Hagræðing úrslita er málefni sem þarf stöðugt að halda vöku fyrir og berjast gegn, og heilindamál (integrity) er mikilvægt verkefni allra sem koma að stjórnun og skipulagi knattspyrnuíþróttarinnar. Allir leikir eiga að vera leiknir af háttvísi og sanngirni og úrslit leiksins eiga einungis að ákvarðast af getu liðanna sem eiga í hlut. Úrslit leiksins eiga ekki að liggja fyrir fyrr en leik lýkur.

KSÍ er hluti af eftirlitskerfi gegn hagræðingu úrslita, annars vegar í gegnum Knattspyrnusamband Evrópu (UEFA) og hins vegar í gegnum samstarfssamning KSÍ, ÍTF og Genius Sports. Komi upp tilvik þar sem grunur er um hagræðingu úrslita þá fær KSÍ tilkynningu um slíkt og greiningu frá eftirlitsaðilum. Hið sama á við þegar KSÍ berst ábending um einstaklinga (leikmenn og aðra) sem stunda veðmál í mótum og leikjum sem þar þeir sjálfir eru þátttakendur, eins og nýleg dæmi eru um hérlendis.

• Hagræðing úrslita íþróttakeppna merkir fyrirkomulag, gjörning eða aðgerðaleysi sem er af ásetningi og miðar að því að breyta úrslitum eða gangi íþróttakeppni með óeðlilegum hætti í því skyni að víkja alfarið eða að hluta til frá hinu ófyrirsjáanlega eðli fyrrnefndrar íþróttakeppni til þess aftur að ná fram óréttmætum ávinningi fyrir sjálfan sig eða aðra.
• Hagræðing úrslita er þegar átt er við úrslit og framgang leikja til þess að græða peninga með veðmálum (með því t.d. að veðja á sigurlið eða fjölda marka).
• Hagræðing úrslita er að sannfæra leikmann eða leikmenn í liði til þess að tapa leik eða sjá til þess að viss fjöldi marka verði skoraður í leiknum (oft þá einnig með aðstoð frá dómara).
• Hagræðing úrslita er þegar átt er við einstök atvik leiks, s.s. innköst, horn, spjöld, víti o.s.frv

Hagræðing úrslita — (e. match-fixing) — á sér stað þegar einstaklingar hafa vísvitandi áhrif á úrslit eða framvindu íþróttaviðburða í þeim tilgangi að hljóta óeðlilegt eða ósanngjarnt forskot. Slík háttsemi grefur undan heiðarleika og heilindum íþrótta og er vaxandi áhyggjuefni í íþróttum á heimsvísu. Frá árinu 2019 hafa mörg ríki undirritað og fullgilt Macolin-samninginn, sem er alþjóðlegur lagarammi sem ætlað er að sporna gegn hagræðingu úrslita í íþróttum. Í samningnum er hagræðing úrslita skilgreint sem „fyrirkomulag, gjörningur eða aðgerðaleysi sem er af ásetningi og miðar að því að breyta úrslitum eða gangi íþróttakeppni með óviðeigandi hætti í því skyni að víkja alfarið eða að hluta til frá hinu ófyrirsjáanlega eðli fyrrnefndrar íþróttakeppni til þess aftur að ná fram óréttmætum ávinningi fyrir sjálfan sig eða aðra.“

Þetta myndband er hluti af sameiginlegu átaki Knattspyrnusambands Íslands (KSÍ), Íslensks Toppfótbolta (ÍTF) og Leikmannasamtaka Íslands (LÍ) gegn hagræðingu úrslita.