Þingfulltrúar
Fulltrúafjöldi hvers aðildarfélags er sá sami og á síðasta knattspyrnuþingi sem haldið var í febrúar 2021. Í samræmi við grein 9.4. Í lögum KSÍ munu kjörbréf vera send til aðildarfélaga eigi síðar en tveimur vikum fyrir þing.
9.1. Knattspyrnuþingið sitja fulltrúar frá aðildarfélögum KSÍ.
9.2. Fulltrúafjöldi aðildarfélaga ákvarðast af þátttöku þeirra í Íslandsmóti meistaraflokks sem hér segir:
a. Fyrir félag, sem hefur rétt til þátttöku í efstu deild karla og/eða kvenna á komandi leiktíð, komi 4 fulltrúar.
b. fyrir félag, sem hefur rétt til þátttöku í 1. deild karla og/eða kvenna á komandi leiktíð, komi 3 fulltrúar.
c. fyrir félag, sem hefur rétt til þátttöku í 2. deild karla á komandi leiktíð, komi 2 fulltrúar.
d. fyrir félag, sem hefur rétt til þátttöku í neðri deildum karla og/eða kvenna á komandi leiktíð en um getur í liðum a.-c., komi 1 fulltrúi, enda hafi það tekið þátt í Íslandsmóti meistaraflokks síðustu fimm leiktíðir samfleytt.
e. fyrir sameiginlegt lið félaga komi fulltrúar sbr. a.-d., sem skiptast milli félaga sem standa að liðinu, skv. samkomulagi þeirra á milli ella fellur þátttökuréttur til fulltrúa niður.
9.3. Fulltrúafjöldi aðildarfélags skal einungis ákvarðast af einum þeirra liða a. til e. sem gefur flesta fulltrúa. Félag sem ekki tefldi fram í móti á vegum KSÍ á síðasta keppnistímabili að minnsta kosti einu liði í yngri flokkum (3. – 6. flokk), getur að hámarki verið með einn fulltrúa.
9.4. Framkvæmdastjóri KSÍ skal senda kjörbréf til aðildarfélaga eigi síðar en tveimur vikum fyrir þing. Aðeins sá, sem skráður er á kjörbréf, sem staðfest hefur verið af formanni aðildarfélags eða meirihluta stjórnar þess, er kjörgengur fulltrúi þess á knattspyrnuþingi og fer með atkvæðisrétt.
9.5. Hver þingfulltrúi fer aðeins með eitt atkvæði. Ekki er heimilt að greiða atkvæði samkvæmt umboði eða bréfleiðis. Kjörnir fulltrúar í stjórn KSÍ og varafulltrúar þeirra geta ekki farið með atkvæðisrétt á ársþingi.
9.6. Félög sem eru í skuld við KSÍ miðað við síðustu áramót, missa rétt til þingsetu. KSÍ skal tilkynna þeim félögum eigi síðar en þremur vikum fyrir þing að félagið fái ekki kjörbréf nema eldri skuldir séu gerðar upp. Kjörbréfanefnd skal ganga úr skugga um, að þessu ákvæði sé framfylgt.
9.7. Á knattspyrnuþingi eiga auk kjörinna fulltrúa rétt til þingsetu og hafa þar málfrelsi og tillögurétt:
a. Stjórnarmenn KSÍ.
b. Framkvæmdastjóri KSÍ.
c. Einn fulltrúi stjórnar hvers héraðssambands þar sem knattspyrna er iðkuð.
9.8. Jafnframt hafa rétt til þingsetu og hafa þar málfrelsi:
a. Heiðursformenn KSÍ.
b. Kjörnir fulltrúar landsfjórðunga.
c. Nefndarmenn fastanefnda KSÍ.
d. Dómarar í dómstólum KSÍ.
e. Endurskoðandi reikninga KSÍ og skoðunarmenn.
f. Forseti og framkvæmdastjóri ÍSÍ.
g. Fulltrúi menntamálaráðuneytis.
h. Tveir fulltrúar samtaka knattspyrnudómara.
i. Tveir fulltrúar Knattspyrnuþjálfarafélags Íslands.
9.9. Auk þess getur stjórn KSÍ boðið öðrum aðilum þingsetu og veitt þeim heimild til að ávarpa þingið.