2252. fundur stjórnar KSÍ - 15. apríl 2021
2252. fundur stjórnar Knattspyrnusambands Íslands var haldinn fimmtudaginn 15. apríl 2021 og hófst kl. 16:00. Fundurinn fór fram á skrifstofum KSÍ á Laugardalsvelli.
Mættir: Guðni Bergsson formaður, Gísli Gíslason varaformaður, Borghildur Sigurðardóttir (tók þátt í fundinum í gegnum fjarfundabúnað) varaformaður, Ásgeir Ásgeirsson, Ingi Sigurðsson (tók þátt í fundinum í gegnum fjarfundabúnað), Magnús Gylfason, Orri Hlöðversson (tók sæti á fundinum kl. 16:10), Ragnhildur Skúladóttir, Valgeir Sigurðsson og Þorsteinn Gunnarsson.
Mættur framkvæmdastjóri: Klara Bjartmarz sem ritaði fundargerð.
Þetta var gert:
1. Fundargerð síðasta stjórnarfundar.
- 1.1 Fundargerð síðasta stjórnarfundar var samþykkt á milli funda á rafrænan hátt af öllum stjórnarmönnum sambandsins.
2. Fundargerðir nefnda og starfshópa voru lagðar fram til kynningar.
- 2.1 Mótanefnd 29. mars 2021
- 2.2 Mótanefnd 7. apríl 2021
- 2.3 Mótanefnd 14. apríl 2021
3. Skipan í nefndir og starfshópa.
- 3.1 Rætt um nefndaskipan og horft til dreifingar á félög og kynjahlutföll. Málið verður tekið til afgreiðslu á næsta stjórnarfundi. Ítrekað að þær nefndir sem nú eru starfandi gera það í umboði stjórnar.
- 3.2 Rætt um þá starfshópa sem þarf að skipa í samræmi við samþykktir ársþings. Málið verður tekið til afgreiðslu á næsta stjórnarfundi.
4. Gísli Gíslason formaður laga-og leikreglnanefndar kynnti tillögur að reglugerðarbreytingum.
- 4.1 Lögð var fram tillaga um breytingar á ákvæðum í reglugerð KSÍ um aga- og úrskurðarmál. Efnislega voru breytingarnar samþykktar, en skrifstofu KSÍ var falið að endurskoða ákvæði um sektir í reglugerðinni. Reglugerðin verður send til stjórnar í næstu viku til rafrænnar samþykktar til þess að ný ákvæði gildi í upphafi móta.
- 4.2 Lögð var fram tillaga um breytingar á ákvæðum í reglugerð KSÍ um áfrýjunardómstól KSÍ. Efnislega voru breytingarnar samþykktar, en skrifstofu KSÍ var falið að endurskoða ákvæði um sektir í reglugerðinni. Reglugerðin verður send til stjórnar í næstu viku til rafrænnar samþykktar til þess að ný ákvæði gildi í upphafi móta.
- 4.3 Rætt um reglugerð KSÍ um félagaskipti, samninga og stöðu leikmanna og félaga og tillögur að nýjum ákvæðum um samningsbrot leikmanna og félaga, en uppfæra þarf reglugerðina í samræmi við reglur FIFA þar um. Frekari umræðu um málið var frestað og verður tillagan m.a. send til ÍTF og leikmannasamtakanna til umfjöllunar. Eðli tillögunnar er þannig að nauðsynlegt er að hafa víðtækt samráð.
- 4.4 Lögð var fram tillaga um breytingar á reglugerð KSÍ um knattspyrnumót (tillaga ÍA frá ársþingi). Stjórn samþykkti tillöguna.
- 4.5 Lögð var fram tillaga að bráðabirgðaákvæði í reglugerð KSÍ um ferðaþátttökugjald. Stjórn KSÍ samþykkti bráðabirgðaákvæðið en leggur áherslu á það að ákvörðun um að stjórn KSÍ taki yfir gjaldið (hlut félaganna) gildi eingöngu fyrir árið 2021 og hafi ekki fordæmisgildi til framtíðar.
- 4.6 Lögð var fram tillaga um reglugerð um viðmiðanir og sértækar ráðstafanir vegna heimsfaraldurs kórónaveiru (Covid-19). Orri Hlöðversson kynnti sjónarmið ÍTF í málinu. Stjórn KSÍ samþykkti reglugerðina.
- 4.7. Lögð var fram tillaga um bráðabirgðaákvæði við reglugerð KSÍ um aðgönguskírteini. Stjórn samþykkti tillöguna.
- 4.8. Lögð var fram tillaga um breytingar á reglugerð KSÍ um heiðursviðurkenningar. Stjórn KSÍ samþykkti tillöguna.
5. Mótamál.
- 5.1 Valgeir Sigurðsson formaður mótanefndar fór yfir upphaf móta meistaraflokka. Pepsi Max deild karla og forkeppni Mjólkurbikars karla mun hefjast síðar en til stóð. Aðrar deildir meistaraflokka og Mjólkurbikar kvenna eru óbreytt og leikið skv. núverandi leikjadagskrá. Staðan varðandi Lengjubikar og Meistarakeppni KSÍ var rædd. Stjórn KSÍ samþykkti að stöðva keppni í öllum deildum Lengjubikars KSÍ 2021 (karla og kvenna) að tillögu mótanefndar – keppninni er þar með lokið og ekki verða krýndir meistarar. Þá tók stjórn ákvörðun um að Meistarakeppni KSÍ (karla og kvenna) fari ekki fram árið 2021.
- 5.2 Rætt um sóttvarnarreglur og um að hafa viðbragðsáætlun hreyfingarinnar tilbúna ef kemur til frekari samkomutakmarkana (æfinga/keppnisbanns).
- 5.3 Stjórn KSÍ þakkaði mótanefnd og starfsmönnum mótamála fyrir góð störf.
6. Rætt um landsliðsmál.
- 6.1 Borghildur Sigurðardóttir formaður landsliðsnefndar A kvenna fór yfir vináttuleiki liðsins á Ítalíu. Leikirnir voru fyrstu leikir Þorsteins Halldórsson nýráðins þjálfara og gengu vel.
- 6.2 Rætt var um A landslið karla og leikina sem fór fram í mars glugganum. Guðni Bergsson formaður opnaði umræðuna og Magnús Gylfason formaður landsliðsnefndar tók við. Klara Bjartmarz framkvæmdastjóri fór yfir þá vinnu sem snýr að skrifstofunni.
- 6.3 Gísli Gíslason formaður landsliðsnefndar U21 karla og Borghildur Sigurðardóttir fararstjóri í úrslitakeppni U21 karla gáfu stjórn skýrslu um keppnina.
7. Önnur mál
- 7.1 Rætt um HM 2022 í Katar og opið bréf frá ASÍ. Guðni Bergsson formaður fór yfir málið og hvernig það snýr að KSÍ.
- 7.2 Framkvæmdastjóri KSÍ Klara Bjartmarz upplýsti stjórn um að Guðmundur Hólmar Helgason meistaranemi í lögfræði við Háskólann í Reykjavík hefur lokið starfsnámi sínu hjá KSÍ. Þetta er í fyrsta skipti sem KSÍ hefur tekið á móti laganema í starfsnám en það sé tilkomið vegna samstarfssamnings sem KSÍ gerði við lagadeild Háskólans í Reykjavík nýverið. Samkvæmt samningnum mun KSÍ taka á móti einum starfsnema á hverju ári frá lagadeild HR. Að þessu sinni vann starfsneminn, í nánu samráði við starfsfólk, að gerð vinnsluskrár vegna söfnunar KSÍ á persónugögnum en um leið vann hann að drögum að nýrri persónuverndarstefnu KSÍ.
- 7.3 Rætt um sjónvarpsréttarmál. Guðni Bergsson formaður og Orri Hlöðversson fóru yfir sjónvarpsréttarmál með stjórn. Markviss vinna hefur verið unnin og samstarf KSÍ og ÍTF verið gott. Frestur til að skila inn tilboðum rennur út á morgun. Í framhaldi af því gætu línur farið að skýrast.
Fleira var ekki bókað og var fundi slitið kl. 19:25.