A landslið karla, að mestu skipað leikmönnum sem eru á mála hjá íslenskum félagsliðum, mætir Mexíkóum í vináttuleik aðfaranótt fimmtudags kl. 02:00 að islenskum tíma. Leikurinn er sem kunnugt er utan hefðbundins landsleikjaglugga.

Alls eiga átta íslensk félög fulltrúa í hópnum. Víkingar eru fjölmennastir með fimm leikmenn, Breiðablik og Stjarnan eiga þrjá leikmenn, ÍA og KA tvo, og Grindavík, Fram og FH eiga einn leikmanna hvert félag. Einn leikmaður, Kolbeinn Þórðarson, leikur með sænska félaginu IFK Gautaborg og Jóhann Berg Guðmundsson, leikjahæsti leikmaðurinn í hópnum, er án félags.

Jóhann Berg hefur leikið 101 A landsleik og skorað í þeim 8 mörk og er hann fimmti leikjahæsti leikmaður A landsliðs karla frá upphafi. Í hópnum er Gylfi Þór Sigurðsson, sem hefur leikið 83 A-landsleiki og skorað 27 mörk, og er hann markahæsti leikmaður A landsliðs karla frá upphafi. Gylfi og Jóhann eru raunar einu leikmennirnir í hópnum sem hafa skorað fyrir A-landsliðið.

Næstir þeim Jóhanni Berg og Gylfa Þór í leikjafjölda eru Guðmundur Þórarinsson (15 leikir), Höskuldur Gunnlaugsson (8 leikir) og svo þeir Guðmundur Kristjánsson og Damir Muminovic (6 leikir), Kolbeinn Þórðarson (3 leikir), Anton Ari Einarsson (2 leikir) og þá hafa þeir Daníel Hafsteinsson og Birnir Snær Ingason leikið einn A landsleik. Aðrir í hópnum hafa ekki leikið fyrir A-landslið karla og við það má bæta að aðeins tveir leikmenn í hópnum eiga ekki heldur leik fyrir yngri landslið Íslands, þeir Viktor Freyr Sigurðsson og Hallgrímur Mar Steingrímsson.

Uppselt er á leikinn (34.000 áhorfendur), sem fer fram á Corregidora Stadium í Queretaro, hefst kl. 20:00 að staðartíma miðvikudaginn 25. febrúar, sem er kl. 02:00 aðfaranótt fimmtudagsins heima á Íslandi. Leikurinn verður í beinni útsendingu og opinni dagskrá á Sýn.