A landslið kvenna tók á móti ríkjandi heimsmeisturum Spánar á Laugardalsvelli í lokaleik liðanna í undankeppni HM 2027. Ísland var búið að tryggja sér þriðja sæti riðilsins en Spánn þurfti sigur til að tryggja sér efsta sæti riðilsins og þar með sæti á HM.

Það er óhætt að segja að Spánn hafi verið með öll völd á vellinum frá upphafi til enda. Fyrsta mark Spánar kom á 5. mínútu og sjötta markið og það síðasta kom á 84. mínútu. Linda Líf Boama skoraði eina mark Íslands og sitt fyrsta landsliðsmark á 58. mínútu.

Lokatölur voru 1-6 tap gegn einu sterkasta liði heims.

Ísland fer í umspil um sæti á HM. Umspilið er í tveimur hlutum. Fyrra umspilið verður spilað í október og verður dregið í það 18. júní. Leiknir verða tveir leikir við sama lið, heima og að heiman. Það lið sem vinnur fyrra umspil kemst í seinna umspil sem verður spilað í lok nóvember og byrjun desember. Liðið sem vinnur það kemst á HM í Brasilíu 2027.