A landslið karla vann frábæran 5-0 sigur á Búlgaríu í Þjóðadeildinni er liðin mættust í Plovdiv.

Ísland var sterkari aðilinn allan tímann og stjórnaði leiknum frá A til Ö. Það var Andri Lucas Guðjohnsen sem skoraði fyrsta mark leiksins af vítapunktinum eftir 17. mínútna leik, en brotið hafði verið á Orra Steini Óskarssyni. Orri Steinn var svo á ferðinni aðeins fjórum mínútum síðar og kom Íslandi í 2-0 eftir frábæra sendingu frá Herði Björgvin Magnússyni.

Búlgarska liðinu tókst ekki að skapa sér neitt af ráði í fyrri hálfleik og var í erfiðleikum með það að halda boltanum innan sinna raða. Mjög sanngjörn tveggja marka forysta Íslands í hálfleik.

Það sama var upp á teningnum í seinni hálfleik. Ísland stjórnaði ferðinni þó liðin væru álíka mikið með boltann. Það tók þriðja markið aðeins sjö mínútur að líta dagsins ljós. Brynjólfur Andersen Willumsson átti það hættulega fyrirgjöf sem fer af Emil Tsenov og í mark Búlgara. Staðan orðin 3-0 og nokkuð ljóst í hvað stefndi.

En Andri Lucas var ekki hættur. Hann skoraði annað mark sitt, og fjórða mark Íslands, á 68. mínútu eftir frábæra sendingu frá Hákoni Erni Haraldssyni. Andri Lucas fullkomnaði síðan þrennuna á 79. mínútu eftir að boltinn datt fyrir hann í vítateignum. 

Leikurinn róaðist eftir þetta og íslenska liðið sigldi frábærum 5-0 sigri í höfn. 

Þegar einn leikur er eftir af riðlakeppninni er Ísland í efsta sæti með 11 stig, Eistland í öðru sæti með níu stig, Búlgarar með fjögur stig í því þriðja og Lúxemborg á botninum með þrjú stig.

Ísland mætir Lúxemborg í síðasta leik sínum á mánudag kl. 17:00 á Laugardalsvelli.

Miðasala á leikinn er í fullum gangi á miðasöluvef KSÍ.

Miðasala