Framlög frá UEFA og KSÍ til barna- og unglingastarfs aðildarfélaga KSÍ

Framlag til barna- og unglingastarfs fyrir árið 2010 áætlað um 90 milljónir króna

7.10.2010

UEFA hefur ákveðið, líkt og áður, að hluti af þeim tekjum sem sambandið hafði af Meistaradeild UEFA (Champions League) 2009/2010 skuli renna til félaga í öllum aðildarlöndum UEFA til eflingar knattspyrnu barna- og unglinga.  Uppgjör vegna Meistaradeildarinnar sem lauk vorið 2010 hefur nú farið fram og fá íslensk félög um 40 milljónir króna í sinn hlut til barna- og unglingastarfs. 

Samkvæmt ákvörðun UEFA skulu öll framlög vegna Meistaradeildar UEFA til barna – og unglingastarfs renna til félaga í efstu deild og er það breyting frá því sem áður var þegar framlögin skiptust á milli félaga í efstu og næstefstu deild.  Framlag UEFA sem að þessu sinni er um 40 milljónir króna skiptist því á milli félaga í Pepsi-deild.

Stjórn KSÍ hefur samþykkt að leggja til um 50 milljónir króna til viðbótar sem skiptist á milli aðildarfélaga í öðrum deildum en skipting á framlagi til barna – og unglingastarfs verður þá með þeim hætti að félög úr Pepsi-deild fá kr. 3.400.000 sem er framlag UEFA,  félög úr 1. deild fá kr. 1.600.000 , félög í 2. deild karla fá kr. 1.100.000 hvert, önnur félög í deildarkeppni kr. 800.000 og félög utan deildarkeppni kr. 250.000.  Úthlutun er háð því að félög haldi úti starfsemi í yngri flokkum.

Greiðslan til félaganna skal renna óskipt til eflingar knattspyrnu barna og unglinga frá yngstu iðkendum til og með 2. aldursflokks karla og kvenna.  Samtals er því framlag til barna- og unglingastarfs fyrir árið 2010 áætlað um 90 milljónir króna en var um 70 milljónir króna árið 2009 og munar þar mestu um aukið framlag KSÍ.

UEFA setur eftirfarandi skilyrði fyrir greiðslu sinni til félaga í Pepsi-deild karla:

1)      Greiðslan fer í gegnum viðkomandi knattspyrnusamband.

2)     Aðeins félög sem leika í efstu deild og uppfyllir lágmarks kröfur leyfiskerfis viðkomandi knattspyrnusambands varðandi barna- og unglingastarf geta fengið greiðslu.

3)      Fjárhæðin skiptist á milli félaganna samkvæmt ákvörðun stjórnar viðkomandi sambands.

4)     Félög sem tóku þátt í Meistaradeild UEFA 2009/2010 skulu ekki fá hlutdeild í þessari greiðslu.

Í samræmi við ofangreind skilyrði ákvað stjórn KSÍ að framlag UEFA rynni til þeirra félaga sem leika í Pepsi-deild karla árið 2010 en í þeirri deild hefur KSÍ innleitt leyfiskerfi (m.a. kröfur um samþykkta áætlun um uppeldisstarf).

Samþykkt stjórnar KSÍ um úthlutun fjármagns UEFA og KSÍ til barna- og unglingastarfs 2010:

1)     Framlag UEFA til aðildarfélaga til eflingar knattspyrnu barna- og unglinga rennur til þeirra félaga sem leika í Pepsi-deild karla árið 2010.  Félög úr Pepsi-deild fá kr. 3.400.000 hvert.  Úthlutun er háð því að félög haldi úti starfsemi í yngri flokkum og hafi samþykkta áætlun um uppeldisstarf skv. leyfisreglugerð KSÍ.  Framlag UEFA getur einungis runnið til félaga í Pepsi-deild karla skv. ákvörðun UEFA.

2)     Framlag KSÍ til eflingar knattspyrnu barna og unglinga að upphæð um 50 milljónum króna rennur til félaga í 1. deild karla, 2. deild karla, 3. deild karla og aðildarfélaga KSÍ utan deilda 2010. Hvert félag í 1. deild karla fær kr. 1.600.000, félag í 2. deild karla fær kr. 1.100.000 önnur félög í deildarkeppni kr. 800.000 og félög utan deildarkeppni kr. 250.000.  Úthlutun er háð því að félög haldi úti starfsemi í yngri flokkum.

3)     Greiðslan til félaganna skal renna óskipt til eflingar knattspyrnu barna og unglinga frá yngstu iðkendum til og með 2. aldursflokks karla og kvenna.

4)     Dæmi um kostnaðarliði í þessu starfi eru laun þjálfara, ferðakostnaður vegna þátttöku í keppni, aðstöðuleiga, kaup á tækjum og áhöldum.

Rétt er að fram komi að þegar um samstarfsfélög er að ræða hljóta þau félög er að því samstarfi standa styrk ef þau sinna barna- og unglingastarfi.

Eftirfarandi tafla sýnir greiðslur í milljónum króna frá UEFA vegna Meistaradeildarinnar 2009/2010 og frá KSÍ til barna- og unglingastarfs aðildarfélaga KSÍ.  Styrkurinn kemur til greiðslu 1. nóvember 2010.

KSÍ getur óskað eftir upplýsingum um starfsemi og ráðstöfun fjármuna fyrri ára áður en til greiðslu styrkjar kemur.