Úrslitakeppni 1. deildar kvenna og 3. deildar karla hefst á laugardag
Spennandi viðureignir framundan
Um helgina varð ljóst hvaða félög mætast í úrslitakeppni 1. deildar kvenna og 3. deildar karla. Úrslitakeppnirnar hefjast næstkomandi laugardag og er, að venju, boðið upp á hörkuviðureignir.
Í 1. deild kvenna eru fjögur félög í úrslitakeppninni. Selfoss og Þróttur mætast annars vegar og hinsvegar leika Keflavík og ÍBV. Fyrri leikirnir fara fram á laugardaginn og síðari leikirnir á miðvikudaginn 1. september. Sigurvegarar viðureignanna tryggja sér sæti í Pepsi-deild kvenna að ári.
Í 3. deild karla eru viðureignirnar eftirfarandi:
- KB - Berserkir
- Magni - Tindastóll
- KFS - Árborg
- Álftanes - Dalvík/Reynir
Líkt og hjá konunum eru fyrri leikirnir leiknir næstkomandi laugardag en þeir síðari þriðjudaginn 31. ágúst. Sigurvegarar viðureignanna leika svo í undanúrslitum og má sjá hér að neðan hverning viðureignirnar raðast niður.
