Ýmsar árlegar viðurkenningar eru jafnan afhentar í aðdraganda ársþings KSÍ og á ársþinginu sjálfu eftir atvikum.

Fjölmiðlaviðurkenningu KSÍ fyrir árið 2025 hlýtur Sýn fyrir þættina "Lengsta undirbúningstímabil í heimi". 

Baldur Sigurðsson, sem hefur yfir að skipa löngum ferli í efstu deild hér á landi, var umsjónarmaður þáttanna og höfundur ásamt Ólafi Þór Chelbat. Í þáttunum fékk Baldur innsýn inn í aðstöðu félaga í Bestu deildinni og talaði hann við þjálfara og valda leikmenn. 

Gefum Baldri orðið:  "Þessir þættir snúast um að gefa áhorfendum innsýn í það hvað liðin í efstu deild eru að gera á veturna á þessu lengsta undirbúningstímabili í heimi.  Mig langaði bara til þess að sýna fólki, því ég er nú fyrrverandi leikmaður og ekkert langt síðan að ég hætti, hvað leikmenn og þjálfarar eru að leggja mikið á sig fyrir þetta mót sem allt snýst um. Þarna eru leikmenn að koma sér í form, æft í allskonar veðrum við margbreytilegar aðstæður." 

Á myndinni eru Eiríkur Stefán Ásgeirsson, Sigurður Már Davíðsson, Ólafur Þór Chelbat og Þorvaldur Örlygsson.