Úrslitaleikir VISA-bikarsins um helgina
Leikið á laugardag og sunnudag
Úrslitaleikir VISA-bikarsins fara fram á Laugardalsvelli um helgina. Úrslitaleikur karla verður á laugardag kl. 18:00 og úrslitaleikur kvenna á sunnudag kl. 16:00. Mikil spenna er fyrir báða leikina og von á góðri aðsókn.
Í karlaleiknum mætast FH og KR. Miðasala hefur gengið vel og hefur selst jafnt og þétt af miðum alveg síðan opnað var fyrir söluna á www.midi.is. Menn hafa jafnvel talað um að aðsóknarmet verði sett og því er um að gera að skella sér á völlinn til að taka þátt í því að setja metið.
Stjarnan og Valur mætast í kvennaleiknum og þar verður vafalítið um hörkuleik að ræða, enda mættust þessi lið nýlega í Pepsi-deildinni og gerðu þar 2-2 jafntefli. Sameiginleg upphitun verður við Laugardalsvöll fyrir leikinn og eru nánari upplýsingar að finna hjá félögunum tveimur.
