Ísland tapaði með einu marki, 0-1, gegn Evrópumeisturum Englands þegar liðin mættust á Laugardalsvelli í undankeppni HM 2027.

Liðið er því áfram í þriðja sæti riðilsins eftir leiki dagsins, en Úkraína tapaði 0-5 gegn Spáni.

Alessia Russo skoraði eina mark leiksins á 21. mínútu eftir góða skyndisókn. Gestirnir voru betri aðilinn í fyrri hálfleik og átti íslenska liðið í vandræðum með að skapa sér færi.

Seinni hálfleikur var hins vegar mun betri hjá Íslandi og fékk liðið fjölda færa til að jafna metin, en markvörður Englendinga varði oft á köflum frábærlega. Svekkjandi eins marks tap því staðreynd.

Tveir leikir eru eftir af undankeppninni. Ísland mætir næst Úkraínu og fer sá leikur fram í Póllandi föstudaginn 5. júní. Liðið endar svo undankeppnina á Laugardalsvelli þriðjudaginn 9. júní þegar heimsmeistarar Spánar verða mótherjarnir.