A landslið karla er komið saman til æfinga á glæsilegu svæði háskólans í Auburn, Alabama þar sem liðið mætir heimsmeisturum Argentínu í vináttuleik kl. 01:00 aðfaranótt miðvikudags að íslenskum tíma (kl. 20:00 á þriðjudagskvöld að staðartíma).  Leikurinn er í beinni útsendingu á Sýn Sport.

Þetta er aðeins í annað sinn sem A landslið karla mætir Argentínu, en fyrsti leikur liðanna fór fram í lokakeppni HM 2018. Þar skildu liðin jöfn, 1-1, og var það Alfreð Finnbogason sem skoraði mark Íslands í leiknum.

Leikurinn í Alabama verður síðasti leikur Argentínu í undirbúningi liðsins fyrir HM 2026 þar sem það á titil að verja, en Argentína er þar í riðli með Alsír, Jórdaníu og Austurríki. 

Nær uppselt er nú þegar á leik Argentínu og Íslands, sem fer fram á aðalleikvangi Auburn háskólans, sem tekur um 88 þúsund manns í sæti.