Félagaskiptaglugginn opnar fimmtudaginn 15. júlí
Félög hvött til þess að vera tímanlega ef á að fá félagaskipti erlendis frá
Fimmtudaginn 15. júlí opnar félagaskiptaglugginn að nýju fyrir leikmenn meistaraflokka og samningsbundna leikmenn yngri flokka. Glugginn er opinn til 31. júlí og eftir þann tíma eru engin félagaskipti leyfð hérlendis, hvort sem þau eiga við leikmenn meistaraflokka eða leikmenn yngri flokka.
Félagaskipti erlendis frá
Forráðamönnum félaga er sérstaklega bent á að vera vel tímanlega í því ef að reyna á að fá félagaskipti erlendis frá. Búast má við að þau félagaskipti taki töluverðan tíma að ganga í gegn og því fyrr sem er farið af stað með þau, því líklegra er að þau gangi í gegn fyrir lokun félagaskiptagluggans 31. júlí.
Tímabundin félagaskipti
Þá er minnt á reglur um tímabundin félagaskipti sem þýðir að ef leikmaður er lánaður í þessum glugga, fær hann ekki keppnisleyfi að nýju með móðurfélagi fyrr en 16. október.
