Kynningar á göngufótbolta hafa farið fram víðs vegar um landið að undanförnu. Rúnar Már Sverrisson umsjónarmaður göngubolta hjá Þrótti og meðlimur í grasrótarnefnd KSÍ, hefur leitt verkefnið í samstarfi við KSÍ, UMFÍ og svæðisstöðvar íþróttahéraða. Verkefnið er liður í því að efla þátttöku í knattspyrnu og kynna einfalt og aðgengilegt form íþróttarinnar fyrir fjölbreyttan hóp.

Kynningar hafa farið fram á Selfossi, Ísafirði, Sauðárkróki, Egilsstöðum, Reyðarfirði, Mosfellsbæ og Suðurnesjabæ, þar sem þátttakendur hafa fengið tækifæri til að kynnast íþróttinni bæði í gegnum fræðslu og verklegar æfingar.

Áhugi á göngufótbolta hefur verið góður og víða má sjá að kynningarnar eru að skapa grunn fyrir áframhaldandi starfsemi á hverjum stað, með það að markmiði að byggja upp sjálfbæra hópa sem geta haldið úti reglulegum æfingum og samfélagi í kringum íþróttina.

Næsta stopp í verkefninu er á Akranesi þriðjudaginn 9. júní kl. 17:00, þar sem haldin verður opin kynning fyrir áhugasama að Jaðarsbökkum

Göngufótboltinn verður á dagskrá á Landsmóti UMFÍ 50+ og á Rey Cup Senior. Boðið verður upp á æfingar og kynningar á Landsmóti UMFÍ 50+ dagana 26.–28. júní í Hrafnagilshverfi og á Rey Cup Senior 18.–20. júní hjá Þrótti Reykjavík.

Mynd með frétt: Sunnlenska.is/Guðmundur Karl