Trúnaðarmenn landshluta - Eysteinn og Pétur ráðnir
Nýtt verkefni á vegum KSÍ
Ákveðið hefur verið að koma á fót verkefni á vegum KSÍ sem miðar að því að auka samskipti og samráð við þjálfara aðildarfélaga, færa þjónustu nær aðildarfélögum, meta efnilega leikmenn og fylgja eftir efnilegum leikmönnum í samráði við félögin. Til þessa starfs verða ráðnir í hlutastörf trúnaðarmenn landshluta og þegar hefur fyrsta skrefið verið stigið í þeim efnum þar sem Pétur Ólafsson hefur verið ráðinn fyrir Norðurland og Eysteinn Húni Hauksson fyrir Austurland. Jafnframt því mun Eyjólfur Sverrisson hafa yfirumsjón með verkefninu.
Helstu hlutverk trúnaðarmanna landshluta eru:
- Mæta á æfingar hjá yngri flokkum aðildarfélaga á viðkomandi svæði, sinna æfingum með þjálfara viðkomandi flokka ef þess er óskað og meta efnilega leikmenn.
- Gefa skýrslu til umsjónarmanns verkefnis og landsliðsþjálfara viðkomandi landsliðs um efnilega leikmenn í samráði við aðildarfélögin.
- Fylgja efnilegum leikmönnum eftir ásamt þjálfara leikmannsins og skipuleggja hæfileikamótun ásamt umsjónarmanni og landsliðsþjálfara.
- Kynna knatttæknidisk KSÍ og skipuleggja knattþrautir 5 flokks hjá aðildarfélögum yfir sumartímann.
- Meta framgang þeirra leikmanna sem valdir eru í sérstaka hæfileikamótun.
- Halda utan um upplýsingar um fjölda iðkenda í hverjum flokki á viðkomandi stað og vera í sambandi við þjálfara aðildarfélaga.
- Standa fyrir a.m.k. tveimur úrtaksæfingum fyrir leikmenn frá 14 – 18 ára á sínu svæði á ári í samráði við þjálfara félaganna, umsjónarmanni verkefnisins og landsliðsþjálfurum.
- Sitja samráðsfundi yngri landsliða (landsliðsþjálfarar, umsjónarmaður verkefnis) og nefndarfundi unglinganefnda.
- Fylgjast með leikjum í yngri flokkum á viðkomandi svæði, taka út dómara í leikjum og halda úti frekari fræðslu fyrir dómara auk dómaranámskeiða í samráði við dómarastjóra.
- Upplýsingasöfnun um leikmenn skv.forskrift umsjónarmanns verkefnisins, Eyjólfs Sverrissonar.
- Skipuleggja heimsóknir landsliðsþjálfara og annarra til fræðslustarfsemi á viðkomandi landsvæði.
Verkefnið er að fara af stað og er styrkt fjárhagslega af FIFA en líklegt er að það muni taka breytingum þegar reynsla er komin á fyrstu skrefin. Kynning á verkefninu verður haldin fyrir aðildarfélög en þeir aðilar sem þegar hafa hafið störf munu vera í sambandi við aðildarfélögin og gera grein fyrir sínum störfum.
