2244. fundur stjórnar KSÍ 26. nóvember
2244. fundur stjórnar Knattspyrnusambands Íslands var haldinn fimmtudaginn 26. nóvember 2020 og hófst kl. 15:30. Fundurinn fór fram með fjarfundarbúnaði.
Mættir: Guðni Bergsson formaður, Gísli Gíslason varaformaður, Borghildur Sigurðardóttir varaformaður, Ásgeir Ásgeirsson, Haraldur Haraldsson, Ingi Sigurðsson, Magnús Gylfason, Ragnhildur Skúladóttir, Valgeir Sigurðsson og Þorsteinn Gunnarsson (tók sæti á fundi kl. 15:46).
Mættir varamenn: Þóroddur Hjaltalín, Guðjón Bjarni Hálfdánarson og Jóhann K. Torfason.
Mættir fulltrúar landshluta: Jakob Skúlason (VL), Tómas Þóroddsson (SL), Bjarni Ólafur Birkisson (AL) og Björn Friðþjófsson (NL).
Fjarverandi: Enginn.
Mættur framkvæmdastjóri: Klara Bjartmarz sem ritaði fundargerð.
Þetta var gert:
1 Fundargerð síðasta stjórnarfundar var þegar samþykkt á rafrænan hátt á milli funda af öllum stjórnarmönnum sambandsins.
2 Eftirtaldar fundargerðir nefnda voru lagðar fram til kynningar:
2.1 Landsliðsnefnd kvenna 1. september 2020
2.2 Landsliðsnefnd karla 29. október 2020
2.3 Landsliðsnefnd karla 25. nóvember 2020
2.4 Fjárhagsnefnd 20. nóvember 2020
2.5 Mótanefnd, fundir nr. 9 til 24
2.6 Starfshópur um fjölgun leikja í Pepsi Max deild karla (þingskjal 10, 2020)
2.7 Fundargerð laga- og leikreglnanefndar 26. nóvember 2020. Gísli Gíslason formaður nefndarinnar fylgdi fundargerðinni úr hlaði og þar kom m.a. fram eftirfarandi tillaga:
Samningsbrot m.t.t. reglna FIFA
Rætt um að reglugerð KSÍ um félagaskipti, samninga og stöðu leikmanna um félaga fjalli ekki að nægilega miklu leyti um samningsbrot. Samkvæmt FIFA reglugerð um stöðu og félagaskipti leikmanna ber KSÍ að innleiða í reglugerð sína tilteknar meginreglur um samningsbrot og afleiðingar þess.
LLR leggur það til við stjórn KSÍ að máli þessu verði vísað til samninga- og félagaskiptanefndar KSÍ til umfjöllunar. Verði það lagt fyrir samninga- og félagaskiptanefnd að skoða og, ef þörf krefur, gera tillögur að breytingum á reglugerð KSÍ um félagaskipti, samninga og stöðu leikmanna og félaga í samræmi við reglugerð FIFA.
Stjórn KSÍ samþykkti tillögu nefndarinnar um að vísa máli þessu til samninga- og félagaskiptanefndar KSÍ til skoðunar.
3 Fjármál
3.1 Klara Bjartmarz framkvæmdastjóri KSÍ kynnti níu mánaðar uppgjör sambandsins og spá um afkomu ársins miðað við fyrirliggjandi samþykktir stjórnar. Ennþá er óvissa um ýmsan kostnað á lokafjórðungi ársins, til dæmis vegna við landsleikja.
3.2 Borghildur Sigurðardóttir formaður fjárhags-og endurskoðunarnefndar tók við boltanum og lagði til að stjórn samþykkti að greiða 20% af áætluðum barna- og unglingastyrk (áður hafði verið greitt 80% af áætluðum styrk) til annarra félaga en þeirra sem eru í Pepsi Max deild karla. UEFA hefur ekki ennþá staðfest greiðslur til félaga í Pepsi Max deild karla. Stjórn var sammála tillögu Borghildar.
3.3 Guðni Bergsson formaður KSÍ ræddi um aðgerðir stjórnvalda til stuðnings íþróttahreyfingunni. Von er á fréttum fljótlega og vonir standa til þess að um víðtækari og hærri greiðslur sé um að ræða en áður.
4 Mótamál
4.1 Klara Bjartmarz framkvæmdastjóri fór yfir þær verðlaunaafhendingar sem eru eftir vegna tímabilsins 2020.
4.2 Valgeir Sigurðsson formaður mótanefndar og formaður starfshóps um fjölgun leikja í Pepsi Max deild karla færði stjórn fréttir af fyrsta fundi starfshópsins sem fram fór 25. nóvember. Á fundinum var m.a. rædd nauðsyn þess að skilgreina hvaða markmið væru með mögulegum breytingum og í framhaldi af því yrði rætt um útfærslur. Starfshópurinn kemur aftur saman í næstu viku. Stjórn ræddi ítarlega um málið og einnig um mögulegar breytingar á fyrirkomulagi í öðrum deildum.
4.3 Guðni Bergsson formaður KSÍ ræddi um mál KR og Fram gegn stjórn KSÍ.
4.4 Valgeir Sigurðsson formaður mótanefndar ræddi um undirbúning næsta tímabils sem þegar hafin.
5 Leyfismál/reglugerðir
5.1 Stjórn KSÍ samþykkti tillögu að breytingu á Leyfisreglugerð KSÍ (útg. 4.3.) Leyfiskerfi kvenna ofl.
Breytingar á leyfisreglugerð KSÍ (útg. 4.3.): Sjá fylgiskjal 1.
Breytingar á reglugerð um knattspyrnumót og reglugerð um knattspyrnuleikvanga: Sjá fylgiskjal 2 með fundargerð.
5.2 Stjórn KSÍ samþykkti tillögu að breytingu á reglugerð um félagaskipti, samninga og stöðu leikmanna og félaga. Málsmeðferð fyrir samninga- og félagskiptanefnd o.fl.
Breytingar á reglugerð um félagaskipti, samninga og stöðu leikmanna og félaga: Sjá fylgiskjal 3 með fundargerð.
Breytingar á starfsreglum samninga- og félagaskiptanefndar KSÍ: Sjá fylgiskjal 4 með fundargerð.
Samþykkt eyðublað vegna ágreiningsmála til samninga- og félagaskiptanefndar: Sjá fylgiskjal 5 með fundargerð.
5.3 Stjórn ræddi um tillögu frá ársþingi 2020 af þingskjali 8 – Ágreiningsmál og staðalsamningur þjálfara en ársþingið KSÍ samþykkti einróma að vísa málinu til stjórnar KSÍ.
6 Landsliðsmál
6.1 Guðni Bergsson formaður KSÍ ræddi um leiki A landsliðs karla í nóvember og þjálfaramál liðsins. Stjórn leggur áherslu á að fá sterkt þjálfarateymi til starfa en einnig er stjórn meðvituð um kostnað. Stjórn KSÍ samþykkti að gefa formanni sambandsins umboð til að leiða ráðningarferlið í samráði við formann landsliðsnefndar, varaformenn og framkvæmdastjóra.
6.2 A kvenna leikur gegn Slóvakíu ytra í kvöld og gegn Ungverjalandi þriðjudaginn 1. desember. Sigur í leiknum í kvöld kemur liðinu í umspil fyrir úrslitakeppnina og sigur í báðum leikjum mögulega beint inn í úrslitakeppni EM.
6.3 U21 landslið karla vann sér sæti í úrslitakeppni EM 2021 með sigri á Írlandi í lokaleik liðsins í riðlinum. Stjórn KSÍ þakkar leikmönnum og starfsmönnum liðsins fyrir þeirra öfluga framlag. Undirbúningur fyrir úrslitakeppnina er þegar hafinn undir stjórn framkvæmdastjóra.
6.4 Klara Bjartmarz framkvæmdastjóri gaf stjórn skýrslu um framkvæmd leikja á Covid-tímum.
6.5 Klara Bjartmarz framkvæmdastjóri flutti stjórn fréttir af framkvæmdastjórafundi UEFA. Á fundinum kom m.a. fram að ákvörðun um það hvort að leikið verði í yngri landsliðum fyrri hluta árs 2021 verði ekki tekin fyrr en um miðjan desember.
7 Formanna- og framkvæmdastjórafundur KSÍ
7.1 Stjórn samþykkti að fela formanni og framkvæmdastjóra að ganga frá dagskrá fundarins, en meðal annars var rætt um að hafa á dagskrá fjármál, mótamál og kynningu á afreksstefnu KSÍ.
8 Önnur mál
8.1 Erindi frá Knattspyrnudómarafélagi Akraness vegna heiðursmerkja. Stjórn samþykkti að veita þeim aðilum sem þar eru nefndir heiðursmerki KSÍ.
8.2 Erindi frá nefndarsviði Alþingis: Allsherjar- og menntamálanefnd Alþingis sendir yður til umsagnar tillögu til þingsályktunar um mótun heildstæðrar stefnu um afreksfólk í íþróttum, 81. mál.
8.3 Erindi frá nefndarsviði Alþingis: Allsherjar- og menntamálanefnd Alþingis sendir yður til umsagnar tillögu til þingsályktunar um launasjóð íslensks afreksíþróttafólks , 116. mál.
8.4 Drög að umsögn KSÍ um ofangreind mál lögð fram og samþykkt. Framkvæmdastjóra falið að koma málinu í nauðsynlegt ferli.
8.5 Klara Bjartmarz framkvæmdastjóri kynnti stjórn vinnulag varðandi Leikmannaval KSÍ sem verður með óbreyttu sniði.
8.6 Borghildur Sigurðardóttir varaformaður tilkynnti stjórn að landsliðsnefnd kvenna hafi lokið störfum sínum varðandi endurskoðun kvennaknattspyrnu (sbr. samþykkt ársþings KSÍ 2019) og að skýrslu nefndarinnar hafi verið skilað til skrifstofu KSÍ til útgáfu og kynningar. Stjórn þakkaði Borghildi og landsliðsnefndinni fyrir þeirra framlag í málinu.
Fleira var ekki bókað og var fundi slitið kl. 17:05.