Íslendingar lögðu Georgíumenn í vináttulandsleik sem fram fór á Laugardalsvellinum í kvöld.  Lokatölur urðu 3 - 1 eftir að Íslendingar höfðu leitt í leikhléi, 2 - 1. 

Íslenska liðið byrjaði leikinn vel í Laugardalnum í kvöld og tóku strax yfirhöndina.  Mörkin létu heldur ekki á sér standa.  Garðar Jóhannsson skoraði sitt fyrsta landsliðmark á 14. mínútu eftir frábæra sendingu frá fyrirliðanum Grétar Rafni Steinssyni.  Aðeins þremur mínútum síðar koma annað mark Íslendinga.  Eftir frábæra sókn var það Ólafur Ingi Skúlason sem setti boltann í netið, hans fyrsta landsliðsmark sömuleiðis.

Eftir annað markið róaðist heldur yfir leiknum og gestirnir komust meira inn í leikinn.  Þeir minnkuðu svo muninn á 33. mínútu leiksins eftir einbeitingarleysi í varnarleik Íslendinga.  Ekki var mikið um marktækifæri það sem eftir lifði af hálfleiknum og eins marks forysta Íslands þegar að ítalski dómarinn flautaði til leikhlés.

Íslenska liðið kom í síðari hálfleikinn af sama krafti og það mætti í þann fyrri.  Eftir ágætar tilraunir fengu Íslendingar vítaspyrnu á 55. mínútu og úr henni skoraði Veigar Páll Gunnarsson.  Yfirhöndin var Íslendinga það sem eftir lifði leiks en mörkin urðu ekki fleiri og 4.726 áhorfendur fögnuðu verðskulduðum sigri.

Næsta verkefni karlalandsliðsins verður vináttulandsleikur á Laugardalsvelli þann 13. október næstkomandi.  Þá mæta gestgjafar úrslitakeppni HM 2010, Suður Afríka, í heimsókn.

Góður landsleikjadagur er á enda runninn, þrír sigrar í höfn.  Stelpurnar í U17 sigruðu Ísrael, strákarnir í U19 lögðu Skota og á Laugardalsvelli lagði karlalandsliðið Georgíu.