• fös. 27. jan. 2006
• Ársþing

Fjölmargar tillögur á ársþingi KSÍ 2006

Fjölmargar tillögur eru til afgreiðslu á knattspyrnuþinginu 2006 - ársþingi KSÍ, sem haldið verður á Hótel Loftleiðum 11. febrúar næstkomandi.  Fjölgun liða, varalið, fleiri varamenn og Futsal eru meðal viðfangsefna.

Knattspyrnuþing 2006

60. ársþing KSÍ verður haldið á Hótel Loftleiðum 11. febrúar nk. Sambandsaðilar eru beðnir um að kynna sér eftirfarandi upplýsingar og gögn:

1.         Tillögur

Hér að neðan má skoða allar tillögur sem KSÍ hefur borist og teknar verða til afgreiðslu á ársþinginu.  Tillögurnar eru sendar bæði til héraðssambanda og íþróttabandalaga sem og til allra félaga sem hafa verið þátttakendur í knattspyrnumótum á vegum KSÍ sl. ár.  Þess er vænst að tillögunum sé komið sem fyrst til væntanlegra þingfulltrúa, þannig að þeir hafi tök á að kynna sér þær vel áður en á ársþing er komið.

Tillögur

2.         Kjörbréf

Kjörbréf hafa verið send til héraðssambanda og íþróttabandalaga og er þess óskað að þau verði fyllt út með nöfnum fulltrúa og varafulltrúa og afrit faxað til KSÍ í síðasta lagi 3. febrúar nk.  Óskað er eftir að allir aðilar tryggi að svo verði gert. Upplýsingar um fjölda fulltrúa má sjá hér að neðan.

Fjöldi þingfulltrúa

3.         Dagskrá

Þingið verður sett kl. 11:00 laugardaginn 11. febrúar og gert er ráð fyrir að því ljúki um kl. 16:00 sama dag. Öllum þingfulltrúum er boðið til sameiginlegs kvöldverðar og skemmtunar í Sunnusal á Hótel Sögu sem hefst kl. 19:30. Á undan verður boðið upp á fordrykk frá kl. 18:00. (Þingfulltrúum er boðið til kvöldverðar, en félög geta keypt miða fyrir fleiri gesti – hafið samband við Ragnheiði í síma 510-2905).

4.         Skuldir

Félögum hefur verið sent yfirlit yfir fjárhagslega stöðu aðildarfélagsins gagnvart KSÍ miðað við 31. des. sl. sem og fréttatilkynning KSÍ vegna greiðslna til aðildarfélaga (sem hefur verið fært þeim til tekna). Þau félög sem skulda þurfa að greiða skuldina eða semja um greiðslu hennar fyrir 9. febrúar nk. því eins og fram kemur í lögum KSÍ, geta þau félög sem skulda KSÍ ekki átt fulltrúa á ársþingi.

5.         Gisting

Hótel Loftleiðir býður þingfulltrúum og þinggestum gistingu sem hér greinir:

• Eins manns herbergi með morgunverð - kr. 6.000.- pr. nótt
• Tveggja manna herbergi með morgunverð - kr. 7.400.- pr. nótt

Sambandsaðilar skulu sjálfir panta herbergi í síma 444-4500 og þegar það er gert skal vísað til þess að það sé gert í tengslum við þingið.

Dagskrá þingsins

LAUGARDAGUR 11. FEBRÚAR 2006

Kl. 10:00 - Afhending þinggagna.

Kl. 11:00     

1. Þingsetning.
2. Kosning þriggja manna kjörbréfanefndar.
3. Kosning fyrsta og annars þingforseta.
4. Kosning fyrsta og annars þingritara.
5. Ávörp gesta.
6. Álit kjörbréfanefndar.
7. Lögð fram skýrsla fráfarandi stjórnar.
8. Lagðir fram endurskoðaðir reikningar KSÍ til samþykktar.
9. Umræður um skýrslu stjórnar og reikninga.
10. Stjórn KSÍ leggur fram tillögu að fjárhagsáætlun fyrir næsta starfsár.
11. Tillögur um breytingar á lögum og reglugerðum teknar til afgreiðslu.                           
12. Tillögur um önnur mál sem borist hafa til stjórnar teknar til afgreiðslu.
13. Önnur mál.
14. Kosningar. Álit kjörnefndar.
15. 1. Kosning stjórnar.
    2. 1. Kosning formanns (annað hvert ár).
       2. Kosning 4ra manna í aðalstjórn.
       3. Kosning 4ra manna frá landsfjórðungum í stjórn.
       4. Kosning 3ja varamanna í aðalstjórn.
       5. Kosning 4ra varamanna úr landsfjórðungum í stjórn.
    3. Kosning fulltrúa á íþróttaþing ÍSÍ.
    4. Kosning skoðunarmanna reikninga (tveir aðalmenn og tveir varamenn).
    5. Kosning í áfrýjunardómstól KSÍ (3 aðalmenn og 5 varamenn).
    6. Kosning í dómstóll KSÍ (5 menn).
    7. Kjörnefnd, 3ja manna, er starfi milli þinga.
16. Fundargerð þingsins borin upp til samþykktar.
17. Þingslit (kl. 16:00)

ATH: Ekki verður gert hádegishlé.

Kl. 18:00 - Fordrykkur

Kl. 19:30 - Kvöldverður og skemmtun í Sunnusal Hótel Sögu

• Ársþing