U16 kvenna - Mæta Búlgaríu í síðasta leik liðsins á UEFA Development Tournament í dag
U16 ára landslið kvenna mætir Búlgaríu í dag í síðasta leik liðsins á UEFA Development Tournament. Leikurinn hefst klukkan 07:00 að íslenskum tíma, en leikið er í Gargzdai í Litháen.
Stelpurnar hafa unnið báða leikina sína til þessa og hafa ekki enn fengið á sig mark. Þær unnu Eistland 3-0 og Litháen 9-0. Búlgaría hefur einnig unnið báða leikina sína til þessa, 5-0 gegn Litháen og 3-0 gegn Eistlandi. Því er um að ræða úrslitaleik um fyrsta sæti riðilsins.
Hægt verður að fylgjast með textalýsingu frá leiknum á Facebook síðu KSÍ.
