Umsóknarferlinu fyrir UEFA CFM lokið
Umsóknarferlinu fyrir UEFA CFM námið sem haldið verður hér á landi á árinu 2020 er nú lokið. Vel á þriðja tug umsókna bárust um þau 20 sæti sem voru í boði í gegnum KSÍ og fjölmargar umsóknir bárust jafnframt um þau 10 sæti sem voru í boði í gegnum UEFA.
UEFA CFM (UEFA Certificate in Football Management) er stjórnunarnám á vegum Knattspyrnusambands Evrópu fyrir einstaklinga sem starfa í knattspyrnuhreyfingunni eða tengjast henni með beinum hætti. Námið er á háskólastigi og hefur verið skipulagt af UEFA síðan árið 2010 í samstarfi við svissnesku námsstofnunina IDHEAP (The Swiss Graduate School of Public Administration, háskólinn í Lausanne).
Þátttakendur í UEFA CFM geta verið allt að 30 (að hámarki 20 frá Íslandi og að hámarki 10 erlendis frá). Námið er að mestu rafrænt og fer allt fram á ensku (námsgögn, verkefni og fyrirlestrar). Rafræni hlutinn (e-learning) er í 6 lotum (modules), og haldnar verða 3 vinnustofur (face-to-face seminars) í höfuðstöðvum KSÍ 5. og 6. mars, 22. og 23. júlí og loks 19. og 20. nóvember.
Kennarar og fyrirlesarar eru tilnefndir af UEFA/IDHEAP og hafa allir mikla reynslu af því að starfa í alþjóðlegu umhverfi knattspyrnuhreyfingarinnar – hjá knattspyrnusamböndum, knattspyrnufélögum, og fyrirtækjum eða stofnunum með sterka tengingu við knattspyrnu. Náminu lýkur með útskrift í nóvember 2020 að undangengnum skilum á tveimur skriflegum verkefnum og munnlegu lokaprófi.
KSÍ þakkar öllum umsækjendum fyrir sýndan áhuga og óskar þátttakendum í náminu góðs gengis.
.jpg?proc=760)
