80. ársþing KSÍ verður haldið á Hótel Valaskjálf, Egilsstöðum, laugardaginn 28. febrúar nk.  Þingið verður sett kl. 11:00 og gert er ráð fyrir að því ljúki um kl. 15:00 sama dag.  Sambandsaðilar eru beðnir um að kynna sér eftirfarandi upplýsingar og gögn.

Tillögur og upplýsingar um þingið

Hér fyrir neðan er tengill á upplýsingasíðu ársþings KSÍ þar sem sjá má allar upplýsingar um þingið – fyrirkomulag, tillögur og þingskjöl, dagskrá, fyrri ársþing og ýmislegt fleira - og á þinginu sjálfu verður síðan hægt að fylgjast með afgreiðslu mála á sama stað.  Þingið verður jafnframt sýnt í beinni vefútsendingu á KSÍ TV í Sjónvarpi Símans.

Þess er vænst að tillögum, greinargerðum og öðrum gagnlegum upplýsingum sé komið sem fyrst til væntanlegra þingfulltrúa, þannig að þeir hafi tök á að kynna sér þær vel áður en á ársþing er komið, ásamt greinargerðum og öðrum þingskjölum. 

Upplýsingasíða ársþings KSÍ:

Ársþing KSÍ 2026 - Knattspyrnusamband Íslands

Kjörbréf

Kjörbréf eru nú, líkt og undanfarin þing, gefin út fyrir hvert og eitt aðildarfélag, ekki fyrir hvert héraðs-samband og íþróttabandalag líkt og áður, og eru þar af leiðandi send beint á viðkomandi aðildarfélag. Hlekkur á kjörbréf hefur verið sendur með tölvupósti á formenn og/eða framkvæmdastjóra hvers félags.  

Vinsamlegast fyllið út kjörbréfið með nöfnum fulltrúa og varafulltrúa ásamt kennitölu, gsm símanúmeri (vegna rafrænna kosninga) og netfangi. Mikilvægt er að fyllt sé út í kjörbréfið rafrænt. Eftir að kjörbréf hefur verið fyllt út þarf framkvæmdastjóri eða formaður að undirrita það með rafrænni undirritun. Þetta skal gert í síðasta lagi föstudaginn 21. febrúar nk.

Ef kjörbréf hafa ekki borist formanni og/eða framkvæmdastjóra félaga í tölvupósti í dag eða frekari spurningar vakna er hægt að hafa samband við Óskar Örn (oskar@ksi.is) eða Axel (axel@ksi.is).  Það athugist að reynsla sl. ára hefur sýnt að kjörbréfin kunna að lenda í ruslpósti (e. junk mail).

Dagskrá

Þingið verður sett kl. 11:00 laugardaginn 28. febrúar nk. og gert er ráð fyrir að því ljúki um kl. 15:00 sama dag. Að loknu þingi býður KSÍ þingfulltrúum og gestum upp á kvöldverð skv. nánari dagskrá sem verður send síðar.