Hið árlega Mýrarboltamót í knattspyrnu verður haldið á Ísafirði helgina 12. - 14. ágúst næstkomandi. Mýrarknattspyrna á rætur sínar að rekja til sumaræfinga finnskra gönguskíðakappa sem vildu fá fjölbreytni í æfingarnar yfir sumartímann.

Reglurnar eru einfaldar og fylgja í megindráttum venjulegum knattspyrnureglum:

• Spilað er á velli sem er ca. 60m x 35m.
• Leiktími er 2x12 mínútur.
• Í hverju liði eru sex leikmenn.
• Öllum innköstum og hornum er sparkað inn.
• Markmaður má taka með höndum þrjá metra frá marki (ímynduð lína þvert yfir völlinn).

Nánari upplýsingar og skráning er á www.myrarbolti.com.

Sagan á bak við mýrarknattspyrnu

Í skóglendi Norður-Finnlands er að finna talsverð mýrlendi sem myndast á auðum blettum í skóginum eftir að tré hafa verið höggvin. Á einu slíku svæði var byrjað að spila knattspyrnu á litlum velli. Í upphafi var þetta eingöngu til skemmtunar en þróaðist fljótlega yfir í keppni þar sem lítil mót voru haldin á svæðinu.

Fyrir fjórum árum var byrjað að skipuleggja stærra mót í kringum þessa skemmtilegu íþróttagrein og í stuttu máli er þetta í dag orðið einn stærsti viðburðurinn í Norður-Finnlandi yfir sumartímann.

Alls taka 270 lið í heimsmeistaramótinu og þarna koma saman hátt í 10 þúsund manns í einni allsherjar skemmtihelgi.

Nánari upplýsingar er að finna á heimasíðu keppninnar - www.swampsoccer.net.