Ísland vann frábæran 3-0 sigur á Lúxemborg er liðin mættust á Stade de Luxembourg í öðrum leik Þjóðadeildarinnar.

Liðið var sterkari aðilinn allan leikinn og skoraði Andri Lucas Guðjohnsen fyrsta mark leiksins strax á 13. mínútu leiksins. Orri Steinn Óskarsson bætti svo við öðru marki liðsins á 39. mínútu og var forskotið gott þegar flautað var til hálfleiks.

Íslenska liðið var áfram betra heilt yfir í seinni hálfleik, en Guðlaugur Victor Pálsson bætti við þriðja, og síðasta, marki leiksins á 73. mínútu með góðum skalla. Flottur sigur staðreynd og Ísland komið í efsta sæti riðilsins.

Næsti leikur liðsins er gegn Búlgaríu á Laugardalsvelli á laugardag kl. 16:00 og er miðasala á hann í fullum gangi á miðasöluvef KSÍ.

Miðasala