Stjórn KSÍ samþykkti á fundi sínum þann 12. janúar fjárhagslegan stuðning við aðildarfélög sambandsins.  Eins og síðustu ár tekur KSÍ yfir ferða- og uppihaldskostnað dómara fyrir árið 2012 í öllum deildum beggja kynja og í leikjum Valitor-bikarsins. 

Mótanefnd KSÍ hefur birt drög að leikjum sumarsins í Pepsi-deild karla, Pepsi-deild kvenna, 1. og 2. deild karla.  Félög í þessum deildum eru vinsamlegast beðin um að fara yfir sína leiki og koma með athugasemdir við þessi drög í síðasta lagi miðvikudaginn 1. febrúar.

Á morgun, fimmtudaginn 19. janúar, er síðasti dagur til að skila inn þátttökutilkynningum í knattspyrnumót 2012. Nauðsynlegt er fyrir félögin að skila inn frumriti af þátttökutilkynningu sinni og skal henni skilað fyrir 20. janúar næstkomandi.

Félögum sem halda opin mót 2012 er boðið að senda upplýsingar um viðkomandi mót til KSÍ líkt og áður á póstfangið.  Upplýsingarnar verður að finna í lista undir Opin mót í valmyndinni hér vinstra megin á síðunni.

Ísland er sem stendur í fjórða sæti á Háttvísilista UEFA (Respect Fair Play) en á þeim lista er tekið tillit til leikja á vegum UEFA frá 1. maí 2011 til 30. apríl 2012. Þær þjóðir sem verða í efstu þremur sætunum á þessum lista, fá í sinn hlut aukasæti í Evrópudeild UEFA 2012/13.

Stelpurnar í ÍBV tryggðu sér Íslandsmeistaratitilinn í innanhússknattspyrnu - Futsal, um helgina. Þær höfðu sigur í öllum sínum leikjum og enduðu með fullt hús stiga. Fylkisstúlkur urðu í öðru sæti en innbyrðis leikur þessara liða var æsispennandi.

Reykjavíkurmót KRR hefst fimmtudaginn 12. janúar þegar tveir leikir fara fram í A riðli meistaraflokks karla. Víkingur og Leiknir leika þá kl. 19:00 og strax á eftir, eða kl. 21:00, leika Fram og ÍR.  Konurnar hefja svo leik föstudaginn 13. janúar en þá leika KR og Fylkir kl. 19:00 en Þróttur og Fjölnir leika kl. 21:00.

ÍBV tryggði sér Íslandsmeistaratitilinn í innanhússknattspyrnu - Futsal, með því að leggja Víking Ólafsvík í úrslitaleik. Lokatölur urðu 5 - 0 fyrir Eyjamenn sem leiddu í leikhléi með tveimur mörkum.

Í kvöld hefst úrslitakeppni meistaraflokks karla í Íslandsmótinu í innanhússknattspyrnu - Futsal og verður leikið í Laugardalshöll. Fjölnir og Fylkir mætast kl. 18:30 og strax á eftir, eða kl. 20:00, leika Leiknir R. og Víðir.

Póstlagðar hafa verið þátttökutilkynningar til aðildarfélaga KSÍ og munu þær því berast til félaganna á næstu dögum. Nauðsynlegt er fyrir félögin að skila inn frumriti af þátttökutilkynningu sinni og skal henni skilað fyrir 20. janúar næstkomandi.

Minnt er á að umsóknir í Ferðasjóð íþróttafélaga vegna keppnisferða á fyrirfram skilgreind styrkhæf mót á árinu 2011 verða að berast fyrir miðnætti þann 9. janúar 2012. Á miðnætti þann dag verður umsóknarsvæðinu lokað og gögnin færð yfir í gagnagrunn til úrvinnslu. Það verður því ekki mögulegt að taka við umsóknum eftir að umsóknarfrestur rennur út.

Knattspyrnusamband Íslands sendir öllum landsmönnum sínar bestu áramótakveðjur, óskar landsmönnum gleðilegs nýs knattspyrnuárs og þakkar fyrir allt gott á liðnu ári.  Skrifstofan opnar aftur á nýju ári, mánudaginn 2. janúar.

Knattspyrnusamband Íslands sendir öllum landsmönnum óskir um gleðileg jól og farsældar á nýju ári. Vonum að allir hafi það sem allra best um hátíðirnar og njóti samveru með fjölskyldum og vinum.

Mótanefnd KSÍ hefur gefið út drög að niðurröðun leikja í Lengjubikarnum 2012 sem hafa verið birt á vef KSÍ. Riðlaskiptingu í karla- og kvennaflokki má sjá hér að neðan en félögin hafa frest til 28. desember til þess að gera athugasemdir.

Leikmannaval KSÍ hefur valið Heiðar Helguson og Margréti Láru Viðarsdóttur knattspyrnufólk ársins 2011. Þetta er í áttunda skiptið sem að knattspyrnufólk ársins er sérstaklega útnefnt af KSÍ. Það eru fjölmargir aðilar, m.a. fyrrverandi landsliðsmenn, þjálfarar og forystumenn í knattspyrnuhreyfingunni, er velja knattspyrnufólk ársins.

Í dag kom út síðara bindi af 100 ára sögu Íslandsmótsins í knattspyrnu en það er Sigmundur Ó. Steinarsson sem sem er höfundur þessa verks. Fyrra bindið kom út í apríl á þessu ári og vakti mikla athygli. Það voru þeir Gunnar Guðmannsson og Sigursteinn Gíslason sem fengu afhent fyrstu eintökin en þeir hafa orðið 9 sinnum Íslandsmeistarar karla, oftast núlifandi Íslendinga.