Ísland vann góðan 3-0 sigur á Búlgaríu er liðin mættust í Þjóðadeildinni á Laugardalsvelli.

Íslenska liðið var töluvert betri aðilinn allan leikinn og skoraði Orri Steinn Óskarsson fyrsta mark leiksins eftir frábæra sendingu frá Hákoni Arnari Haraldssyni. Staðan 1-0 fyrir Ísland í hálfleik. 

Seinni hálfleikurinn var svipaður þeim fyrri. Ísland var meira með boltann og Búlgararnir sköpuðu sér ekki neitt af ráði. Orri Steinn skoraði annað mark sitt og annað mark Íslands eftir klukkutíma leik eftir að Mikael Neville Anderson hafði átt góðan sprett upp kantinn og sent hann fyrir. 

Það var svo Mikael Egill Ellertsson sem skoraði þriðja mark Íslands eftir frábæra sendingu í gegn frá Orra Steini.

Fyrsti sigur liðsins á Búlgaríu staðreynd og Ísland áfram á toppi riðilsins með sjö stig eftir þrjá leiki.

Ísland mætir næst Eistlandi á þriðjudag í Tallin í Eistlandi. Sá leikur hefst kl. 18:45 að íslenskum tíma og verður að sjálfsögðu í beinni útsendingu, í opinni dagskrá, á Sýn Sport.