Valmynd
Valmynd
Fræðsluþáttaröðin "Konur í íþróttum" var kynnt í Íþróttamiðstöðinni í Laugardal föstudaginn 6. mars. Fræðsluþáttaröðin er um og fyrir íþróttakonur og er samstarfsverkefni HR, KSÍ, UMFÍ og ÍSÍ.
Lára Hafliðadóttir, starfsmaður á Vísindasviði KSÍ og doktorsnemi í íþróttavísindun við HR, er umsjónarmaður verkefnisins og hún kynnti það ásamt dr. Hafrúnu Kristjánsdóttur. Hafrún er prófessor og deildarforseti íþróttafræðideildar Háskólans í Reykjavík.
Fræðsluþáttaröðin samanstendur af 44 myndböndum, annars vegar styttri myndbönd eða fræðslumolar sem ætlaðir eru fyrir yngri íþróttakonur (10-18 ára) og hins vegar lengri fræðslufyrirlestrum fyrir eldri íþróttakonur, þjálfara, foreldra og aðra áhugasama.
Í myndböndunum fjalla sérfræðingar á sínu sviði um þá þætti sem einkenna íþróttakonur á mismunandi æviskeiðum. Markmið verkefnisins er að auka fræðslu og þekkingu með það að leiðarljósi að hámarka frammistöðu, draga úr líkum á meiðslum og stuðla að bættri heilsu og velsæld íþróttakvenna á öllum aldri.
Skoða má verkefnið á vef HR www.ru.is/konur.
