Valmynd
Valmynd
Ýmsar árlegar viðurkenningar eru jafnan afhentar í aðdraganda ársþings KSÍ og á ársþinginu sjálfu eftir atvikum. Sjálfbærniverðlaun KSÍ eru nú afhent í fyrsta sinn.
Sjálfbærniverðlaun KSÍ fyrir árið 2025 hlýtur Þróttur Vogum.
Í nágrannaslag Þróttar og Víðis Garði í 2. deild karla fengu eldri borgarar úr Vogum það hlutverk að leiða leikmenn inn á völlinn fyrir leik, líkt og yngri iðkendur gera jafnan. Verkefnið var einfalt í framkvæmd en afar áhrifaríkt.
Með þessu framtaki tókst að:
Brúa kynslóðabil á fallegan og táknrænan hátt
Sýna að fótbolti er fyrir alla – alla ævi
Veita eldri borgurum virðingu og sýnileika
Styrkja tengsl félagsins við nærumhverfi sitt og grasrótarstarf
Hugmyndin kviknaði innan samfélagsins sjálfs og var framkvæmd af mikilli hlýju, virðingu og gleði. Hún vakti verðskuldaða athygli á landsvísu og sýndi með skýrum hætti hvaða gildi grasrótarstarf í fótbolta getur haft langt út fyrir sjálfan leikinn.
Verkefnið er frábært dæmi um mannlegt, skapandi og samfélagslegt grasrótarstarf.
Á myndinni eru Anton Helgi Hermóðsson og Marteinn Ægisson frá Þrótti og Þorvaldur Örlygsson formaður KSÍ
