Hollendingar reyndust of sterkir fyrir Íslendinga í kvöld á Laugardalsvelli þegar þjóðirnar léku í undankeppni fyrir HM 2010.  Hollendingar sigruðu með tveimur mörkum gegn einu eftir að hafa leitt í leikhléi, 2-0.  Holland tryggði sér þar með sæti í úrslitakeppni HM 2010 sem fram fer í Suður Afríku.

Gestirnir komust yfir á 9. mínútu og bættu öðru marki við á 16. mínútu.  Hollenska liðið stjórnaði fyrri hálfleiknum og fengu færi til að bæta við en Gunnleifur Gunnleifsson markvörður sá við þeim sem og markstangirnar.  Þegar enski dómarinn Mike Dean flautaði til leikhlés var því tveggja marka munur.

Íslenska liðið var mun þéttara í síðari hálfleiknum og gáfu fá færi á sér.  Liðið freistaði þess að færa sig framar á völlinn en náði ekki að skapa sér opin færi.  Þegar um ein mínúta var eftir af venjulegum leiktíma fengu Íslendingar hornspyrnu sem að Arnór Smárason tók og það var Kristján Örn Sigurðsson sem að skallaði knöttinn í netið.  Ekki náðu Íslendingar að bæta við markinu sem þurfti til að jafna metin enda skammur tími til stefnu.

Frábært veður var í Laugardalnum í kvöld og aðstæður eins og best verður á kosið.  Uppselt var á völlinn, eða 9.800 áhorfendur. 

Hollenska liðið sýndi á köflum frábæra takta í fyrri hálfleik en íslensku strákarnir komu ljóngrimmir til síðari hálfleiksins og sýndu mun betri leik heldur í þeim fyrri.

Næsti leikur liðsins er svo gegn Makedóníu ytra á miðvikudaginn.  Fyrirliðinn Hermann Hreiðarsson, Indriði Sigurðsson og Aron Einar Gunnarsson verða í leikbanni í þeim leik þar sem þeir fengu allir sína aðra áminningu í keppninni í kvöld.