Eins og knattspyrnuáhugafólki er eflaust kunnugt um er A landslið karla um þessar mundir í Kanada þar sem liðið leikur tvo vináttuleiki.  Ísland mætti heimamönnum í Kanada á laugardag og lauk þeim leik með 2-2 jafntefli þar sem Orri Óskarsson gerði bæði mörk íslenska liðsins í fyrri hálfleik en Kanadamenn svöruðu með tveimur mörkum úr vítaspyrnum í seinni hálfleik.

Á þriðjudag mætir Ísland liði Haítí á sama leikvangi og liðið mætti Kanada, BMO Field í Toronto og eins og fyrri leikurinn verður leikurinn við Haítí í beinni sjónvarpsútsendingu og opinni dagskrá á Sýn.  Lið Haítí lék vináttuleik gegn Túnis á BMO Field á laugardag og tapaði með einu marki gegn engu.

Ísland og Haítí hafa aldrei áður mæst í A landsliðum karla og raunar hefur ekkert íslenskt knattspyrnulandslið áður mætt Haítí.