Ísland er í fjórða sæti á Háttvísilista UEFA
Þriðja sætið gefur aukasæti í Evrópudeild UEFA
Ísland er sem stendur í fjórða sæti á Háttvísilista UEFA (Respect Fair Play) en á þeim lista er tekið tillit til leikja á vegum UEFA frá 1. maí 2011 til 30. apríl 2012. Þær þjóðir sem verða í efstu þremur sætunum á þessum lista, fá í sinn hlut aukasæti í Evrópudeild UEFA 2012/13.
Þegar gefin er einkunn fyrir leiki þá er litið m.a. til fjölda spjalda, virðingu við mótherja og dómara og framkomu forráðamanna og áhorfenda. Það eru eftirlitsmenn á vegum UEFA sem gefa einkunnir fyrir hvern leik.
Mjótt er á munum á milli Hollands sem er í þriðja sæti listans sem stendur með 8,173 stig og Íslands í fjórða sætinu með 8,171 stig. Alls mun Ísland leika níu leiki fyrir 1. maí sem munu verða með í útreikningi á þessum lista. Er þar um að ræða leiki Íslands í milliriðlum EM hjá U17 og U19 kvenna ásamt U17 karla.
Ef að Ísland lendir í þriðja sæti listans, eða ofar, þá mun Valur fá sæti í forkeppni Evrópudeildar UEFA. Valur og ÍBV urðu efst og jöfn á háttvísimati eftir Íslandsmótið 2011 en þar sem ÍBV hefur þegar tryggt sér þátttökurétt í Evrópudeildinni, þá mundi Valur hreppa þetta aukasæti.
