Styrkleikaflokkun fyrir Evrópuhluta undankeppni HM A landsliða karla 2022 hefur verið opinberuð og er Ísland í 3. styrkleikaflokki á meðal Evrópuþjóða.  Flokkarnir eru 6 og þátttökuþjóðirnar allar 55 aðildarþjóðir UEFA.  Riðlarnir verða því 10 talsins - Fimm sex liða riðlar og fimm riðlar með fimm liðum. Dregið verður í riðla í höfuðstöðvum FIFA í Zürich í Sviss 7. desember næstkomandi.  Fulltrúar liðanna verða ekki viðstaddir og viðburðurðinn verður sýndur beint á vef FIFA.

Allt um undankeppni HM 2022 á vef FIFA

Efsta lið hvers riðils kemst beint í lokakeppni HM í Katar 2022 og liðin sem hafna í 2. sæti fara í umspil um sæti í lokakeppninni, ásamt tveimur liðum með bestan árangur í Þjóðadeild UEFA af þeim sem ekki hafa þá þegar tryggt sér sæti í lokakeppninni eða umspilinu í gegnum undankeppnina (1. eða 2. sæti í sínum riðli).

Styrkleikaflokkarnir byggja á röð liða á styrkleikalista FIFA og líta svona út:

• Flokkur 1:  Belgía, Frakkland, England, Portúgal, Spánn, Ítalía, Króatía, Danmörk, Þýskaland og Holland.
• Flokkur 2: Sviss, Wales, Pólland, Svíþjóð, Austurríki, Úkraína, Serbía, Tyrkland, Slóvakía og Rúmenía.
• Flokkur 3: Rússland, Ungverjaland, Írland, Tékkland, Noregur, Norður-Írland, Ísland*, Skotland, Grikkland og Finnland.
• Flokkur 4: Bosnía og Hersegóvína, Slóvenia, Svartfjallaland, Norður-Makedónía, Albanía, Búlgaría, Ísrael, Hvíta-Rússland, Georgía og Lúxemborg.
• Flokkur 5: Armenía, Kýpur, Færeyjar*, Aserbaídsjan, Eistland, Kósovó, Kasakstan, Litháen, Lettland og Andorra.
• Flokkur 6: Malta, Moldóva, Liechtenstein, Gíbraltar og San Marínó.

* Ísland og Færeyjar geta ekki dregist saman í riðil vegna veðurfarslegra þátta.