Eyjólfur Sverrisson, þjálfari A-landsliðs karla, hefur tilkynnt byrjunarlið Íslands fyrir vináttulandsleikinn gegn Trinidad & Tobago. Liðin mætast á Loftus Road í Lundúnum í kvöld og hefst bein útsending Sýnar kl. 19:30.

Leikurinn í kvöld er sá fyrsti undir stjórn Eyjólfs og hefur hann ákveðið að gefa Helga Val Daníelssyni og Emil Hallfreðssyni tækifæri í byrjunarliðinu, en þeir félagar hafa aldrei áður verið í byrjunarliði í A-landsleik.

Stillt hefur verið upp í hefðbundna 4-4-2 leikaðferð. Reikna má með að áhersla verði lögð á skipulagðan varnarleik með fjögurra manna varnarlínu og tvo varnarsinnaða miðtengiliði, en að kantmennirnir fái frelsi til að sækja af krafti. Þá mun Eiður Smári væntanlega leika aðeins fyrir aftan Heiðar í framlínunni.

Byrjunarliðið (4-4-2)

Markvörður:

Árni Gautur Arason.

Hægri bakvörður:

Helgi Valur Daníelsson.

Vinstri bakvörður:

Indriði Sigurðsson.

Miðverðir:

Hermann Hreiðarsson og Ívar Ingimarsson.

Hægri kantmaður:

Grétar Rafn Steinsson.

Vinstri kantmaður:

Emil Hallfreðsson.

Tengiliðir:

Jóhannes Karl Guðjónsson og Stefán Gíslason.

Framherjar:

Eiður Smári Guðjohnsen (fyrirliði) og Heiðar Helguson.