Í janúar hélt KSÍ fund fyrir meðlimi í barna- og unglingaráðum félaga, yfirþjálfara og aðra sem koma að yngri flokka starfi félaganna. Góð mæting var á fundinn en 38 manns mættu frá 17 félögum. 

Aðal markið fundarins var að búa til sameiginlegan vettvang þar sem fólk gat rætt málin, speglað sín mál og gefið góð ráð. 

Eysteinn Pétur Lárusson, framkvæmdastjóri KSÍ, ræddi um strúktúr félaga, hlutverk barna- og unglingaráða og starfið almennt. Jörundur Áki Sveinsson, sviðsstjóri Afrekssviðs KSÍ, talaði um afreksstarf félaganna og Íris Elíasdóttir, formaður barna- og unglingaráðs ÍR fór yfir fjármál í yngri flokka starfi.

Í kjölfar erindanna mynduðust góðar umræður og var meðal annars óskað eftir því að KSÍ setji fram tillögu að starfslýsingu barna- og unglingaráða og annarra starfa sem koma að yngri flokka starfi félaganna. Sú vinna er í gangi og verður afraksturinn birtur á vef KSÍ.

KSÍ óskaði jafnframt eftir því að þau félög sem eiga handbækur og/eða leiðbeiningar um málefni yngri flokka myndu gefa sambandinu leyfi til að birta það á sameiginlegum vettvangi á vef KSÍ og hafa viðbrögðin við því verið nokkuð góð.

Hér má sjá efni bæði frá félögum og KSÍ sem nýtist vonandi til góðs.