Ágætu félagar,

KSÍ birtir nú ársskýrslu sína fyrir árið 2025, þar sem farið er yfir helstu verkefni, áskoranir og áfanga liðins árs. Þetta var mitt annað ár sem formaður sambandsins — ár framfara, stórra áfanga, mikilvægra skrefa og ekki síður nýrra áskorana fyrir hreyfinguna. Knattspyrnuhreyfingin er stór og hún er sterk og hún er reiðubúin til að takast á við enn stærri skref fyrir íslenska knattspyrnu.

Laugardalsvöllur — nýr leikur á nýjum velli.

Það er ánægjulegt að geta sagt að fyrstu umfangsmiklu endurbæturnar á Laugardalsvelli hafi skilað sér með glæsibrag. Nýi leikflöturinn, með hybrid-grasi og nútímalegu hitakerfi, hefur gjörbreytt aðstæðum og gert okkur kleift að nýta þjóðarleikvanginn stóran hluta ársins. Hlaupabrautin hefur verið fjarlægð, leikflöturinn færður nær stúkunni vestanmegin og ég held að allir þeir sem hafa farið á landsleik eftir þessa breytingu sjái og finni muninn. Endurbætur á Laugardalsvelli gengu hratt og örugglega fyrir sig. Þessi framkvæmd er lykilskref í því að tryggja landsliðum og félagsliðum aðstöðu sem stenst kröfur UEFA og FIFA allt árið um kring. Nú er boltinn farinn að rúlla og hann mun ekki stoppa. Fyrsti leikurinn á nýjum leikfleti, sem A landslið kvenna lék í Þjóðadeild UEFA, varð táknrænn vendipunktur: Ný byrjun á nýjum velli.

A landslið kvenna – staðföst framganga og sterkur kjarni.

Kvennalandsliðið okkar tók þátt í sínu fimmta Evrópumóti í röð. Þessi árangur er ekki sjálfgefinn og byggir á miklu og markvissu starfi leikmanna, þjálfarateymis og félagsliða um allt land. Liðið hefur undir stjórn Þorsteins Halldórssonar sýnt að það er í fremstu röð Evrópu. Glæsilegur sigur á Þýskalandi sumarið 2024 staðfesti styrk liðsins. Í Sviss var íslenska liðið að vonum stutt af fjölda stuðningsmanna sem fylltu leikvangana af stolti og þjóðarstemningu. Áræðni, fagmennska og samheldni liðsins héldu áfram að vera okkur öllum fyrirmynd.

A landslið karla – nýtt tímabil undir stjórn Arnars Gunnlaugssonar.

Árið 2025 var fyrsta heila ár Arnars Gunnlaugssonar við stjórn A landsliðs karla. Undir hans stjórn hefur liðið náð traustri sýn, skýrum leikstíl og fjölmargir ungir leikmenn stimpluðu sig inn í landsliðið af krafti.
Það eru bjartir tímar í uppbyggingu liðsins og mikil von til þess að árangur fylgi eftir á komandi árum. Við treystum á að Arnar og hans teymi haldi áfram að vinna af festu, fagmennsku og eldmóði.

Íslensk félög í Evrópu – áfram á réttri braut.

Árangur íslenskra félagsliða í Evrópukeppnum heldur áfram að vekja athygli. Félögin okkar hafa náð að nýta tækifærin í nýju fyrirkomulagi keppnanna og sýnt að íslensk lið geta staðið jafnfætis mun stærri félögum. Framganga félagsliða okkar í Evrópu hefur verið einstök, árangur sem áður þótti óraunhæfur. Þetta er mikilvægt bæði fjárhagslega og ímyndarlega fyrir íslenska knattspyrnu.

Aðildarfélög KSÍ – hjartað í starfseminni.

Aðildarfélögin eru og verða hjarta knattspyrnuhreyfingarinnar. Starf þeirra er einstakt og ekki síst það hvernig þau ná að samræma metnaðarfullt afreksstarf og öflugt grasrótarstarf þrátt fyrir takmarkaðar fjárheimildir og mikinn fjölda iðkenda. Sjálfboðaliðar, þjálfarar og starfsmenn félaganna eiga allir skilið innilegar þakkir fyrir ómetanlegt framlag.

Baklandið – sterkt samstarf og traustir stuðningsaðilar.

Á árinu 2025 styrkti KSÍ tengsl sín við helstu samstarfsaðila sína. Samstarf KSÍ og fyrirtækja byggir á gagnkvæmu trausti og sameiginlegri sýn á samfélagslegt gildi íþróttarinnar. Fótboltinn snertir líf tugþúsunda Íslendinga og það er ánægjulegt að sjá hversu mörg fyrirtæki vilja leggja sitt af mörkum til að efla íþróttina enn frekar. Ég vil nota tækifærið hér og þakka bakhjörlum og öðrum samstarfsaðilum kærlega fyrir stuðninginn árið 2025 og hlökkum við til áframhaldandi samstarfs.

Minnumst þeirra sem kvöddu.

Á árinu kvöddum við nokkra góða og dugandi félagsmenn knattspyrnuhreyfingarinnar. Við minnumst allra þeirra sem hafa lagt óeigingjarnt og ómetanlegt framlag til íþróttarinnar á löngum tíma. Við þökkum þeim fyrir þeirra mikilvægu störf og minnumst þeirra með virðingu og þakklæti.

Fram undan – björt framtíð íslenskrar knattspyrnu.

Kæru félagar, árið 2026 verður spennandi og krefjandi ár. Framkvæmdirnar við Laugardalsvöll munu halda áfram, og íslensk landslið munu etja kappi við sterkustu þjóðir heims og félagsliðin okkar munu fá tækifæri til að styrkja stöðu sína enn frekar á alþjóðavettvangi og færa okkur stoltar stundir.

Ég vil þakka öllum í knattspyrnuhreyfingunni fyrir þeirra ómetanlega starf, eins vil ég þakka starfsfólki KSÍ fyrir þeirra góðu störf á árinu. Áfram höldum við veginn.

Við stöndum saman í þessu verkefni — og saman erum við sterkust. 
Framtíð íslenskrar knattspyrnu er björt.

Þorvaldur Örlygsson Formaður KSÍ

Ísland hóf undirbúning sinn fyrir lokakeppni EM í Serbíu. Liðið var þar við æfingar í nokkra daga sem lauk með leik gegn Serbíu og fór leikurinn fram á æfingasvæði serbneska knattspyrnusambandsins.

Íslenska liðið hóf leikinn af miklum krafti og var komið í tveggja marka forystu eftir aðeins fimm mínútur. Sandra María Jessen skoraði fyrra markið og Karólína Lea Vilhjálmsdóttir það síðara. Sveindís Jane Jónsdóttir bætti þriðja marki Íslands við eftir um tíu mínútur í seinni hálfleik áður en Serbar minnkuðu muninn. Flottur sigur hjá Íslandi og fín frammistaða í síðasta leik liðsins fyrir lokakeppni EM.

Ísland var í riðli með gestgjöfum Sviss, Noregi og Finnlandi og mætti liðið Finnlandi í Thun í fyrsta leik sínum á mótinu. Leikurinn var jafn og bæði lið sköpuðu sér færi. Það var svo á 58. mínútu sem Hildur Antonsdóttir var rekin af velli. Finnar nýttu sér það og skoruðu eina mark leiksins á 70. mínútu. Svekkjandi tap í fyrsta leik liðsins og ljóst að nauðsynlegt væri að ná jákvæðum úrslitum gegn Sviss í næsta leik.

Leikurinn gegn Sviss fór fram á Stadion Wankdorf í Bern. Ísland var nálægt því að taka forystuna á fyrstu mínútu leiksins þegar skot Ingibjargar Sigurðardóttur hafnaði í þverslánni. Karólína Lea Vilhjálmsdóttir átti svo einnig skot í þverslánna, beint úr aukaspyrnu, í upphafi seinni hálfleiks. Það var hins vegar Sviss sem skoraði fyrsta mark leiksins þegar Géraldine Reuteler setti boltann framhjá Cecilíu Rán Rúnarsdóttur í marki Íslands. Sviss bætti svo við öðru marki á 90. mínútu og þar við sat. Sárt tap fyrir íslenska liðið og ljóst að það ætti ekki möguleika á að komast í 8-liða úrslit keppninnar.

Noregur voru síðustu mótherjar Íslands á mótinu, en norska liðið hafði þegar tryggt sér sæti í 8-liða úrslitum fyrir leikinn. Íslenska liðið hóf leikinn vel og skoraði fyrsta mark sitt á mótinu eftir sex mínútna leik. Sveindís Jane Jónsdóttir var þar að verki. Frábær byrjun hjá Íslandi. Norska liðið var hins vegar ekki lengi að svara og jafnaði Signe Gaupset tíu mínútum síðar. Hún var svo aftur á ferðinni öðrum tíu mínútum síðar og Noregur komið með forystu. Frida Maanum bætti við tveimur mörkum fyrir Noreg áður en Hlín Eiríksdóttir og Glódís Perla Viggósdóttir minnkuðu muninn í 4-3. Þriðja tap Íslands í keppninni staðreynd.

Ísland mætti Norður Írlandi í umspili Þjóðadeildarinnar í október, en leikið var heima og að heiman. Fyrri leikur viðureignarinnar fór fram í Ballymena á Norður Írlandi. Ísland var mun meira með boltann allan leikinn og stjórnuðu leiknum. Fyrsta mark leiksins skoraði Glódís Perla Viggósdóttir á 31. mínútu áður en Ingibjörg Sigurðardóttir bætti við öðru marki fimmtán mínútum fyrir leikslok. Flottur 2-0 sigur og Ísland fór með góða forystu heim til Íslands.

Seinni leikurinn átti upphaflega að fara fram 28. október á Laugardalsvelli, en vegna gríðarmikillar snjókomu á leikdag þurfti að fresta leiknum. Stefnt var að því að spila leikinn degi síðar og þá á Þróttarvelli þar sem ekki var hægt að fjarlægja snjóinn af leikfleti Laugardalsvallar. Með miklum samtakamætti tókst að hreinsa leikflöt Þróttarvallar fyrir leik og fór leikurinn því fram.

Sveindís Jane Jónsdóttir kom Íslandi yfir eftir um hálftíma leik og Ísland því komið með þriggja marka forystu í einvíginu. Hlín Eiríksdóttir bætti svo öðru marki Íslands við á 58. mínútu áður en Emilía Kiær Ásgeirsdóttir skoraði af vítapunktinum korteri síðar. Þetta var fyrsta mark Emilíu fyrir Ísland. Góða frammistaða og sannfærandi 5-0 samanlagður sigur gegn Norður Írlandi.

Með þessum sigri var ljóst að Ísland héldi sæti sínu í A deild fyrir undankeppni HM 2027. Þar mun Ísland mæta Spáni, Englandi og Úkraínu. Efsta lið riðilsins fer beint á HM á meðan hin lið riðilsins fara í umspil um sæti í lokakeppni HM. 

Ísland hefur leik í byrjun mars með leikjum gegn Spáni og Englandi, báðir ytra.

Ísland mætti Kosóvó í umspili Þjóðadeildarinnar. Með sigri myndi Ísland halda sæti sínu í B deild keppninnar, en falla niður í C deild ef það myndi tapa gegn Kosóvó. Fyrri leikurinn fór fram í Pristina í Kosóvó og var þetta fyrsti leikur liðsins undir stjórn Arnars Gunnlaugssonar. Heimamenn komust yfir eftir 19 mínútna leik, en Orri Steinn Óskarsson jafnaði jafn harðan þremur mínútum síðar. Það voru svo heimamenn sem komust yfir aftur í seinni hálfleik og þar við sat. Því ljóst að Ísland þyrfti að vinna seinni leikinn til að halda sæti sínu í B deild. 

Seinni leikurinn fór fram á Estadio Enrique Roca í Murcia á Spáni þar sem Laugardalsvöllur var ekki leikfær á þessum árstíma. Ísland byrjaði leikinn frábærlega og skoraði Orri Steinn fyrsta mark leiksins eftir aðeins tvær mínútur. Kosóvó skoraði hins vegar tvö mörk í fyrri hálfleik og bætti því þriðja við í seinni hálfleik og því ljóst að Ísland leikur í C deild Þjóðadeildarinnar í næstu útgáfu hennar. 

Ísland lék tvo vináttuleiki í júní og fóru þeir báðir fram á Bretlandseyjum. Fyrst mætti liðið Skotlandi 6. júní á Hampden Park. Andri Lucas Guðjohnsen kom Ísland yfir eftir um tíu mínútur með glæsilegu marki. Heimamenn jöfnuðu metin um miðjan fyrri hálfleik, en íslenska liðinu tókst að komast aftur yfir undir lok hálfleiksins þegar hornspyrna Alberts Guðmundssonar fór af leikmanni Skota og í netið. Guðlaugur Victor Pálsson bætti svo þriðja marki Íslands við í upphafi seinni hálfleiks og glæsilegur fyrsti sigur liðsins undir stjórn Arnars Gunnlaugssonar staðreynd. 

Ísland hóf leikinn gegn Norður Írlandi vel, voru meira með boltann en þó án þess að skapa sér góð færi. Í lok fyrri hálfleiks dró svo til tíðinda þegar Norður Írar skoruðu eina mark leiksins eftir mistök í vörn íslenska liðsins. Heimamenn misstu mann af velli í seinni hálfleik með rautt spjald, en íslenska liðinu tókst ekki að nýta sér liðsmuninn og svekkjandi 0-1 tap því niðurstaðan. 

Ísland var í riðli með Frakklandi, Úkraínu og Aserbaídsjan í undankeppni HM 2026. Liðið hóf leik á Laugardalsvelli þegar það tók á móti Aserbaídsjan. Ísland var sterkari aðilinn allan leikinn, en tókst þó ekki að skora fyrr en í lok fyrri hálfleiks þegar Guðlaugur Victor setti boltann í netið. Flóðgáttirnar opnuðust svo í seinni hálfleik. Ísak Bergmann Jóhannesson skoraði tvö mörk með stuttu millibili í upphafi hans áður en Albert Guðmundsson og Kristian Nökkvi Hlynsson bættu við sitthvoru markinu. Glæsilegur fimm marka sigur staðreynd. Frakkland var næsti mótherji liðsins, ytra. Andri Lucas kom Ísland yfir á 21. mínútu eftir góða pressu íslenska liðsins, en Kylian Mbappe jafnaði metin af vítapunktinum undir lok fyrri hálfleiks. Bradley Barcola bætti við öðru marki Frakklands um miðjan seinni hálfleik, en stuttu síðar misstu Frakkar leikmann útaf með rautt spjald. Undir lok leiksins skoraði Andri Lucas aftur, en markið var dæmt af eftir VAR-skoðun og svekkjandi tap því niðurstaðan. 

Úkraína og Frakkland voru mótherjar liðsins í október og fóru báðir leikirnir fram á Laugardalsvelli. Boðið var upp á mikinn markaleik þegar Ísland mætti Úkraínu og endaði hann með 5-3 sigri Úkraínu. Ruslan Malinovskyi kom Úkraína yfir eftir stundarfjórðung, en Mikael Egill Ellertsson jafnaði um miðjan fyrri hálfleik. Malinovskyi og Oleksii Hutsuliak skoruðu með stuttu millibili undir lok fyrri hálfleiks og Úkraína leiddi með tveimur mörkum í hálfleik. Íslandi tókst hins vegar að jafna með tveimur mörkum frá Alberti Guðmundssyni. Úkraínumenn voru ekki hættir og bættu tveimur mörkum við undir lok leiksins og sárt tap staðreynd. Ísland lét þetta tap ekki á sig fá og mættu frábærlega til leiks gegn Frökkum. Guðlaugur Victor Pálsson kom Íslandi yfir í lok fyrri hálfleiks. Það var svo á átta mínútna kafla um miðjan seinni hálfleik sem þrjú mörk litu dagsins ljós. Christopher Nkunku og Jean-Philippe Mateta komu Frakklandi yfir áður en Kristian Nökkvi Hlynsson jafnaði metin. Glæsileg frammistaða hjá íslenska liðinu og 2-2 jafntefli niðurstaðan. 

Þessi úrslit þýddu að Ísland eygði möguleika á sæti í umspili fyrir lokakeppni HM. Liðið átti tvo útileiki eftir, gegn Aserbaídsjan og Úkraínu. Albert Guðmundsson og Sverrir Ingi Ingason skoruðu mörk Íslands í 2-0 sigri gegn Aserbaídsjan. Á sama tíma tapaði Úkraína 0-4 gegn Frakklandi og því ljóst að Íslandi nægði jafntefli gegn Úkraínu í síðasta leik sínum í riðlinum til að komast í umspilið. Leikurinn var jafn og gríðarlega spennandi og lengi vel leit út fyrir að Íslandi myndi takast ætlunarverk sitt. Úkraínumenn voru hins vegar ekki sammála því og komust yfir á 83. mínútu með marki frá Oleksandr Zubkov. Oleksiy Gutsulyak bætti svo öðru marki liðsins við í uppbótartíma og grátlegt tap staðreynd.  

Strákarnir okkar fengu góða gesti á fyrstu æfinguna í undirbúningi liðsins fyrir leikina gegn Úkraínu og Frakklandi í október – um 40 knattspyrnuiðkendur með fötlun og aðstandendur þeirra kíktu í heimsókn og heilsuðu upp á leikmenn og þjálfara.

Þjóðadeild UEFA hefst í september þar sem Ísland leikur í C deild. Þar verður liðið í riðli með Búlgaríu, Eistlandi og Lúxemborg eða Möltu.

Ísland mætir Mexíkó í vináttuleik í Querétaro í Mexíkó fimmtudaginn 26. febrúar. Leikurinn er leikinn fyrir utan alþjóðlega landsleikjaglugga og verður liðið því mestmegnis skipað leikmönnum sem leika á Íslandi. Ísland mætir svo Kanada og Haíti í mars og fara báðir leikirnir fram í Kanada. Fyrst mætast Kanada og Ísland laugardaginn 28. mars áður en Ísland og Haíti mætast þriðjudaginn 31. mars. Báðir leikirnir fara fram á BMO Field í Torontó.   

Birkir Bjarnason tilkynnti á árinu að hann hefði lagt knattspyrnuskóna á hilluna og var hann af því tilefni heiðraður fyrir feril sinn með A landsliði karla fyrir leik Íslands og Aserbaísjan sem fram fór í september. Vallargestir risu úr sætum og hylltu Birki með dynjandi lófataki fyrir hans framlag til árangurs íslenska landsliðsins.

Birkir er leikjahæsti leikmaður A landsliðs karla frá upphafi, lék alls 113 leiki og skoraði 15 mörk, og hann lék fyrir Íslands hönd á EM 2016 og HM 2018. Fyrsti leikur Birkis var vináttuleikur gegn Andorra á Laugardalsvelli í lok maí 2010, og síðasti leikurinn var í nóvember 2022 gegn Litháen í Kaunas.

Ísland lék tvo vináttuleiki gegn Skotlandi í lok maí og byrjun júní. Báðir leikirnir fóru fram á Falkirk Stadium í Skotlandi. Fyrri leikur liðanna endaði með 2-2 jafntefli þar sem Vigdís Lilja Kristjánsdóttir skoraði annað mark Íslands en hitt var sjálfsmark Skota. Liðin mættust svo aftur tveimur dögum síðar og þá hafði Skotland betur 2-1. Mark Íslands í þeim leik skoraði Bergdís Sveinsdóttir. 

Ísland hóf leik í undankeppni EM 2027 þegar liðið mætti Færeyjum á Þróttarvelli í byrjun september. Færeyjar byrjuðu leikinn af krafti og voru komnir í tveggja marka forystu eftir stundarfjórðung. Ísland minnkaði muninn með sjálfsmarki Færeyinga um miðjan seinni hálfleik en nær komst liðið ekki og svekkjandi byrjun á undankeppninni. Næst mætti liðið Eistlandi ytra nokkrum dögum síðar. Eistar voru yfir með einu marki í hálfleik, en Benoný Breki Andrésson jafnaði undir lok leiks og fyrsta stig Íslands staðreynd. 

Næst mætti Ísland Sviss í Luzern. Þeim leik lauk með markalausu jafntefli, sterkt stig fyrir íslenska liðið. Íslenska liðið fékk Lúxemborg í heimsókn nokkrum dögum síðar og vann þar góðan 2-1 sigur. Benoný Breki og Jóhannes Kristinn Bjarnason skoruðu mörk Íslands. Liðin mættust svo aftur í nóvember, nú í Lúxemborg. Ísland vann þann leik líka, nú 3-1, og voru það þeir Ágúst Orri Þorsteinsson, Haukur Andri Haraldsson og Eggert Aron Guðmundsson sem skoruðu mörk Íslands.  

Á milli leikjanna tveggja gegn Lúxemborg urðu þjálfaraskipti hjá liðinu. Ólafur Ingi Skúlason söðlaði um og tók við þjálfun karlaliðs Breiðabliks. Lúðvík Gunnarsson og Ólafur Kristjánsson munu stjórna liðinu út undankeppnina. 

Næstu leikir liðsins eru heimaleikur gegn Eistlandi og útileikur gegn Frakklandi í mars. Ísland er í fjórða sæti riðilsins með átta stig eftir 5 leiki. Frakkland er í efsta sæti riðilsins með 10 stig eftir fjóra leiki. 

U19 kvenna hóf árið á tveimur vináttuleikjum gegn Skotlandi í febrúar. Báðir leikirnir fóru fram á Broadwood í nágrenni Glasgow í Skotlandi. Fyrri leikurinn fór fram 20. febrúar og vann Ísland þar 3-1 sigur með mörkum frá Hrefnu Jónsdóttur, Freyju Stefánsdóttur og Brynju Rán Knudsen. Seinni leikurinn var leikinn 23. febrúar og vann Skotland þann leik 2-1. Ragnheiður Þórunn Jónsdóttir skoraði mark Íslands. 

Í byrjun apríl tók liðið þátt í seinni umferð undankeppni EM 2025 og var þar í riðli með Noregi, Slóveníu og Portúgal. Riðillinn var leikinn í Portúgal. Fyrsti leikur Íslands var einmitt gegn Portúgal og tapaðist hann 0-2. Næst mætti liðið Noregi og tapaði þeim leik 0-1. Síðustu mótherjar Íslands voru Slóvenar og vann Ísland góðan 4-1 sigur og tryggði sér með því áframhaldandi sæti í A deild undankeppninnar. Hrefna Jónsdóttir, Líf Joostdóttir van Bemmel, Hrafnhildur Ása Halldórsdóttir og Ragnheiður Þórunn Jónsdóttir skoruðu mörk Íslands. 

Næsta verkefni liðsins var æfingamót í Noregi þar sem Ísland mætti Finnlandi og Svíþjóð. Liðið tapaði 0-1 fyrir Finnlandi en vann 3-1 sigur gegn Svíþjóð með mörkum frá Ragnheiði Þórunni Jónsdóttur, Líf Joostdóttur van Bemmel og Berglindi Freyju Hlynsdóttur. 

Síðasta verkefni Íslands var fyrri umferð undankeppni EM 2026 þar sem liðið var í riðli með Danmörku, Portúgal og Kosóvó, en leikið var í Portúgal. Ísland tapaði 1-2 gegn Danmörku í fyrsta leik sínum og var það Líf Joostdóttir van Bemmel sem skoraði mark Íslands. Næsti leikur endaði með 0-3 tapi gegn Portúgal. Að lokum mætti Ísland Kosóvó og vann glæsilegan 5-0 sigur. Berglind Freyja Hlynsdóttir skoraði tvö mörk í leiknum og þær Ragnheiður Þórunn Jónsdóttir, Freyja Stefánsdóttir og Karlotta Björk Andradóttir sitt markið hver. Með sigrinum tryggði Ísland sér áframhaldandi veru í A deild undankeppninnar og mætir þar Danmörku, Finnlandi og Serbíu dagana 12.-18. apríl. Riðillinn verður leikinn í Serbíu. 

Fyrsta verkefni liðsins á árinu var seinni umferð undankeppni EM 2025. Þar mætti liðið Danmörku, Ungverjalandi og Austurríki, en leikið var í Ungverjalandi. Ísland tapaði öllum þremur leikjunum, 0-2 gegn Danmörku, 1-3 gegn Austurríki og 0-1 gegn Ungverjalandi. Daði Berg Jónsson skoraði mark Íslands gegn Austurríki. 

Ísland mætti Englandi í vináttuleik 6. júní á St. Georges Park á Englandi og lauk þeim leik með 1-3 tapi. Davíð Helgi Aronsson skoraði mark Íslands. 

Liðið fór á æfingamót í Slóveníu í byrjun september og lék þar þrjá leiki. Ísland tapaði 1-2 gegn Aserbaísjan í fyrsta leik sínum á mótinu þar sem Jónatan Guðni Arnarsson skoraði mark Íslands. Næst vannst 2-1 sigur á Sameinuðu arabísku furstadæmunum og voru það Gunnar Orri Olsen og Daniel Ingi Jóhannesson sem skoruðu mörkin. Ísland mætti svo Kasakstan í síðasta leik sínum mótinu og vann þar 4-1 sigur. Jónatan Guðni Arnarsson skoraði tvö mörk og þeir Daniel Ingi Jóhannesson og Tómas Óli Kristjánsson sitt markið hvor. 

Um miðjan nóvember tók Ísland þátt í fyrri umferð undankeppni EM 2026 og var í riðli með Rúmeníu, Finnlandi og Andorra. Riðillinn var leikinn í Rúmeníu. Ísland tapaði 2-3 gegn Finnlandi í fyrsta leiknum þar sem Daniel Ingi Jóhanesson og Viktor Bjarki Daðason skoruðu mörkin. Góður 3-0 sigur vannst á Andorra í næsta leik þar sem Gunnar Orri Olsen skoraði tvö mörk og Viktor Bjarki Daðason eitt. Lokaleikurinn var svo gegn Rúmeníu og tapaðist hann 0-3. 

Ísland fór því ekki áfram í seinni umferð undankeppni EM 2026. UEFA hefur nú gert breytingar á fyrirkomulagi undankeppni EM í þessum aldursflokki. Í stað tveggja umferða verða nú leiknar þrjár umferðir í undankeppninni og hefst sú fyrsta í mars. Ísland hefur þar leik í B deild og mætir Svartfjallalandi og Georgíu. Riðillinn verður leikinn í Georgíu dagana 3.-9. júni. Það lið sem endar í fyrsta sæti riðilsins kemst upp í A deild undankeppninnar fyrir næstu umferð. 

Ísland tók þátt í æfingamóti í Portúgal í lok janúar og mætti þar Portúgal, Danmörku og Wales. Fyrsti leikurinn var gegn Portúgal og vannst þar 2-1 sigur með mörkum frá Rebekku Sif Brynjarsdóttur og Elísu Bríeti Björnsdóttur. Boðið var upp á mikinn markaleik í viðureign liðsins gegn Danmörku sem lauk með 3-5 tapi. Fanney Lísa Jóhannesdóttir skoraði tvö mörk og Thelma Karen Pálmadóttir eitt. Ísland lauk mótinu á góðum 3-0 sigri á Wales með tveimur mörkum frá Rebekku Sif Brynjarsdóttur og einu frá Thelmu Karen Pálmadóttur. 

Mótið í Portúgal var liður í undirbúningi liðsins fyrir seinni umferð undankeppni EM 2025. Ísland var þar í riðli með Spáni, Úkraínu og Belgíu og var riðillinn leikinn á Spáni. Ísland tapaði öllum þremur leikjum sínum í riðlinum og því ljóst að liðið myndi hefja undankeppni EM 2026 í B deild. Fyrsti leikurinn endaði með 2-3 tapi gegn Belgíu og skoruðu Rebekka Sif Brynjarsdóttir og Thelma Karen Pálmadóttir mörkin. Naumt 0-1 tap gegn Spáni fylgdi í næsta leik áður en liðið tapaði 1-2 gegn Úkraínu í síðasta leik sínum. Fanney Lísa Jóhannesdóttir skoraði markið í þeim leik. 

Ísland fór á þriggja liða æfingamót í Portúgal í lok september og vann þar báða leiki sína. Fyrst var það 4-1 sigur gegn Wales þar sem Björgey Njála Andreudóttir, Hafrún Birna Helgadóttir, Ásthildur Lilja Atladóttir og Bríet Fjóla Bjarnadóttir skoruðu mörk Íslands. Seinni leikur liðsins var svo gegn Portúgal og vannst þar 1-0 sigur með marki frá Elísu Birtu Káradóttur. 

Fyrri umferð undankeppni EM 2026 var leikinn í nóvember í Slóveníu þar sem Ísland mætti Slóveníu og Færeyjum. Ísland vann 6-2 sigur á Færeyjum þar sem Anika Jóna Jónsdóttir skoraði tvö mörk og þær Elísa Birta Káradóttir, Ingibjörg Magnúsdóttir og Bríet Fjóla Bjarnadóttir sitt markið hver. Eitt mark var sjálfsmark Færeyja. Góður 3-0 sigur vannst svo gegn Slóveníu í seinni leik liðsins með mörkum frá Önnu Heiðu Óskarsdóttur, Hafrúnu Birnu Helgadóttur og Ingibjörgu Magnúsdóttur. Því er ljóst að Ísland leikur í A deild í seinni umferð undankeppninnar. Þar er Ísland í riðli með Frakklandi, Austurríki og Serbíu og verður riðilinn leikinn í Serbíu dagana 14.-20. mars. 

Ísland var í riðli með Belgíu, Írlandi og Póllandi í seinni umferð undankeppni EM 2025 sem leikinn var í Póllandi. Liðið mætti Póllandi í fyrsta leik og gerði þar 1-1 jafntefli, en Tómas Óli Kristjánsson skoraði mark Íslands. Næst mætti liðið Belgíu og tapaði þar 1-2. Egill Orri Arnarsson skoraði mark Íslands. Ísland tapaði svo 0-5 fyrir Írlandi í síðasta leik sínum í riðlinum. 

Liðið tók þátt í Telki Cup í Ungverjalandi í ágúst og mætti þar Ungverjalandi, Írlandi og Tyrklandi. Liðið hóf leik með markalausu jafntefli gegn Ungverjum, en vann svo 2-1 sigra gegn Írlandi og Tyrklandi. Róbert Agnar Daðason og Aron Daði Svavarsson skoruðu mörkin gegn Írlandi og Mattías Kjeld og Aron Daði Svavarsson gegn Tyrklandi. 

Fyrri umferð undankeppni EM 2026 var leikin í lok október og mætti Ísland þar Georgíu og Grikklandi, en leikið var í Georgíu. Ísland vann þar frábæran 5-1 sigur á Georgíu þar sem Alexander Máni Guðjónsson skoraði tvö mörk og þeir Alexander Rafn Pálmason, Þorri Ingólfsson og Bjarki Hrafn Garðarsson sitt markið hver. Ísland vann svo 4-3 sigur á Grikklandi og tryggði sér þar með sæti í A deild fyrir fyrri umferð undankeppni EM 2026. Alexander Máni Guðjónsson skoraði þrennu og Bjarki Hrafn Garðarsson eitt mark. 

Ísland dróst þar í riðil með Portúgal, Ítalíu og Rúmeníu, en riðilinn fer fram á Ítalíu dagana 25.-31. mars. 

Ísland og Færeyjar mættust tvívegis í vináttuleikjum í Miðgarði í Garðabæ. Fyrri leikurinn fór fram 31. janúar og vann Ísland 6-0 sigur. Hafdís Nína Elmarsdóttir skoraði þrennu og þær Kara Guðmundsdóttir, Anna Katrín Ólafsdóttir og Elísabet María Júlíusdóttir sitt markið hver. Liðin mættust aftur 2. febrúar og vann Ísland þá 7-0 sigur. Ásthildur Lilja Atladóttir skoraði tvívegis og þær Björgey Njála Andreudóttir, Anna Katrín Ólafsdóttir, Elísabet María Júlíusdóttir, Kara Guðmundsdóttir og Sara Kristín Jónsdóttir einu sinni hver. 

Ísland tók þátt í UEFA Development Tournament í lok apríl og byrjun maí sem leikið var í Eistlandi. Ísland vann alla þrjá leiki sína, 3-0 gegn Slóvakíu, 6-0 gegn Eistlandi og 3-1 gegn Kosóvó. Hafrún Birna Helgadóttir og Ingibjörg Magnúsdóttir skoruðu gegn Slóvakíu ásamt því að eitt mark var sjálfsmark Slóvaka. Bríet Fjóla Bjarnadóttir og Kara Guðmundsdóttir skoruðu báðar tvisvar gegn Eistlandi ásamt því að Arna Ísold Stefánsdóttir og Rebekka Sif Brynjarsdóttir skoruðu eitt mark hvor. Gegn Kosóvó voru það Anna Heiða Óskarsdóttir, Rebekka Sif Brynjarsdóttir og Eva Marín Sæþórsdóttir sem skoruðu mörkin. 

Ísland tók þátt í UEFA Development Tournament í byrjun maí sem leikið var í Svíþjóð. Ísland vann Sviss 2-0 í fyrsta leik sínum á mótinu með mörkum frá Birki Þorsteinssyni og Aroni Daða Svavarssyni. Ísland mátti þola þungt 0-5 tap gegn Svíþjóð í næsta leik, en endaði svo mótið með 1-1 jafntefli gegn Tékklandi þar sem Þór Andersen Willumsson skoraði mark Íslands. 

Seinna verkefni liðsins á árinu var æfingamót í Finnlandi í lok september. Ísland átti þar gott mót, vann sigra gegn Eistlandi, 4-2, og Norður Írlandi, 3-2, ásamt því að gera 1-1 jafntefli við Finnland. Arnar Bjarki Gunnleifsson skoraði tvö mörk gegn Eistlandi og þeir Benjamín Björnsson og Bjarki Örn Brynjarsson sitt markið hvor. Sigurður Nói Jóhannsson, Bjarki Örn Brynjarsson og Aron Kristinn Zumbergs skoruðu mörkin gegn Norður Írlandi og svo var það Magnús Daði Ottesen sem skoraði markið gegn Finnlandi. 

Verkefni ársins hjá U15 kvenna var UEFA Development Tournament sem leikið var á Englandi í lok nóvember. Ísland tapaði 1-2 gegn Englandi og 0-1 gegn Þýskalandi, en vann 2-1 sigur gegn Tyrklandi. Karen Dís Vigfúsdóttir skoraði mark Íslands gegn Englandi og Ólöf Margrét Marvinsdóttir og Margrét Viktoría Harðardóttir gegn Tyrklandi. 

Ísland tók þátt í UEFA Development Tournament sem leikið var á Englandi. Mótherjar Íslands voru í sterkari kantinum, England, Ítalía og Spánn. Ísland tapaði 0-7 gegn Englandi og 0-11 gegn Spáni, en gerði 1-1 jafntefli við Ítalíu þar sem Guðmundur Þórðarson skoraði mark Íslands. 

Breiðablik og Valur tóku þátt í forkeppni Meistaradeildarinnar, Breiðablik sem Íslandsmeistari og Valur eftir að hafa lent í 2. sæti á Íslandsmótinu sumarið 2024. Breiðablik vann 3-1 sigur gegn Athlone Town í fyrstu umferðinni á meðan Valur tapaði 1-3 gegn Braga. Breiðablik tapaði seinni leiknum í undankeppninni gegn Twente, 0-2, og var því úr leik. Í ljósi þess að liðið vann leikinn gegn Athlone Town þá færðist það yfir í nýja Evrópukeppni félagsliða, Evrópubikarinn. Valur mætti Inter Milan í seinni leik sínum, tapaði 1-4 og var úr leik þetta sumarið. 

Í fyrsta sinn var leikið í nýrri Evrópukeppni félagsliða kvennamegin og færðist Breiðablik þangað í ljósi árangurs síns í Meistaradeildinni. Breiðablik kom inn í aðra umferð forkeppninnar og mætti þar Spartak Subotica frá Serbíu. Fyrri leikurinn fór fram á Kópavogsvelli og vann Breiðablik leikinn 4-0. Seinni leikur liðanna fór fram viku síðar í Serbíu og lauk með 1-1 jafntefli. Breiðablik mætti Fortuna Hjorring frá Danmörku í 16-liða úrslitum. Liðin mættust í fyrri viðureign sinni á Kópavogsvelli og unnu Danirnir 1-0 sigur. Liðin mættust í Danmörku viku síðar og vann Breiðablik þar dramatískan 4-2 sigur. Breiðblik lenti 2-0 undir en komu til baka og jöfnuðu metin í viðureigninni með marki á sjöundu mínútu í uppbótartíma. Liðið skoraði svo sigurmarkið í seinni hálfleik framlengingarinnar. Breiðablik mætti BK Häcken frá Svíþjóð í 8-liða úrslitum. Fyrri leikur liðanna fór fram í Svíþjóð og endaði með 0-7 tapi. Seinni leikurinn fór svo fram viku síðar á Kópavogsvelli og lauk honum með 1-4 tapi og samanlagt 1-11 tap í viðureigninni því staðreynd.

Breiðablik hóf leik í forkeppni Meistarardeildarinnar gegn Egnatia frá Albaníu. Fyrri leikurinn fór fram í Albaníu og lauk með 1-0 sigri Egnatia. Blikar léku á alls oddi í seinni leik liðanna og vann þar frábæran 5-0 sigur. Næstu andstæðingar voru Lech Poznan frá Póllandi. Fyrri leikurinn fór fram í Póllandi og töpuðu Blikar þeim leik 1-7. Seinni leikurinn sem fór fram á Kópavogsvelli lauk með 1-0 sigri pólska liðsins og því ljóst að Breiðablik væri úr leik í Meistaradeildinni. 

Breiðablik færðist yfir í Evrópudeild UEFA eftir tapið gegn Lech Poznan. Þar mættu Blikar Zrinjski frá Bosníu og Hersegóvínu. Fyrri leikurinn fór fram í Bosníu og lauk með 1-1 jafntefli. Liðin mættust aftur viku síðar á Kópavogsvelli og lauk sá leikur með svekkjandi 1-2 tapi. 

Víkingur R., Valur, KA og Breiðablik tóku þátt í Sambandsdeild UEFA. Víkingur R. og Valur hófu leik í fyrstu umferð forkeppninar. Víkingar mættu Melisheva frá Kosóvó og Valur mætti Flora Tallin frá Eistlandi. Bæði liðin fóru áfram, Víkingar með því að vinna 0-1 ytra og 8-0 heima og Valur með 3-0 sigri heima og 2-1 sigri ytra.  

KA kom inn í keppnina í annarri umferð forkeppninnar sem bikarmeistarar. Þar mættu þeir Silkeborg frá Danmörku. Með frábærri frammistöðu í fyrri leiknum í Danmörku náði liðið í 1-1 jafntefli. Liðið var nálægt því að komast áfram, en tapaði að lokum 2-3 í seinni leiknum eftir framlengingu. Valur mætti Kauno Zalgiris frá Litháen og gerði 1-1 jafntefli í fyrri leiknum sem leikinn var ytra. Valsmönnum tókst ekki að nýta góð úrslit í fyrri leiknum og töpuðu seinni leiknum á heimavelli 1-2. Víkingur R. mætti KF Vllaznia frá Albaníu. Fyrri leikurinn endaði með 1-2 tapi, en sá síðari með 4-2 sigri Víkinga eftir framlengingu og liðið því komið áfram í þriðju umferð forkeppninnar. 

Víkingur R. mætti danska stórliðinu Bröndby í þriðju umferðinni og tókst að vinna fyrri leikinn á Víkingsvelli 3-0. Þrátt fyrir þessa frábæru frammistöðu tókst liðinu ekki að slá út Bröndby, en Danirnir unnu seinni leikinn 4-0 og Víkingar því úr leik. 

Í ljósi árangurs Breiðabliks í Meistaradeildinni og Evrópudeildinni kom liðið inn beint í umspil Sambandsdeildarinnar. Þar mættu Blikar Virtus frá San Marínó. Fyrri leikurinn liðanna fór fram á Kópavogsvelli þar sem Breiðablik vann 2-1 sigur. Breiðablik vann einnig seinni leikinn, 3-1, og tryggði sér með því sæti í deildarkeppni Sambandsdeildarinnar. 

Breiðablik hóf leik í deildarkeppninni þegar liðið tapaði 0-3 gegn Lausanne-Sport frá Sviss. Heimaleikir liðsins í deildarkeppninni fóru fram á Laugardalsvelli og var finnska liðið KuPS Kuopio fyrsta liðið til að heimsækja völlinn þetta haustið. Leikurinn var nokkuð bragðdaufur og endaði með markalausu jafntefli. Næsti mótherji var úkraínska stórliðið Shahktar Donetsk og endaði leikurinn með 0-2 tapi Blika. Samsunspor með Loga Tómasson innanborðs voru næstu mótherjar liðsins á Laugardalsvelli og með frábærri frammistöðu nældu Blikar í 2-2 jafntefli. Fyrsti sigur liðsins í keppninni leit svo dagsins ljós í næsta leik í 3-1 sigri gegn Shamrock Rovers á Laugardalsvelli. Því var ljóst að Breiðablik átti enn möguleika á að komast áfram í næstu umferð þegar þeir mættu Strasbourg í lokaumferðinni. Til þess þurftu Blikar góð úrslit, en ekki tókst það í þetta sinn og 1-3 tap staðreynd.

Ísbjörninn tók þátt í Evrópukeppni félagsliða í Futsal þar sem þeir voru ríkjandi Íslandsmeistarar. Ísbjörninn var í riðli með Tigers Roermond frá Hollandi, Vllaznia frá Albaníu og Bajo Pivljanin frá Svartfjallalandi. Ísbjörninn tapaði öllum sínum leikjum og endaði í neðsta sæti riðilsins með markatöluna 9-26. 

Leikjum fækkaði um 201 milli ára, en þrátt fyrir það var heildarfjöldi leikja árið 2025 sá næst fjölmennasti í sögu KSÍ. Mest var fækkun leikja í 5. flokki karla og kvenna.

Taflan hér að neðan veitir helstu upplýsingar um leikjafjölda árið 2025 og samanburð við árin á undan.

Fimm ný lið tilkynntu þátttöku í meistaraflokki karla. Fálkarnir úr Reykjavík er nýtt félag og hófu eftirfarandi félög þátttöku aftur eftir nokkurra ára fjarveru: Einherji á Vopnafirði, Hamrarnir frá Akureyri, KB í Reykjavík og Neisti á Djúpavogi.  

Í meistaraflokki kvenna bættist við eitt félag, KÞ (Kapp og Þor) frá Reykjavík. Tvö félög tilkynntu ekki þátttöku. 

Alls tók 81 félag þátt í mótum meistaraflokka karla og 32 félög í mótum meistaraflokka kvenna.  

Árið 2025 tóku 774 keppnislið aðildarfélaga þátt í mótum á vegum KSÍ, 519 lið karla og 255 lið kvenna. Þátttökuliðum kvenna fækkaði um 20 á milli ára og karlaliðum fækkaði um 4. Samtals fækkaði því keppnisliðum um 24 milli ára. Þrátt fyrir þessa fækkun liða þá er þetta næst mesti fjöldi liða frá 2019 þegar KSÍ hætti að skipuleggja mót í 6. aldursflokki.

Breiðablik varð Íslandsmeistari annað árið í röð og var sigurinn nokkuð sannfærandi í þetta skiptið. Liðið var 11 stigum á undan FH þegar deildinni var skipt í efri og neðri hluta og endaði tímabilið átta stigum á undan FH. 

Birta Georgsdóttir, leikmaður Breiðabliks, var kosin besti leikmaður deildarinnar. Hún lék 21 leik í deildinni og skoraði í þeim 18 mörk. Thelma Karen Pálmadóttir, FH, var kosin efnilegasti leikmaður deildarinnar, en hún lék alla 23 leiki FH í deildinni og skoraði í þeim átta mörk. Berglind Björg Þorvaldsdóttir var markahæsti leikmaður deildarinnar með 23 mörk. Þórður Þorsteinn Þórðarson var valinn besti dómari deildarinnar.

Í Bestu deild kvenna var best sótti leikurinn viðureign Vals og Stjörnunnar um miðjan ágústmánuð á N1 vellinum að Hlíðarenda. Alls mættu 614 áhorfendur á leikinn.

Áhorfendafjöldi

ÍBV vann sannfærandi sigur í deildinni, vann 16 leiki, gerði eitt jafntefli og tapaði einum leik. Töluverð spenna var um það hvaða lið myndi fylgja Vestmanneyingum upp í Bestu deild, en á endanum var það Grindavík/Njarðvík sem nældi í annað sætið, þó aðeins einu stigi á undan bæði HK og Gróttu. 

Breiðablik vann tvöfalt árið 2025 og tryggði sér Mjólkurbikarinn með 3-2 sigri gegn FH eftir framlengdan leik. Thelma Karen Pálmdóttir kom FH yfir á 9. mínútu, en Samantha Rose Smith jafnaði á 32. mínútu. Thelma Karen var aftur á ferðinni á 62. mínútu, en Birta Georgsdóttir jafnaði fimm mínútum síðar. Það var svo Samantha Rose Smith sem tryggði Breiðablik titilinn með marki á sjöundu mínútu fyrri hálfleiks framlengingarinnar.  

Valur vann Meistarakeppni KSÍ með 1-0 sigri gegn Breiðablik. Jasmín Erla Ingadóttir skoraði eina mark leiksins á 27. mínútu. 

Víkingur R. lyfti Íslandsmeistaratitlinum sumarið 2025. Liðið var tveimur stigum á undan Val og Stjörnunni þegar deildinni var skipt í efri og neðri hluta. Yfirburðir Víkinga voru gríðarlegir eftir það og endaði liðið að lokum 12 stigum á undan Val.  

Patrick Pedersen, Val, var valinn besti leikmaður deildarinnar. Patrick lék 19 leiki í deildinni og skoraði í þeim 18 mörk. Var hann jafnframt markahæstur á tímabilinu. Guðmundur Baldvin Nökkvason, Stjörnunni, var valinn efnilegasti leikmaðurinn. 

Best sótti leikur sumarsins 2025 í Bestu deild karla var viðureign KR og Breiðabliks á KR-velli sem leikinn var í lok júlí, þar sem voru saman komnir 3.107 áhorfendur. 

Áhorfendafjöldi

Þór stóð uppi sem sigurvegari í Lengjudeild karla og leikur því í Bestu deild karla að ári. Njarðvík, Þróttur R., HK og Keflavík tóku þátt í umspili um sæti í Bestu deildinni að ári. Keflavík sló nágranna sína í Njarðvík út í undanúrslitum á meðan HK vann sigur á Þrótti R. Það voru því Keflavík og HK sem mættust í úrslitaleik umspilsins á Laugardalsvelli. Keflavík vann þar sannfærandi 4-0 sigur og leikur því í Bestu deild karla í sumar. 

Vestri varð Mjólkurbikarmeistari í fyrsta sinn eftir 1-0 sigur á Val í úrslitaleik keppninnar. Jeppe Pedersen skoraði eina mark leiksins með glæsilegu skoti um miðjan fyrri hálfleik. Vestri leikur þvi í fyrsta sinn í sögu félagsins í Evrópukeppni félagsliða í sumar. 

Breiðablik og KA mættust í Meistarakeppni KSÍ og unnu Blikar góðan 3-1 sigur. 

Víkingur Ó. vann 2-0 sigur gegn Tindastól í úrslitaleik keppninnar. Jafnt var í hálfleik, en Víkingar komust yfir í upphafi seinni hálfleiks. Þeir bættu svo við marki á 69. mínútu og 2-0 sigur staðreynd. 

Árið 2025 var metár þegar kemur að mönnun dómarastarfa á KSÍ leiki, en þetta er fimmta árið í röð sem það gerist. Fjöldi starfa þar sem KSÍ sá um að tilnefna dómara á leiki á síðasta ári var alls 5.458. Sem dæmi um leikjamagn má nefna að algengt er að skrifstofa KSÍ raði dómurum á jafnvel hundruðir starfa í sömu viku.

Fjöldi dómarastarfa

KSÍ býður aðildarfélögum upp á þann möguleika að bóka dómaranámskeið frá KSÍ sem haldin eru hjá félögunum. Þetta fyrirkomulag hefur gefist vel og fjöldi nýrra dómara útskrifast sem unglingadómarar á ári hverju. Það er greinilegt að þörfin fyrir námskeiðin er mikil og hafa mörg félög bókað námskeið á næstu mánuðum. 

Námskeiðin eru stutt en hnitmiðuð og markmiðið með þeim er fyrst og fremst að hjálpa félögunum að búa til dómarahópa til þess að manna þá fjölmörgu leiki sem eru á þeirra ábyrgð. 

Þeir sem hafa áhuga á því að mennta sig meira í dómarafræðum sækja síðan aðstoðardómaranámskeið, dómaranámskeið og héraðsdómaranámskeið en KSÍ stendur árlega fyrir nokkrum slíkum. 

Virkum dómurum fjölgaði þónokkuð á milli ára. Árið 2025 voru 711 virkir dómarar, en þeir höfðu verið 626 árið 2024. 

Fjöldi virkra dómara

Dómarinn Bríet Bragadóttir og aðstoðardómarinn Tijana Krstic dæmdu leik HB Köge og Bröndby IF í efstu deild kvenna í Danmörku. Karlamegin dæmdi Þórður Þorsteinn Þórðarson ásamt aðstoðardómaranum Bergi Daða Ágústssyni leik B93 og Kolding í næstefstu deild í Damörku. Gunnar Oddur Hafliðason dæmdi leik Skála og KÍ í Færeyjum ásamt aðstoðardómaranum Guðmundi Inga Bjarnasyni.

Milos Petrovic var ráðinn þrekþjálfari dómara í febrúar. Milos er yfirmaður rannsóknar- og íþróttamiðstöðvar Íslands við Háskóla Íslands. Mikil ánægja er í landsdómarahópnum með störf Milosar.  

Fjölbrautaskóli Suðurlands bauð upp á dómaraáfanga á haustönn árið 2025. Gunnar Jarl Jónsson hafði umsjón með framkvæmdinni. 11 nemendur tóku þátt í áfanganum, en stefnt er að því að bjóða upp á fleiri áfanga á næstu árum. 

Íslenskir dómarar voru á faraldsfæti á árinu og dæmdu víða erlendis í keppnum á vegum UEFA. Það voru bæði dómarar og aðstoðardómarar sem störfuðu erlendis og hér að neðan má sjá lista yfir þá: 

Birkir Sigurðarson var aðstoðardómari í Sambandsdeildinni, undankeppni EM hjá U21 karla og í Evrópudeildinni. 

Bríet Bragadóttir dæmdi í undankeppni EM hjá U17 og U19 kvenna og í Meistaradeild kvenna.

Egill Guðvarður Guðlaugsson var aðstoðardómari í Unglingadeild UEFA, í undankeppni EM hjá U19 karla og í Sambandsdeildinni.

Eysteinn Hrafnkelsson var aðstoðardómari í Unglingadeild UEFA, í Sambandsdeildinni og í undankeppni EM hjá U19 kvenna.

Guðmundur Ingi Bjarnason var aðstoðardómari í Unglingadeild UEFA. 

Gunnar Oddur Hafliðason var fjórði dómari í Sambandsdeildinni. 

Gylfi Már Sigurðarson var aðstoðardómari í Sambandsdeildinni, í undankeppni EM hjá U21 karla og í Evrópudeildinni. 

Helgi Mikael Jónasson dæmdi í Unglingadeild UEFA, undankeppni EM hjá U19 karla og var fjórði dómari í undankeppni EM hjá U21 karla og í Sambandsdeildinni.

Ívar Orri Kristjánsson dæmdi í undankeppni EM hjá U21 karla, Sambandsdeildinni og í Evrópudeildinni. 

Jóhann Ingi Jónsson dæmdi í undankeppni EM hjá U21 karla, í Sambandsdeildinni, í Unglingadeild UEFA og var fjórði dómari í Sambandsdeildinni.

Kristján Már Ólafs var aðstoðardómari í Unglingadeild UEFA og í Sambandsdeildinni.

Ragnar Þór Bender var aðstoðardómari í undankeppni EM hjá U21 karla, í Unglingadeild UEFA og í Sambandsdeildinni.

Tijana Krstic var aðstoðardómari í undankeppni EM hjá U17 kvenna.

Vilhjálmur Alvar Þórarinsson dæmdi í Sambandsdeildinni og var fjórði dómari í Sambandsdeildinni og í Evrópudeildinni.

Þórður Þorsteinn Þórðarson var fjórði dómari í Sambandsdeildinni.

Egill Már Markússon var að störfum sem eftirlitsmaður í Evrópudeildinni.

Gunnar Jarl Jónasson var að störfum sem eftirlitsmaður í undankeppni HM karla og í Sambandsdeildinni.

Gylfi Þór Orrason var að störfum sem eftirlitsmaður í Meistaradeild karla, í undankeppni HM karla, í Evrópudeildinni og í Sambandsdeildinni. 

Kristinn Jakobsson var að störfum sem eftirlitsmaður í undankeppni HM karla og í Sambandsdeildinni.

Þóroddur Hjaltalín var að störfum sem eftirlitsmaður í undankeppni HM karla, í Sambandsdeildinni og í Meistaradeildinni.

Þórður Þorsteinsson Þórðarson er dómari ársins í Bestu deild kvenna samkvæmt niðurstöðu úr árlegri kosningu leikmanna deildarinnar. Þórður, sem var leikmaður um árabil með ÍA, FH og HK áður en hann sneri sér að dómgæslu, var einnig kosinn dómari ársins í Bestu deild kvenna árin 2022 og 2023. 

Ívar Orri Kristjánsson er dómari ársins í Bestu deild karla samkvæmt niðurstöðu úr árlegri kosningu leikmanna deildarinnar. 

Dagana 23 og 24. apríl sátu Þóroddur Hjaltalín og Vilhjálmur Alvar Þórarinsson VAR ráðstefnu hjá UEFA. 

Ráðstefnuna sátu aðildarþjóðir UEFA og var tilgangur hennar að bera saman VAR milli landa og ná betri samræmingu í notkun VAR - dómgæslu. 

Einnig var farið yfir hvernig best er að útskýra VAR - dómgæslu fyrir öllum þátttakendum fótboltans s.s. leikmönnum, þjálfurum, fjölmiðlafólki og stuðningsmönnum. Roberto Martinez, landsliðsþjálfari Portúgals, André Martins, fyrrverandi landsliðsmaður Portúgal, og Stephanie Frappart, FIFA dómari flutta ásamt öðrum erindi á ráðstefnunni. 

Í lok árs 2025 útskrifaði KSÍ hóp þjálfara með KSÍ Pro þjálfaragráðu. Sautján þjálfarar sátu námskeiðið og er þetta þriðji hópurinn sem KSÍ útskrifar með þessa gráðu. 

Nordic Football Research Conference 

KSÍ stóð fyrir veglegri ráðstefnu í lok maí, í samstarfi við hin Norðurlöndin ásamt Háskólanum í Reykjavík. Ráðstefnan bar nafnið Nordic Football Research Conference fór fram í HR og stóð yfir tvo daga. Þetta er í annað skiptið sem ráðstefnan er haldin, en sú fyrst fór fram í Helsinki 2022. Stefnt er að því að næsta ráðstefna verði í Odense í Danmörku, 2027.  

Markmannsskóli KSÍ á Selfossi 

Markmannsskóli KSÍ var haldinn á Selfossi helgina 2.-4. janúar 2026 og æfðu þar 50 markmenn fæddir árið 2012. 

Fjalar Þorgeirsson, yfirmarkmannsþjálfari yngri landsliða, stjórnaði æfingunum og fengu markmennirnir handleiðslu markmannsþjálfaranna á fjórum æfingum. Alls tóku, ásamt Fjalari, sjö markmannsþjálfarar þátt í æfingunum. 

Markmennirnir, sem komu alls staðar að af landinu, komu frá eftirfarandi félögum: Afturelding, Breiðablik, FH, Fram, Grótta, Hamar, Haukar, HK, Höttur, ÍA, ÍBV, ÍR, Keflavík, KR, Njarðvík, RKVN, Selfoss, Sindri, Stjarnan, Tindastóll, Uppsveitir, Valur, Víkingur Ó, Völsungur, Þór, Þróttur R. 

Þjálfararáðstefna 

Þann 24. janúar 2026 fór fram vegleg þjálfararáðstefna í höfuðstöðvum KSÍ. Um 104 gestir mættu á ráðstefnuna.  

Dagurinn hófst með fyrirlestri frá Kasper Kurland, yfirþjálfara kvennastarfs FC Nordsjælland í Danmörku, sem fór yfir hugmyndafræði félagsins. Sigurður Skúli Benediktsson, doktorsnemi við Háskóla Íslands, fór næst yfir niðurstöður úr SKORA rannsókninni, rannsókn á 12 ára knattspyrnustúlkum. Því næst fór Ólafur Kristjánsson, aðstoðarþjálfari A-landsliðs kvenna, yfir það hvort að stelpur ættu að æfa með strákum, hvernig staðan er á Íslandi og hvernig hún er annars staðar í Evrópu. 

Eftir hádegismat var Lára Hafliðadóttir, doktorsnemi í HR og starfsmaður á vísindasviði KSÍ, með erindi um álag og þreytu hjá íslenska landsliðinu á EM 2025, samanburð við aðrar þjóðir, yngri landslið Íslands og lið í Bestu deild kvenna. Að lokum var Þorsteinn Halldórsson, landsliðsþjálfari A-landsliðs kvenna, með uppgjör á EM 2025. 

Yfirþjálfarafundur 

KSÍ hélt árlegan yfirþjálfarafund í höfuðstöðvum KSÍ í Laugardalnum fimmtudaginn 25. september 2025. 

Á fundinum var farið yfir landsliðsmál þar sem Davíð Snorri Jónasson, aðstoðarþjálfari A landsliðs karla, fór yfir hvernig æfingalota yngri landsliða er útfærð. Þórhallur Siggeirsson, þjálfari U19 karla, sagði frá því hvernig undirbúningur landsliðsglugga fer fram og hvernig unnið er inni í landsliðsglugga. 

Birkir Sveinsson, mótastjóri KSÍ, fór yfir mótamál yngri flokka sem og dómaramál yngri flokka. 

Fræðsluviðburðir vegna COMET 

Nýtt mótakerfi KSÍ, COMET, var tekið í notkun í lok árs 2025. Til að kynna kerfið hélt KSÍ fræðsluviðburði fyrir félög og starfsmenn þeirra. Tíu viðburði voru haldnir í höfuðstöðvum KSÍ, 13 viðburðir voru haldnir hjá félögunum og einn á Teams.  

Árið 2023 birti Knattspyrnusamband Íslands nýja stefnu um samfélagsleg verkefni sem gildir til ársins 2026 og er hún hluti af heildarstefnumótun KSÍ. KSÍ lítur á það sem skyldu sína að nýta þann kraft sem býr í knattspyrnufjölskyldunni til að vera virkur þátttakandi í samfélagslegum verkefnum sem gera raunverulegt og áþreifanlegt gagn. 

Stefna KSÍ í samfélagslegum verkefnum 

Jafnrétti innan KSÍ 

Jafnréttisstefna og jafnréttisáætlun KSÍ var í gildi út árið 2025.  

Markmiðið með jafnréttisstefnunni var að allt jafnréttisstarf innan knattspyrnuhreyfingarinnar yrði markvisst og skipulagt ferli sem fléttaðist inn í alla þætti knattspyrnunnar. Þannig er öllum knattspyrnuiðkendum gert kleift að stunda íþrótt sína og ná árangri án ytri breyta. Knattspyrnuhreyfingin á að vera hreyfing sem gætir að hag allra sem innan hennar leika og starfa. 

Í tengslum við jafnréttisstefnu KSÍ hefur sambandið sett upp jafnréttisverklag varðandi myndaval, fréttaskrif og almenna birtingu efnis á miðlum KSÍ. Verklaginu er lýst á vef KSÍ og er það hluti af samskiptastefnu KSÍ og heildarverklagi fyrir miðla KSÍ (vef og samfélagsmiðla) og annað útgefið efni. 

Í jafnréttisáætluninni er tiltekið hvernig sambandið hyggst tryggja starfsfólki sínu þau réttindi sem tilgreind eru í 6.-14. grein laga nr. 150/2020 um jafna stöðu og jafnan rétt kvenna og karla. Þar að auki eru lög nr. 86/2018 höfð til hliðsjónar en í þeim kveður á um ban við allri mismunun fólks á vinnumarkaði á grundvelli kynþáttar, þjóðernisuppruna, trúar, lífsskoðunar, fötlunar, skertrar starfsgetu, aldurs, kynhneigðar, kynvitundar, kyneinkenna eða kyntjáningar. 

Til stendur að uppfæra jafnréttisstefnu og jafnréttisáætlun KSÍ. Þær sem runnu út um áramótin er þó enn hægt að nálgast á vef KSÍ. 

Komdu í fótbolta með Mola 

Verkefni Komdu í fótbolta með Mola fór fram sjöunda sumarið í röð, sumarið 2025, og var eitt af stærstu grasrótarverkefnum KSÍ á árinu. Siguróli Kristjánsson, betur þekktur sem Moli, var sem fyrr umsjónarmaður verkefnisins. Moli heimsótti 37 staði og hitti um 630 börn. Markmiðið með verkefninu er að efla áhuga iðkenda á knattspyrnu og styðja við knattspyrnustarfið á hverjum stað fyrir sig. KSÍ kann bestu þakkir þeim sveitarfélögum sem tóku vel á móti Mola.  

Í heimsóknum sínum notar Moli lítinn völl sem kallast pannavöllur. Vinsældir vallanna eru nokkrar og voru 15 vellir pantaðir af félögum og sveitarfélögum af öllu landinu. UMFÍ og KSÍ héldu utan um pantanirnar og komu völlunum til síns heima í desember. 

Háttvísisviðurkenningar Landsbankans 

Háttvísisviðurkenningum Landsbankans og KSÍ var úthlutað í sumar. Öllum félögum sem skipuleggja mót í yngri flokkum bauðst að fá viðurkenningar til afhendingar. Árið 2025 afhentu félögin 56 viðurkenningar á 23 mótum um allt land. Mótin sem afhentu háttvísiverðlaunin eru frá 8. flokki upp í 3. flokk í karla og kvenna flokki. 

Sjónlýsing á landsleikjum á Laugardalsvelli 

Samstarf KSÍ, Blindrafélagsins og Samtaka íþróttafréttamanna hélt áfram á árinu. Með samstarfinu er boðið upp á sjónlýsingu á landsleikjum A landsliða Íslands sem fara fram á Laugardalsvelli. Árið 2025 fóru fjórir A landsleikir fram á Laugardalsvelli, þrír hjá A landsliði karla og einn hjá A landsliði kvenna. Á þessa fjóra leiki voru samtals 127 notendur sem nýttu sér þjónustuna. Þjónustan er aðgengileg hverjum sem er í smáforriti og á netinu, sama hvort viðkomandi sé á leiknum eða í sófanum heima. 

Allir með leikarnir 

Allir með leikarnir voru haldnir í Laugardalshöll þann 8. Nóvember. Knattspyrna var ein af íþróttunum sem boðið var upp á á leikunum. Markmiðið með viðburðinum er að bjóða fötluðum börnum að prufa hinar ýmsu íþróttir. Allir með leikarnir er hluti af verkefninu Allir með sem er með það markmið að fjölga tækifærum fatlaðra barna til íþróttaiðkunar. 

Ungmennaráð KSÍ 

Ungmennaþing KSÍ fór fram í maí 2025. Þingið var fyrir ungmenni fædd 2005-2012 og mættu um 70 ungmenni af öllu landinu. Ungmennaráð KSÍ sá um undirbúning þingsins sem var hið glæsilegasta. Þrjú aðalumræðuefni þingsins voru ofþjálfun, konur í fótbolta og jákvæðar og neikvæðar hliðar fótboltans. Líkt og undanfarin ár mættu góðir gestir til að taka þátt í umræðum. Lára Hafliðadóttir starfsmaður á vísindasviði KSÍ var með erindi um ofþjálfun, þá var Helga Helgadóttir varaformaður KSÍ með erindi um konur í fótbolta og að lokum mætti Hreiðar Haraldsson, hugarþjálfari frá Haus, og ræddi um jákvæðar og neikvæðar hliðar íþrótta. Hópurinn fór einnig í stutta skoðunarferð um Laugardalsvöll og var einn af hápunktunum þegar Arnar Gunnlaugsson og Þorsteinn Halldórsson sátu fyrir svörum um þjálfun, landsliðsumhverfið og allt annað sem viðkemur fótbolta. Að loknu þingi var gestum boðið að bjóða sig fram í ungmennaráð KSÍ. Fjöldi umsókna barst og voru sex ný tekin inn í ráðið. Nýtt ungmennaráð er því skipað 17 ungmennum. Í mars 2026 verður næsta ungmennaþing KSÍ haldið. 

“Það er til hjálp” 

Nýjasta samfélagsverkefni KSÍ er samstarfsverkefni með SÁÁ sem ber yfirskriftina „Það er til hjálp“. Með verkefninu er ætlað að vekja athygli á spilavanda og hvetja þau sem á þurfa að halda að leita sér viðeigandi aðstoðar. KSÍ og SÁÁ leggja áherslu á að öll geti leitað sér hjálpar og ráðgjafar, hvort sem um er að ræða leikmenn, þjálfara, dómara, aðstandendur eða almennt áhugafólk um knattspyrnu. 

Verkefnið á vef KSÍ

Fundur barna- og unglingaráða 

Í janúar 2026 hélt KSÍ fund fyrir meðlimi í barna- og unglingaráðum félaga, yfirþjálfara og aðra sem koma að yngri flokka starfi félaganna. Góð mæting var á fundinn en 38 manns mættu frá 17 félögum.  

Aðal markið fundarins var að búa til sameiginlegan vettvang þar sem fólk gat rætt málin, speglað sín mál og gefið góð ráð.  

Eysteinn Pétur Lárusson, framkvæmdastjóri KSÍ, ræddi um strúktúr félaga, hlutverk barna- og unglingaráða og starfið almennt. Jörundur Áki Sveinsson, sviðsstjóri Afrekssviðs KSÍ, talaði um afreksstarf félaganna og Íris Elíasdóttir, formaður barna- og unglingaráðs ÍR fór yfir fjármál í yngri flokka starfi. 

Hér má nálgast efni fyrir barna- og unglingaráð á vef KSÍ. 

Göngubolti 

Vinsældir göngubolta hafa aukist á Íslandi á árinu og hefur KSÍ reynt að bregðast við vinsældunum. Rúnar Már Sverrisson, meðlimur í grasrótarnefnd KSÍ, hélt kynningu um göngubolta og fótboltafitness á teams í janúar 2026. Áður hafði Rúnar haldið kynningu á íþróttinni hjá Aftureldingu og Víði/Reyni. Á landsmóti UMFÍ 50+ sem haldið verður á norðurlandi í sumar mun Rúnar Már vera með kynningu á göngubolta og setja upp leiki. 

Göngubolti á vef KSÍ

“Veðmál, íþróttir og samfélagið - hvert stefnum við?” 

Húsfyllir var á málþinginu “Veðmál, íþróttir og samfélagið – hvert stefnum við?”, sem haldið var í höfuðstöðvum KSÍ í maí 2025.  Það voru ÍSÍ, UMFÍ, ÍBR og KSÍ sem buðu til málþingsins, sem var sérstaklega ætlað íþróttahreyfingunni á Íslandi og voru fulltrúar íþróttafélaga, stjórnarmenn, þjálfarar, leikmenn, dómarar, sjálfboðaliðar og aðrir áhugasamir hvattir til að mæta (eða fylgjast með í streymi) og kynna sér þetta mikilvæga mál. 

Á málþinginu var fjallað um ýmislegt tengt veðmálum og áhrifum þeirra á íþróttahreyfinguna og samfélagið, m.a. um erlendar veðmálasíður sem verða sífellt fyrirferðameiri, um ábyrga spilun, um spilavanda og spilafíkn, hagræðingu úrslita, fræðslu til leikmanna, forvarnir og fleira.  Fjölmargar kynningar voru á málþinginu þar sem viðfangsefnið var nálgast frá ýmsum hliðum. Kristjana Arnarsdóttir verkefnastjóri kynningarmála hjá ÍSÍ stýrði málþinginu og Ingvar Sverrisson formaður ÍBR fór með lokaorð. 

Í stefnumótun KSÍ fyrir árin 2023-2026, „Frá grasrót til stórmóta“, er fjallað um helstu þætti starfs og verkefna KSÍ á því árabili. Stefnumótunin var unnin með stuðningi UEFA Grow, sem hefur aðstoðað um 40 knattspyrnusambönd í Evrópu í þeirra stefnumótunarvinnu.

Lögð var áhersla á að sýna fram á hvernig hinir ýmsu þættir íslenskrar knattspyrnu tengjast og styðja við hvern annan - grasrótarstarfið og afreksstarfið, félagsliðin og landsliðin, aðildarfélögin og KSÍ - og hvernig hægt er að gera sem flestum kleift að vera þátttakendur í knattspyrnuhreyfingunni.

Inntakið í „Frá grasrót til stórmóta“ er að kortleggja leið allra þátttakenda í gegnum knattspyrnuhreyfinguna - ekki bara leikmanna, heldur líka dómara, þjálfara, sjálfboðaliða, starfsmanna félaganna, og annarra - og reyna að finna jafnvægi milli grasrótarstarfs og afreksstarfs. Fótboltinn snýst um fólkið, þátttakendurna, og KSÍ vill að allir geti tekið þátt í fótbolta, á sínum forsendum og í því hlutverki sem hentar.

Áhersluatriði

• Þátttaka - Þróa möguleika og tækifæri til þátttöku í knattspyrnu fyrir alla, óháð aldri, getu, tekjum og kyni.
• Afreksstarf - Þróa teymi sérfræðinga sem hafa aðgang að gögnum og öðrum nauðsynlegum tólum í þeim tilgangi að styðja sem best við landslið okkar og hámarka möguleika á að ná árangri.
• Aðildarfélög - Halda áfram að efla og þróa reglulegt samtal við aðildarfélögin til að þekkja sem best þeirra stöðu og áskoranir, til að geta stutt við þeirra starf og verkefni eftir fremsta megni.
• Innviðir - Tryggja stuðning til að byggja upp innviði og aðstöðu KSÍ, s.s. þjóðarleikvang og æfingasvæði, til að efla knattspyrnulega umgjörð og auka rekstrartekjur.
• Samfélagsleg ábyrgð og sjálfbærni - Gera grein fyrir áhrifum starfs okkar á samfélagið til að auka skilning almennings á því hlutverki sem við gegnum á Íslandi og í heimi knattspyrnunnar, umfram frammistöðu landsliða okkar.

Stefnumótun knattspyrnusambands er eins og gefur að skilja afar umfangsmikil og snertir á flestum ef ekki öllum þáttum knattspyrnustarfsins. Fjölmörg verkefni tengjast stefnumótun KSÍ og leiðirnar að markmiðunum eru einmitt sá þáttur sem getur tekið hvað mestum breytingum á tímaramma stefnumótunarinnar.

Utanumhald stefnumótunar KSÍ er í föstum skorðum og skipulaginu er ætlað að tryggja framgang hinna ýmsu verkefna, sem er raðað innan hvers árs á gildistímanum. KSÍ notar Microsoft Teams lausnina til að halda utan um verkefnin og framgang þeirra og UEFA notar einmitt KSÍ-leiðina sem dæmi um góða lausn og verklag við að halda utan um innleiðingu og framkvæmd á verkefnum stefnumótunar, sérstaklega fyrir fámenn sambönd sem hafa ekki mikinn mannskap til að halda utan um stefnumótunarvinnu.  Í sama tilgangi mun UEFA nefna þá leið sem KSÍ hefur farið við að kynna sína stefnumótun og áhrif þeirra aðgerða sem ráðist er í.

Stefnumótun KSÍ 2023-2026 er nú á sínu lokaári. Alls voru þetta um 100 verkefni sem höfðu beina tengingu við stefnumótunina. Rétt er að geta þess að það er þó langt frá því að vera allur verkefnalisti KSÍ. Mörgum verkefnum er þegar lokið og mörg vel á veg komin. Öllum verkefnum og aðgerðum er ætlað að hafa jákvæð áhrif á íslenska knattspyrnu og þróun hennar. En það er rétt að hafa í huga að verkefnin eru auðvitað mis-stór og mis-umfangsmikil.  Nýr eða endurbyggður þjóðarleikvangur er t.d. býsna stórt verkefni, innleiðing á nýju mótakerfi, nýjum vef og KSÍ-appi, og (möguleg) innleiðing á VAR eru líka dæmi um stór verkefni.

Vinna er þegar hafin við næstu stefnumótun KSÍ sem gildir þá fyrir árin 2027-2030 og mun KSÍ áfram vinna með UEFA Grow í þeirri vinnu. Undirbúningsvinna er í fullum gangi og framundan á árinu eru vinnustofur og ýmis verkefni þar sem tímalínan miðar að því að næsta stefnumótun verði tilbúin og innleidd frá og með janúar 2027.

Hér að neðan eru dæmi um nokkur verkefni og aðgerðir sem snerta aðildarfélög KSÍ sérstaklega (alls ekki tæmandi listi).

• Nýr og/eða endurbættur þjóðarleikvangur
• Efla og auka samskipti og tengsl við félögin með ýmsum hætti. KSÍ vill vita hvað fólki finnst, t.d. með árlegri þjónustukönnun til félaga.
• Fræðsla til félaga, stjórnenda og forsvarsmanna aukin og efld, tækifærum fjölgað og aðgengi að fræðslu einfalda t.d. með fræðslu í gegnum netið.
• Fyrirkomulag móta. Víðtækt samráð og samstarf við félög og hagaðila.
• Mögulega VAR innleiðing. Víðtækt samráð, kynningarfundir og vinnustofur með félögum og hagaðilum.
• Styðja við félögin með ýmsum leiðum í þeirri viðleitni að fjölga dómurum.
• Efla þjálfaramenntun og fjölga þjálfurum, fjölga KSÍ Pro þjálfurum og fjölga konum í þjálfun sérstaklega.
• Nýtt mótakerfi innleitt (COMET) og nýr vefur smíðaður samhliða. KSÍ-app beintengt við COMET sem mun auðvelda og einfalda leikskýrsluskráningar og aðgengi að mótaupplýsingum.
• Aðstöðumál knattspyrnuhreyfingarinnar. Stöðu- og þarfagreining eftir landsvæðum.
• Hagræn áhrif fótbolta á samfélagið mæld í samstarfi við UEFA. Niðurstaðan mun sýna svart á hvítu, í krónum talið, jákvæð áhrif knattspyrnunnar á samfélagið í heild (líkamleg og andleg heilsa).
• Tengslin milli félagsliða og landsliða. Deilum þekkingu um þjálfun, leikgreiningu og þess háttar.
• Sjálfbærniverkefni á vefum KSÍ alltaf með skýra tengingu við fótboltann, t.d. núverandi verkefni um andlega heilsu ungra leikmanna - Tæklum tilfinningar með Berginu Headspace.
• KSÍ vill efla verulega gagnasöfnun og gagnavinnslu almennt, til að geta greint upplýsingar með markvissum hætti og byggt ákvarðanir á gögnum og vissu.

Glódís Perla Viggósdóttir og Hákon Arnar Haraldsson eru knattspyrnufólk ársins 2025 samkvæmt niðurstöðu Leikmannavals KSÍ. 

Árlegur Norðurlandafundur á Íslandi 

Árlega Norðurlandafundur knattspyrnusambanda á Norðurlöndunum var haldinn á Íslandi í ágúst. Á fundinum voru framkvæmdastjórar og aðrir stjórnendur ásamt formönnum og stjórnarmeðlimum sambandanna. Einnig var Matthias Grafström, framkvæmdastjóri FIFA, á fundinum og Stéphane Anselmo frá UEFA. Stéphane kynnti þær breytingar sem hafa orðið á Evrópukeppnum félagsliða karla og hvaða áhrif þær breytingar hafa haft á félög á Norðurlöndunum. Það helsta sem hefur áorkast er að hver leikur hefur meira vægi, við sjáum fleiri stóra leiki fyrr í keppnunum og fleiri lið eiga möguleika á að ná langt.  

Rætt var um alheimsmálin og stöðu fótboltans innan þeirra. Martin Eyjólfsson ráðuneytisstjóri utanríkisráðuneytisins hélt erindi um alþjóðamál og tengingu þeirra við fótbolta. 

Fyrsta áfanga af þremur í breytingum á Laugardalsvelli lauk í júní 2025. Í fyrsta áfanga var leikvöllurinn tekinn upp, færður átta metra í vestur, hlaupabrautin fjarlægð, hiti settur undir völlinn og náttúrulegu grasi skipt út fyrir Hybrid gras. Hybrid gras er blanda af gervigrasi og náttúrulegu grasi. Laugardalsvöllur er 3% gervigras og var það saumað í völlinn eins og sjá má á myndbandinu hér að neðan.

Í öðrum áfanga í breytingum Laugardalsvallar verður búningsklefum og fjölmiðlaaðstöðu breytt og í þriðja áfanga verður stúkunum í kringum völlinn breytt.

Innleiðing á nýju móta- og upplýsingakerfi 

Nýtt mótakerfi (COMET) hefur verið innleitt hjá KSÍ og samhliða því hefur verið opnaður nýr vefur. Auk þess hefur verið tekið í notkun sérstakt app fyrir fylgjendur íslenskrar knattspyrnu.  

Nýr vefur KSÍ 

Nýr vefur KSÍ fór í loftið í ársbyrjun 2026. Með nýjum vef vonast KSÍ eftir því að bæta þjónustu og upplýsingagjöf enn frekar til bæði aðildarfélaga sinna sem og áhugafólks um íslenska knattspyrnu. 

KSÍ appið 

Samhliða á opnun á nýjum vef tók KSÍ í notkun nýtt smáforrit.  

Í KSÍ appinu eru meðal annars upplýsingar um leiki, úrslit, byrjunarlið, atburði í leikjum, tölfræði og aðrar áhugaverðar upplýsingar fyrir öll opinber knattspyrnumót á Íslandi. 

Hægt er að notað appið til að fylgjast með uppáhalds liðum, leikmönnum eða leikjum, skoða prófíla þeirra og fá tilkynningar um öll atvik sem varða þín uppáhalds lið – eins og mark, spjald eða lokaflaut – um leið og þau eru skráð í COMET KSÍ kerfið. 

Stafræn vegferð 

Stafræn vegferð KSÍ gengur út á að efla og bæta þjónustu við knattspyrnuhreyfinguna og knattspyrnuáhugafólk. Auk KSÍ smáforritsins og nýs vefs notast KSÍ við ýmiss önnur stafræn kerfi. Þar má nefna miðasölukerfi KSÍ, Secutix, sem tekið var í notkun árið 2025 sem og Photoshelter. Allar þessar lausnir eru liður í að bæta stafræna vegferð KSÍ með það að markmiði að gera upplifun notenda sem besta. 

Sameiginlegur fundur stjórna KSÍ og ÍTF 

Í lok apríl var haldinn sameiginlegur fundur stjórna Knattspyrnusambands Íslands (KSÍ) og Íslensks Toppfótbolta (ÍTF) í höfuðstöðvum KSÍ. Mikil ánægja var með framtakið hjá fulltrúum beggja stjórna, sem hvor um sig kynntu sín áherslumál, auk þess sem rætt var um sameiginleg verkefni og framtíðarsýn. Stjórnarmenn sammæltust um að vinna markvisst að því að styrkja enn frekar samstarf ÍTF og KSÍ og bjarta framtíð íslenskrar knattspyrnu. 

Í lok ágúst átti Þorvaldur Örlygsson, formaður KSÍ, fund með Alexander Ceferin, forseta UEFA, þar sem rædd voru ýmis hagsmunamál og framþróun íslenskrar knattspyrnu. 

Málefni og staða þjóðarleikvangsins, Laugardalsvallar í Reykjavík, voru rædd sérstaklega, og fram kom að þrátt fyrir þau góðu skref sem þegar hefðu verið tekin með sjálfan leikflötinn þá yrði uppbyggingin að halda áfram og að tryggja þyrfti sem fyrst að leikvangurinn - m.a. búningsklefar og önnur íþróttaleg aðstaða uppfylli alþjóðlega staðla. 

Sjá nánar hér í grein á vef UEFA

Albert Eymundsson sæmdur heiðursmerki hinnar íslensku fálkaorðu 

Albert Eymundsson, sem gegnt hefur ýmsum trúnaðarstörfum fyrir knattspyrnuhreyfinguna í gegnum árin og sat m.a. í stjórn KSÍ 1992-1998, er á meðal þeirra 15 einstaklinga sem Forseti Íslands sæmdi heiðursmerki hinnar íslensku fálkaorðu við hátíðlega athöfn á Bessastöðum á 17. júní. Albert, sem er einnig fyrrverandi skólastjóri, hlýtur heiðursmerkið "fyrir framlag til mennta-, íþrótta- og ungmennafélagsstarfa í heimabyggð" að því er segir í tilkynningu frá forsetaembættinu. 

Þjónustukönnun KSÍ - Almenn ánægja aðildarfélaga 

Í nóvember sendi KSÍ út stutta þjónustukönnun til allra félaga. Með slíkri könnun leitast KSÍ við að kanna viðhorf aðildarfélaganna til starfs KSÍ og þeirrar þjónustu sem KSÍ veitir félögum og þeirra fulltrúum. Sambærileg könnun er send út árlega og niðurstöðurnar þannig notaðar sem mikilvægur leiðarvísir fyrir KSÍ til að efla þjónustuna og samstarfið enn frekar. Óskað var eftir einu svari frá hverju félagi. KSÍ þakkar þeim aðildarfélögum sem svöruðu könnuninni kærlega fyrir þátttökuna. 

Heilt yfir og almennt er mikill meirihluti svarenda ánægður með þá þjónustu sem KSÍ veitir aðildarfélögum, sem og stuðning og samskipti við félögin og þeirra fulltrúa. Vel yfir 80 prósent svarenda eru t.a.m. ánægðir með þjónustu KSÍ við aðildarfélög, samskipti við fulltrúa félaga, viðbrögð við fyrirspurnum, stuðning og leiðbeiningar og er það hækkun milli ára. Tæp 70% svarenda eru ánægðir með námskeið og fræðslu en aðeins 3% svarenda lýsa óánægju. Ánægja með stjórnsýslu og skipulag KSÍ minnkar milli ára eftir hækkun á síðasta ári og stendur nú í 55%. 

Einnig bárust nokkur svör við opinni spurningu þar sem svarendur voru beðnir um ábendingar eða tillögur til KSÍ um hvað sem er varðandi starfsemi og þjónustu KSÍ. Þar var m.a. að finna hvatningu til KSÍ til að halda áfram stafrænni þróun og rafrænum staðfestingum, m.a. í sambandi við félagaskipti og leikmannasamninga, endurskoðun framlaga í mannvirkjasjóð, aukinn stuðning við félög á landsbyggðinni, brýningu til KSÍ varðandi kvennaknattspyrnu almennt, ákall um meiri fræðslu til stjórnenda aðildarfélaga, almennt hrós til skrifstofunnar fyrir stuðning við starfsfólk félaga, hvatningu til að halda áfram með uppbyggingu Þjóðarleikvangsins, og síðast en ekki síst áminningu um að aldrei megi gleyma því að fótbolti er og á að vera skemmtilegur. 

Niðurstöður 

Þjónusta:

• 86% mjög ánægð/nokkuð ánægð.
• 6% hlutlaus.
• 8% nokkuð óánægð/mjög óánægð. 

Samskipti:

• 86% mjög ánægð/nokkuð ánægð.
• 3% hlutlaus.
• 11% nokkuð óánægð/mjög óánægð. 

Viðbrögð við fyrirspurnum:

• 83% mjög ánægð/nokkuð ánægð.
• 14% hlutlaus.
• 3% nokkuð óánægð/mjög óánægð. 

Stuðningur og leiðbeiningar:

• 80% mjög ánægð/nokkuð ánægð.
• 9% hlutlaus.
• 11% nokkuð óánægð/mjög óánægð. 

Skipulag og stjórnsýsla:

• 55% mjög ánægð/nokkuð ánægð.
• 34% hlutlaus.
• 11% nokkuð óánægð/mjög óánægð. 

Námskeið og fræðsla:

• 69% mjög ánægð/nokkuð ánægð.
• 28% hlutlaus.
• 3% nokkuð óánægð/mjög óánægð. 

Þjónusta við stuðningsmenn á landsleikjum:

• 34% mjög ánægð/nokkuð ánægð.
• 54% hlutlaus.
• 12% nokkuð óánægð/mjög óánægð. 

Framkvæmdir á Laugardalsvelli:

• 83% mjög ánægð/nokkuð ánægð.
• 11% hlutlaus.
• 6% nokkuð óánægð/mjög óánægð. 

Forseti Íslands, Halla Tómasdóttir, sæmdi fjórtán Íslendinga heiðursmerki hinnar íslensku fálkaorðu við hátíðlega athöfn á Bessastöðum á nýársdag.  Á meðal þeirra var knattspyrnukappinn Ásgeir Sigurvinsson, "fyrir afreksárangur í knattspyrnu".

Eyjamaðurinn Ásgeir Sigurvinsson er knattspyrnuáhugafólki auðvitað að góðu kunnur sem einn af bestu íslensku knattspyrnumönnum sögunnar.  Ásgeir, sem er sjötugur, hóf feril sinn sem leikmaður ÍBV og lék síðan með Standard Liege í Belgíu, Bayern München og Stuttgart í Þýskalandi á árunum 1973 til 1990, og varð hann m.a. Þýskalandsmeistari með síðastnefnda liðinu árið 1984 auk þess að vera valinn besti leikmaður Bundesligunnar það ár. 

Ásgeir lék 45 leiki fyrir íslenska landsliðið á árunum 1972-89 og skoraði fimm mörk og var valinn jafnframt valinn Íþróttamaður ársins af Samtökum íþróttafréttamanna árin 1974 og 1984.

Til hamingju Ásgeir!

Góður félagi okkar allra, Norðmaðurinn Åge Hareide, fyrrum þjálfari A landsliðs karla, lést í desember síðastliðnum eftir snarpa baráttu við veikindi. Útför hans fór fram frá dómkirkjunni í hans heimabæ Molde í Noregi að viðstöddu fjölmenni.

Líf Åge Hareide, sem fæddist árið 1953, var alla tíð samofið knattspyrnuíþróttinni, og hann átti langan og árangursríkan feril sem leikmaður í Noregi og á Englandi, og sem þjálfari nokkurra af stærstu félagsliðum Norðurlanda, auk þess að þjálfa landslið Noregs og Danmerkur um árabil með góðum árangri. Hann tók við stjórn karlalandsliðs Íslands í apríl 2023 og stýrði því í alls 20 leikjum við góðan orðstír.

Åge Hareide er stórt nafn í knattspyrnuheiminum, mun stærra en við Íslendingar kannski áttum okkur fyllilega á, auðvitað frábær þjálfari með gríðarlega þekkingu á fótbolta, en líka litríkur og áhugaverður maður sem hafði frá svo ótalmörgu að segja.

Við hjá KSÍ minnumst fallins félaga með hlýhug og þakklæti fyrir hans góðu störf fyrir íslenska knattspyrnu og vottum fjölskyldu hans, aðstandendum og vinum samúð.

Blessuð sé minning Åge Hareide.

ÍTF í Laugardalinn 

Skrifstofa ÍTF hefur nú flutt starfsemi sína í Laugardal, undir þak íslenskrar knattspyrnu og býður nú ÍTF öll aðildarfélög velkomin á skrifstofu sína í Laugardal. 

Birgir Jóhannsson framkvæmdastjóri ÍTF:  

"Þetta er áfangi í okkar starfsemi og tilhlökkun hjá okkur að vera mættir aftur niður í Laugardal. Ég held að íslensk knattspyrna eigi heima í Laugardalnum og ég hef fulla trú á því að þetta sé heillavænlegt skref fyrir ÍTF, sem og KSÍ og alla okkar hagsmunaaðila. Núna er hægt að hitta okkur undir sama þaki og það hlýtur að gera gott fyrir okkar samstarf og íslenska knattspyrnu". 

Eysteinn Pétur Lárusson framkvæmdastjóri KSÍ:  

"Við fögnum því að fá ÍTF í hús og ég er spenntur að sjá hvernig við getum gert enn betur í markaðssetningu, umgjörð og sýnileika íslenskrar knattspyrnu. Það er af nægu að taka og fullt af verkefnum framundan sem við þurfum að leysa í sameiningu og þess vegna er að gott að vera búin að sameina kraftana í Laugardal. Ég hef fulla trú á því að okkar félagar úti í hreyfingunni fagni þessu með okkur". 

Nýr leikflötur á Laugardalsvelli vígður 

Fyrir leik Íslands gegn Frakklandi í Þjóðadeild kvenna var nýr leikflötur á Laugardalsvelli vígður. Upphaflegur grasflötur var tekinn upp, hitalagnir lagðar undir völlinn og nýr hybrid völlur lagður. Hybrid völlur er blanda af gervigrasi og náttúrulegu grasi. 

Þau Þorvaldur Örygsson formaður KSÍ, Heiða Björg Hilmisdóttir borgarstjóri Reykjavíkur og Guðmundur Ingi Kristinsson mennta- og barnamálaráðherra vígðu völlinn. 

Í marsmánuði heimsóttu fulltrúar KSÍ og UEFA Grindavík og skoðuðu keppnis- og æfingasvæði Grindvíkinga og ummerki eftir jarðhræringarnar sem þar hafa átt sér stað. Tilgangur heimsóknarinnar var að gefa fulltrúa UEFA kost á að kynna sér aðstæður þar sem KSÍ myndi, fyrir hönd knattspyrnudeildar Grindavíkur, sækja um styrk í sérstakan hamfarasjóð UEFA (UEFA Emergency Grant). 

Í kjölfarið sótti KSÍ um fyrrgreindan styrk. Nefnd á vegum UEFA (Bureau of the UEFA Social and Environmental Sustainability Committee) fjallaði um umsóknina á fundi sínum 19. maí síðastliðinn og samþykkti styrk að upphæð 50.000 evrur, í samræmi við reglugerð sjóðsins og skilmála um úthlutun úr honum. Samkvæmt upplýsingum frá UEFA voru óvenju margar umsóknir um styrk úr hamfarasjóðnum að þessu sinni og því afar ánægjulegt að umsókn KSÍ hafi skilað árangri. 

Haukur G. Einarsson, formaður knattspyrnudeildar Grindavíkur: 

"Knattspyrnudeild Grindavíkur vill koma á framfæri kærum þökkum til KSÍ og UEFA. Deildin hefur staðið frammi fyrir miklum áskorunum. Náttúruöflin gjöreyðilögðu æfingasvæði og innanhússaðstöðu deildarinnar, en með mikilli eljusemi og dugnaði sjálfboðaliða, þá hefur liðið snúið heim. Framundan er uppbyggingartími, og ófyrirséður kostnaður til næstu ára, en með stuðningi KSÍ og UEFA getur deildin spyrnt við fótum. Formaður KSÍ og starfsfólk KSÍ hefur verið deildinni gríðarleg hjálp síðustu mánuði. Fyrir það og fyrir stuðning UEFA verður seint þakkað nógsamlega." 

PUMA framleiddi sérstakar treyjur fyrir íslenska kvennalandsliðið fyrir EM 2025. Lék liðið í þeim í stað hefðbundinna varabúninga.

Treyjan er sérhönnuð fyrir íslenska landsliðið, hönnuðir PUMA sækja innblástur í hreyfingar Norðurljósanna og flæði jökuláa landsins.

Treyjurnar eru að nær öllu leyti úr endurunnu hráefni.

Hljómsveitin HúbbaBúbba gaf út lag og tónlistarmyndband í samstarfi við KSÍ vegna þáttöku A-landsliðs kvenna á lokamóti EM. Útkoman er hressandi sumarsmellur þar sem fram koma landsliðskonur, bæði núverandi og fyrrverandi. 

Eyþór Aron Wöhler hafði þetta að segja um lagið: 

„Lagið er gert í samstarfi við KSÍ og líkt og þau bíðum við með öndina í hálsinum eftir EM í sumar. Við höfum tröllatrú á stelpunum í Sviss og vonandi gefur lagið þeim smá pepp inn í sumarið. Stelpurnar eru í áhugaverðum riðli með Sviss, Noregi og Finnlandi, og ég er ekki frá því að þær fari áfram í 8-liða úrslitin,“ sagði Eyþór. 

„Þetta verður vonandi sumarsmellur og við fengum hjálp mikilla fagmanna, Tómas Gauti gerði lagið og Huginn Frár hjálpaði okkur að semja textann við lagið. Sömuleiðis fengum við fagmenn í að gera tónlistarmyndbandið með okkur hjá Skjáskot og erum við í skýjunum yfir útkomunni. Mörgum þekktum andlitum bregður fyrir, allt frá landsliðskonum til forsetans, og greinilegt að það sé mikill spenningur í liðinu og almenningi fyrir mótinu,“ bætti Eyþór við. 

Eins og Eyþór nefnir má sjá marga þekkta Íslendinga í myndbandinu, þar á meðal Höllu Tómasdóttur, Sveppa, Gumma Ben og Olgu Færseth, auk leikmanna úr kvennalandsliðinu. 

„Við fengum innblástur frá Shakiru sjálfri og höldum mikið upp á þemalag HM 2010 í Suður-Afríku, Waka-Waka. Það lag varð vinsælt lengi eftir mótið sjálft. Við vonum að lagið peppi stelpurnar áfram og geti einnig glatt Íslendinga á fögrum sumarkvöldum á klakanum.“ 
 

Puma og KSÍ kynntu nýja landsliðstreyju íslensku landsliðanna.

Hægt er að kaupa treyjuna hjá fyririsland.is og má finna hlekk á söluna hér að neðan.

Fyririsland.is

KSÍ hefur síðustu ár verið hluti af þróunarverkefni hjá UEFA, ásamt fleiri knattspyrnusamböndum, þar sem ýmsir þættir sem tengjast starfi og starfsumhverfi knattspyrnusambanda eru kannaðir - s.s. ímynd knattspyrnuíþróttarinnar og knattspyrnusambandsins í viðkomandi landi, skoðun almennings og knattspyrnuáhugafólks á ýmsum þáttum, þátttaka þeirra og virkni í knattspyrnu.  

Á ári hverju eru keyrðar tvær kannanir og munu niðurstöðurnar m.a. nýtast vel í stefnumótunarvinnu KSÍ.  Núverandi stefna KSÍ er fyrir árin 2023-2026 og vinna við stefnumótun fyrir árin 2027-2030 er þegar hafin.

Á meðal þess sem mælt er í fyrrgreindri könnun er ímynd og óhætt er að segja að heilt yfir stefni ímynd KSÍ í afar jákvæða átt.  KSÍ lækkar í öllum neikvæðum þáttum en hækkar í öllum jákvæðum þáttum. 

Tveir þriðju hlutar svarenda telja ímynd KSÍ heilt yfir jákvæða. 

Eins og kemur fram hér að ofan fara mælingar fram tvisvar á ári og er marktækur jákvæður munur milli áranna 2024 og 2025 og einnig er marktækur jákvæður munur milli fyrri helmings ársins 2025 og seinni helmings þess árs. 

Spurningar sem lagðar eru fram varðandi ímynd eru fjölbreyttar og snúa meðal annars að hæfni og framkomu, stjórnun og rekstri, trúverðugleika og gegnsæi, framsækni og nýjungagirni, samfélagslegri ábyrgð og samskiptum, og fleiru.

Meðal þess sem svarendur nefna sem ástæðu fyrir jákvæðri ímynd KSÍ er öflugt mótahald yngri flokka, fagleg stjórnun og ábyrgur rekstur sambandsins, samfélagsleg verkefni (sjálfbærniverkefni), stuðningur við þróun knattspyrnunnar allt frá grasrót til afreksstarfs, stuðningur við kvennaknattspyrnu, árangur landsliða allt frá yngri liðum til A landsliða, góð samskipti og öflugir samfélagsmiðlar sem veita innsýn í starfið, og margir svarendur benda á samfélagslegt mikilvægi knattspyrnunnar fyrir líkamlega og andlega heilsu.

KSÍ er hluti af þessu fyrrnefnda þróunarverkefni UEFA ásamt fjórtán öðrum evrópskum knattspyrnusamböndum og í samanburði við þau knattspyrnusambönd er KSÍ og Ísland „um miðja deild“ ef svo mætti segja, þ.e. jafn mörg sambönd skora hærra en KSÍ á ímyndarmælingum og þau 

Ísland var í riðli með Tyrklandi, Englandi, Möltu, San Marínó, Noregi, Tékklandi og Kasakstan.

Aron Þormar Lárusson og Tindur Örvarsson skipuðu lið Íslands að þessu sinni.

Ísland endaði í 6. sæti riðilins með 14 stig og komst ekki áfram í næstu umferð undankeppninnar.

Íslenska landsliðið í rafíþróttum tók þátt í undankeppni HM 2025 í Rocket League.

Íslenska liðið skipuðu þeir Stefán Máni Unnarsson, Emil Valdimarsson og Bjarni Þór Hólmsteinsson. Varamenn voru Daníel Ingi Hjaltalín og Karvel Nói Friðjónsson. Þeir Stefán Máni, Emil og Bjarni Þór leika allir með Þór frá Akureyri og eru margfaldir Íslands- og RIG meistarar.

Ísland var í riðli með Tyrklandi, Hollandi, Grikklandi, Lettlandi og Ítalíu. Liðið endaði í 3. sæti riðilsins, en tapaði fyrir Portúgal í umspili í næstu umferð undankeppninnar.

KSÍ samdi við Spiideo um myndavélaþjónustu fyrir alla velli í 2. deild karla og kvenna, með það að markmiði að stuðla að þróun og hagkvæmni í deildinni. Fyrstu myndavélarnar hafa þegar verið afhentar og teknar í notkun.

Félögin fá aðgang að sameiginlegum grunni þar sem allir leikir í viðkomandi deild eru vistaðir (league exchange) og einnig aðgang að fullkomnum greiningarhugbúnaði fyrir þjálfarateymi sín. Þjálfarar geta þannig fylgst með öllum leikjum í rauntíma í hvaða snjalltæki sem er (live tagging), og geta nýtt sér greiningarskýrslur eftir hvern leik til að bæta frammistöðu. Þessu til viðbótar geta félögin búið til beinar útsendingar og lýst leikjum, ásamt því að nýta mörk og annað efni úr leikjum til birtingar á samfélagsmiðlum til að efla áhuga og þátttöku sinna fylgjenda.

Fyrsta ár verkefnisins er að öllu leyti kostað af KSÍ og undirstrikar áherslu KSÍ á nýsköpun og framfarir í íslenskri knattspyrnu.

Fulltrúar Garðabæjar og KSÍ undirrituðu á árinu samning sem felur í sér áframhaldandi afnot af fjölnota íþróttahúsinu Miðgarði í Garðabæ fyrir æfingar yngri landsliða á vegum KSÍ. Samningurinn gildir til 31. mars 2028 og tekur við af fyrri samningi sem var undirritaður árið 2022.

KSÍ fær til afnota aðstöðu á skilgreindum rýmum í Miðgarði á tilteknum tímum dagsins, en um er að ræða bæði knattspyrnusalinn og stoðrými, svo sem búningsaðstöðu, sjúkraherbergi, fundaraðstöðu og mataraðstöðu, dómara og þjálfara herbergi og þrekæfingasvæði með gervigrasi.

KSÍ skipuleggur vel á annað hundrað æfingar yngri landsliða og tengda viðburði í Miðgarði á hverju ári.

Mynd að ofan:  Á mynd (frá vinstri): Guðbjörg Linda Udengard sviðsstjóri fræðslu- og frístundasviðs Garðabæjar, Hrannar Bragi Eyjólfsson bæjarfulltrúi í Garðabæ og Almar Guðmundsson bæjarstjóri Garðabæjar, Þorvaldur Örlygsson formaður KSÍ og Eysteinn Pétur Lárusson framkvæmdastjóri KSÍ.

Hæfileikamótun N1 og KSÍ fór fram árið 2025 eins og undanfarin ár. Hæfileikamótun er fyrsta skrefið í landsliðsstiganum þar sem stelpur og strákar á eldra ári í 4. flokki eru skoðaðir. Hápunktur Hæfileikamótunarinnar ár hvert er Hæfileikamótið. Á Hæfileikamótið eru 60 leikmenn valdir til þátttöku og þeim skipt í fjögur lið sem spila innbyrðis, alls þrjá leiki hvert lið. Að loknu Hæfileikamóti velur landsliðsþjálfari U15 ára landsliðsins 30 manna úrtakshóp. 

Leikstöðuæfingar KSÍ og Eimskips voru haldnar sem tilraunaverkefni árið 2025 og er það Davíð Snorri Jónasson, aðstoðarlandsliðsþjálfari A-landsliðs karla, sem hefur umsjón með æfingunum. Með honum taka einnig þátt þjálfarar yngri landsliðanna ásamt fyrrum landsliðsmönnum karla og kvenna. 

Markmið leikstöðuæfinga KSÍ og Eimskips eru: 

• Auka áhuga á varnarleik
• Æfa og gefa tíma í sérstakar stöður í varnarleik
• Gefa leikmönnum tól til að æfa sig á sínum heimavelli
• Fræðsla fyrir þjálfara

Ársþing

79. ársþing KSÍ var haldið á Hilton Nordica, Reykjavík, laugardaginn 22. febrúar.

Stjórn KSÍ var þannig skipuð að loknu ársþingi:

Aðalfulltrúi Austurlands var kjörinn Guðmundur Bj. Hafþórsson, Þorsteinn Haukur Harðarson fyrir Vesturland, Tryggvi Gunnarsson fyrir Norðurland og Trausti Hjaltason fyrir Suðurland.

Fundargerðir stjórnar má sjá á vef KSÍ.

Breytingar á skipan landsliðsþjálfara á árinu

Breytingar voru gerðar á starfsliði A kvenna eftir lokakeppni EM. Ólafur Helgi Kristjánsson kom inn sem nýr aðstoðarþjálfari í stað Ásmundar Haraldssonar og Amir Mehica var ráðinn markmannsþjálfari liðsins í stað Ólafs Péturssonar.

Ólafur Ingi Skúlason, landsliðsþjálfari U21 karla hætti störfum hjá KSÍ í október og tók við meistaraflokki karla hjá Breiðablik. Í hans stað ákvað KSÍ að fá Lúðvík Gunnarsson, landsliðsþjálfara U17 karla, og Ólaf Helga Kristjánsson, aðstoðarþjálfara A kvenna, til að stjórna liðinu út núverandi undankeppni EM.

Halldór Jón Sigurðsson var ráðinn sem nýr þjálfara U19 landsliðs kvenna ásamt því að vera aðstoðarþjálfari U17 og U16 kvenna. Donni, eins og hann er jafnan kallaður, er fæddur árið 1983 og kláraði KSÍ Pro gráðu í þjálfun í nóvember - reynslumikill þjálfari og knattspyrnuáhugafólki að góðu kunnur. Hann hóf þjálfaraferilinn í meistaraflokki árið 2011 og þjálfaði karlalið Tindastóls og Þórs áður en hann tók við kvennaliði Þórs/KA árið 2017. Árið 2022 tók Donni við stjórnartaumunum hjá bæði kvennaliði og karlaliði Tindastóls, en stýrði síðan eingöngu kvennaliði félagsins til og með 2025, þar sem hann lauk störfum að loknu nýafstöðnu keppnistímabili.

Nokkrar tilfæringar voru gerða á störfum í yngri landsliðum kvenna á sama tíma. Aldís Ylfa Heimisdóttir tók við stöðu yfirmanns hæfileikamótunar og U15 landslið kvenna og Margrét Magnúsdóttir tók við þjálfun U17/U16 landsliðs kvenna ásamt því að aðstoða Halldór Jón með U19 kvenna.

Reglulega kviknar umræða innan knattspyrnuhreyfingarinnar um umfang starfsemi KSÍ – og þá helst um verkefni skrifstofu og fjölda starfsfólks. Vegna þessa vill KSÍ vekja athygli á því að í mannauðsrannsókn sem UEFA framkvæmdi árið 2024 (UEFA Human Resources Benchmarking Report) kom m.a. fram að KSÍ væri í 53. sæti af öllum 55 knattspyrnusamböndum innan UEFA þegar talinn væri fjöldi starfsfólks – sem sagt, knattspyrnusambönd aðeins tveggja aðildarlanda UEFA eru með færri starfsmenn en KSÍ.

Á skrifstofu sambandsins og Laugardalsvelli eru nú (í desember 2025) alls 37,8 stöðugildi.

• Á skrifstofunni, að meðtöldum formanni KSÍ og landsliðsþjálfurum, eru 31,8 föst stöðugildi (þar af landsliðsþjálfarar 9,6 stöðugildi).
• Þessu til viðbótar eru 4 stöðugildi sem eru fjármögnuð með styrkjum frá UEFA og FIFA - eitt tímabundið stöðugildi í innleiðingu á nýju mótakerfi (styrkur á meðan á innleiðingu stendur) og 3 stöðugildi í sérverkefni á knattspyrnusviði (styrkur á meðan verkefni er í gangi). Styrkir í þessum tilfellum eru eyrnamerktir einmitt þessum tilteknu verkefnum/stöðugildum og fengjust ekki ef þessi verkefni væri ekki í gangi.

Þetta gera alls 37,8 stöðugildi og eru 6 þeirra ekki fjármögnuð af KSÍ.

Til fróðleiks og samanburðar má nefna að starfsmenn færeyska knattspyrnusambandsins nú (í desember 2025) eru 35 alls, að meðtöldum landsliðsþjálfurum, og þar af 2 stöðugildi sem bera ábyrgð á umsjón og viðhaldi skrifstofuaðstöðu. Til viðbótar þessum 35 stöðugildum eru 4 starfsmenn sveitarfélagsins í Þórshöfn sem bera ábyrgð á viðhaldi þjóðarleikvangsins í Færeyjum og sinna honum samhliða 4 öðrum leikvöngum sem sveitarfélagið rekur.

Unnið var að skipurits- og skipulagsbreytingum á skrifstofu KSÍ á árinu og hafa þær breytingar nú verið innleiddar. Á meðal helstu breytinga má nefna sameiningu sviða/deilda og ný heiti sviða auk tilfærslu verkefna.

Markaðssvið og samskiptadeild sameinast í nýtt markaðssvið. Fræðsludeild færist undir afrekssvið, sem áður hét knattspyrnusvið. Nýtt fjármálasvið er myndað, innanlandssvið heitir nú mótasvið og yfirstjórn Laugardalsvallar færist undir framkvæmdastjóra.

Nýtt skipurit má sjá hér að neðan. Markmið breytinganna er að einfalda heildarskipulag og skerpa á og styrkja ákvarðanatöku á skrifstofu.

Ingi Rafn Ingibergsson var ráðinn til starfa sem starfsmaður dómaramála á skrifstofu KSÍ og hóf hann störf 1. desember. 

Magnús Már Jónsson, dómarastjóri KSÍ, lét af störfum um áramót og tók Þóroddur Hjaltalín við stöðu dómarastjóra og var Ingi Rafn ráðinn inn í fyrri stöðu Þórodds.

Axel Kári Vignisson var ráðinn í starf lögfræðings á skrifstofu KSÍ og hóf hann störf 1. mars. Axel Kári lauk BA námi í lögfræði frá Háskóla Íslands árið 2017 og Magister Juris frá sama skóla árið 2019. Þá öðlaðist hann málflutningsréttindi fyrir héraðsdómi árið 2020 og hefur starfað sem lögmaður hjá Íslensku lögræðistofunni síðan þá, þar sem hann hefur öðlast víðtæka reynslu, m.a. af málflutningi.

Magnús Már Jónsson lét af störfum í lok árs 2025, en hann hafði verið dómarastjóri KSÍ frá því 1. júlí árið 2007.

KSÍ hefur nú birt ársreikning fyrir árið 2025 og fjárhagsáætlun fyrir árið 2026.

Rekstrarniðurstaða Knattspyrnusambands Íslands á árinu 2025 eftir greiðslur til aðildarfélaga er hagnaður sem nemur 32.629.666 kr.

KSÍ hefur nú birt ársreikning fyrir árið 2025 og fjárhagsáætlun fyrir árið 2026. 

Ársreikningur 2025 

Rekstrarniðurstaða Knattspyrnusambands Íslands á árinu 2025 eftir greiðslur til aðildarfélaga er hagnaður sem nemur kr. 32.629.666   

Rekstrartekjur KSÍ árið 2025 námu rúmlega 2,3 milljörðum króna, 13% umfram áætlun, þar sem styrkir frá UEFA og FIFA vógu þyngst.  

Rekstrargjöld voru 2,24 milljarðar króna, eða 14% yfir áætlun, þar sem kostnaður við lokamót EM kvenna er helsti áhrifaþátturinn.  

Rekstur Laugardalsvallar skilaði áfram tapi og hækkaði m.a. vegna aukins kostnaðar við endurnýjun leikflatar Laugardalsvallar með nýju hybrid grasi. KSÍ  vinnur nú að nýjum rekstrar- og þjónustusamningi við Reykjavíkurborg á vettvangi Þjóðarleikvangs ehf og bindur KSÍ vonir við nýjan og endurbættan samning sem tekur mið af breyttum rekstrarforsendum  Laugardalsvallar með tilkomu nýs hybrid  gras með undirhita, sem og aukins rekstrarkostnaðar á framkvæmdatíma.   

Þá var úthlutað til aðildarfélaga um 107 m.kr., auk framlags frá UEFA fyrir Club Youth Development.

Ársreikningur 2025

Áætlun 2026 

Lögð er fram rekstraráætlun sem gerir ráð fyrir rúmlega 2 m.kr. hagnaði árið 2026.    

KSÍ hefur hingað til haft þau viðmið að skila til ársþings samþykktri fjárhagsáætlun með að lágmarki 30 m.kr. í hagnað. Þessi niðurstaða um að skila áætlun 2026 með mjög litlum hagnaði kemur í kjölfar samvinnu og samráðs við hagaðila.   

Upphaflegar forsendur þessarar áætlunar kölluðu strax á aðgerðir eins og hefur komið  fram á deildarfundum, formanna- og framkvæmdastjórafundi, upplýsingum á heimasíðu KSÍ og með samtali við ÍTF og aðildarfélög KSÍ.   

Þær breytingar sem hafa orðið frá fyrra ári á tekjuhlið sambandsins eru eftirfarandi:  

• Tekjufærslur ákveðinna verkefna á vegum UEFA eru ekki lengur heimilar, þar sem umrædd verkefni verða hér eftir eignfærð.  
• A-landslið karla féll í C-deild Þjóðadeildar sem þýðir mun lægri tekjur til sambandsins.  
• Tekjur frá PUMA styrktaraðila sambandsins lækka vegna breytinga á nýjum samningi þar sem fastar greiðslur lækka, en árangurstengdar greiðslur hækka á móti.  

KSÍ hefur þess vegna þurft að leiðrétta þátttökugjöld móta og innheimta frekar skv. heimildarákvæði í gildandi reglugerð um ferða- og uppihaldskostnað dómara.  Einnig hefur KSÍ farið í að skera niður landsliðsverkefni og skrifstofukostnað, auk þess að nýta þau tækifæri sem gefast til að hagræða almennt í öllum rekstrarþáttum sambandsins.  

Handbært fé KSÍ 31.desember 2025 stóð í 492 m.kr. UEFA mælir með að knattspyrnusambönd séu með 20-40% af veltu sambandanna í lausafé, sem gerir 400 – 800 m.kr.   

Styrkveitingar UEFA hafa tekið ákveðnum breytingum síðustu ár, þannig að framlög eru greidd eftir að verkefnin hafa átt sér stað, í stað þess sem áður var að greiða þau fyrirfram.

Fjárhagsáætlun KSÍ 2026

Laugardalsvöllur 

Varðandi Laugardalsvöll þá er fyrri hluta af fyrsta fasa lokið í mjög svo þörfum endurbótum á vellinum þ.e. búið er að setja nýtt hybrid gras á leikflötinn með undirhita. Einnig er búið að endurbæta flóðlýsingu á leikfletinum eftir að hann var færður nær aðalstúkunni.  

Næsti hluti í fasa 1 er aðstaða leikmanna, dómara og annarra starfsmanna. Ríki og borg komu myndarlega inn með styrk vegna endurnýjun leikflatar Laugardalsvallar en nú er beðið eftir því að fá fjármagn í þennan næsta hluta. Viðræður hafa verið í gangi við ríki og borg á vettvangi Þjóðarleikvangs ehf. og standa vonir til þess að hægt verði að hefja framkvæmdir á næstu misserum.  

Með þessum endurbótum í fasa 1 er loksins kominn völlur sem getur sinnt þeim leikjum landsliða og félagsliða sem leiknir eru snemma á vorin og seint á haustin. Þess má geta að karlalið Breiðabliks lék á Laugardalsvelli 11. desember sl. og hefur það, svo best sé vitað, ekki gerst áður að alþjóðlegur keppnisleikur í knattspyrnu hafi farið fram á náttúrulegu grasi á þessum árstíma hér á landi.    

Félögin í Bestu deild karla fengu sérstakt framlag frá UEFA vegna þróunarstarfs barna og unglinga í knattspyrnu (club youth development) að fjárhæð 397 m.kr. Þá fengu átta félög í Bestu deild kvenna (sem tóku ekki þátt í Evrópukeppni) einnig framlag frá UEFA, að fjárhæð 12.8 m.kr.

Í fjárhagsáætlun KSÍ fyrir árið 2025 var gert ráð fyrir 35 milljóna króna framlagi til viðbótar til þeirra félaga sem ekki fengu framlag frá UEFA. Stjórn samþykkti á fundi sínum 15. janúar dreifingu framlags KSÍ.

Samkvæmt ákvörðun stjórnar skal framlag KSÍ til aðildarfélaga renna óskipt til eflingar knattspyrnu barna og unglinga frá yngstu iðkendum til og með 2. aldursflokks karla og kvenna. Úthlutun er háð því að félög haldi úti sjálfstæðri starfsemi í yngri flokkum beggja kynja. Félög sem taka þátt í samstarfi í yngri flokkum eða eru ekki með þátttökulið í Íslandsmóti í yngri flokkum beggja kynja fá 75% framlag miðað við deildarstöðu meistaraflokks.

Rétt er að taka fram að þegar um samstarfsfélög (skástriksfélög) er að ræða þá er framlagið byggt á stöðu í deild skipt á milli þeirra félaga sem að samstarfinu standa.

Eftirfarandi tafla sýnir framlag KSÍ til þróunarstarfs aðildarfélaga KSÍ í samræmi við forsendurnar hér að ofan.

Framlag frá KSÍ

Breiðablik fékk tæplega 4,2 milljónir evra vegna þátttöku liðsins í forkeppni Meistaradeildar karla (UEFA Champions League) og forkeppni og deildarkeppni Sambandsdeildar (UEFA Conference League).

Víkingur R., KA og Valur léku í forkeppni Sambandsdeildarinnar. Valur fékk 700.000 evrur, KA 525.000 evrur og Víkingur R. 2.283.161 evrur.

Breiðablik og Valur léku í Meistaradeild kvenna (UEFA Women's Champions League). Breiðablik fékk 227.000 evrur og Valur 94.879 evrur.

UEFA greiddi fjórum félögum uppgjör vegna Meistaradeild karla tímabilið 2024/2025 sem skiptist á milli Breiðabliks, Stjörnunni, Val og Víkings R.

Þrjú félög fengu greiðslur þar sem leikmenn þeirra léku á EM kvenna 2025.

Breiðablik fékk rúmar 59.000 evrur, Valur tæpar 44.000 evrur og Þór/KA tæpar 22.000 evrur.

Mjólkurbikar kvenna

Mjólkurbikar karla

Félög sem taka þátt í Íslandsmóti meistaraflokks skulu greiða ferðaþátttökugjald samkvæmt reglugerð KSÍ. Markmið reglugerðarinnar er að stuðla að auknum jöfnuði félaga gagnvart ferðakostnaði.

Hér má sjá lista yfir þau félög sem fengu greitt vegna ferðakostnaðar árið 2025.

Besta deild karla

Besta deild kvenna

Lengjudeild karla

2. deild karla

2. deild kvenna

3. deild karla

5. deild karla