litlu færri voru á leik KR og Keflavíkur í 4. umferðinni, 2.363 talsins. Fæstir áhorfendur voru hinsvegar á leik Keflavíkur og Fram í 8. umferðinni eða 366.
Pepsi-deildin í ár er einstaklega jöfn og spennandi og engin ástæða til að áætla annað en að landsmenn haldi áfram að flykkjast á völlinn.
