Guðjón Þórðarson, fyrrverandi þjálfari íslenska karlalandsliðsins í fótbolta, er látinn, 71 árs að aldri.

Guðjón stýrði A landsliði karla árin 1997-1999 og var þjálfari liðsins alla undankeppnina fyrir EM 2000, þar sem liðið náði m.a. fræknu jafntefli gegn Frakklandi í fyrsta leik þess eftir að hafa verið krýndir heimsmeistarar árið 1998.

Guðjón spilaði sem leikmaður lengst af fyrir ÍA. Hann lék jafnframt einn landsleik fyrir Íslands hönd. Hann vakti verðskuldaða athygli sem þjálfari KA, en hann gerði liðið að Íslandsmeisturum árið 1989. Guðjón var ráðinn þjálfari ÍA eftir sumarið 1990. Hann tók við liðinu í næstefstu deild, kom þeim í efstu deild við fyrsta tækifæri og gerði það að Íslandsmeisturum ári síðar. Undir stjórn Guðjóns vann ÍA deildina tvö ár í röð, 1992 og 1993, ásamt því að verða bikarmeistari 1993. Í lok tímabilsins færði Guðjón sig um set til KR þar sem hann var árin 1994 og 1995. Guðjón gerði KR að bikarmeisturum bæði árin.

Hann tók að nýju við ÍA fyrir tímabilið 1996 og gerði liðið að Íslands- og bikarmeisturum. Í júní 1997 var hann svo ráðinn sem landsliðsþjálfari karlalandsliðsins.

Guðjón tók við Stoke City á Englandi eftir að hann lét af störfum sem þjálfari íslenska landsliðsins. Hann var þjálfari liðsins allt til ársins 2002 og kom liðinu upp í næstefstu deild á síðasti ári sínu með 2-0 sigri gegn Brentford í úrslitaleik umspilsins. Jafnframt vann félagið bikarkeppni neðri deild árið 2000 er liðið vann 2-1 sigur gegn Bristol City. Önnur félög sem Guðjón þjálfaði erlendis voru Start í Noregi, Barnsley, Notts County og Crewe Alexandra á Englandi og NSÍ Runavik í Færeyjum. Á Íslandi þjálfaði hann, ásamt ÍA, KA og KR, Grindavík, BÍ/Bolungarvík og Víking Ólafsvík.

KSÍ sendir fjölskyldu Guðjóns og vinum innilegar samúðarkveðjur.