Fjórða Ungmennaþing KSÍ fór fram á sunnudag. Um 43 iðkendur á aldrinum 13-18 ára mættu á þingið og komu þeir frá 11 félögum. 

Björn Skúlason setti þingið. Sóley Guðmundsdóttir starfsmaður KSÍ var með erindi um fótbolta sem forvörn og Atli Guðnason frá FH var með erindi um aðgengi að fótbolta fyrir ungt fólk. Vanda Sigurgeirsdóttir fyrrverandi formaður KSÍ og einn af eigendum KVAN var með fræðsluerindi um leiðtogahæfni og aðstoðarlandsliðsþjálfararnir Davíð Snorri Jónasson og Ólafur Kristjánsson litu við og spjölluðu við þinggesti og svöruðu spurningum. 

Stefán Pálsson sagnfræðingur og Böðvar Stefánsson í ungmennaráði KSÍ sáu um spurningakeppni í hádegishléi þar sem stjörnuþoka og Boginn á Akureyri komu meðal annars við sögu.

Einn af hápunktunum á hverju þingi er skoðunarferð um húsnæði KSÍ þar sem meðal annars er litið við á búningalager sambandsins, klefarnir og blaðamannafundaraðstaðan eru skoðuð og gengið ganginn þar sem landsliðin ganga út á völl. 

Dagurinn tókst vel og litu margir góðir gestir við. KSÍ þakkar þinggestum fyrir komuna og félögum fyrir að senda fulltrúa.