A landslið kvenna mætir Úkraínu á þriðjudag á Laugardalsvelli í undankeppni HM 2027.

Leikurinn hefst kl. 18:30 og er miðasalan á leikinn í fullum gangi á miðasöluvef KSÍ.

Miðasala

Tveim umferðum er lokið í riðlakeppninni og töpuðu bæði liðin fyrstu tveimur leikjum sínum. Ísland 0-3 gegn Spáni og 0-2 gegn Englandi. Úkraína hóf leik á 1-6 tapi gegn Englandi og tapaði svo 1-3 gegn Spáni.

Landsleikjamet A kvenna verður jafnað í leiknum gegn Úkraínu verði Glódís Perla Viggósdóttir í byrjunarlið Íslands. Það yrði 145 A-landsleikur hennar og myndi hún þá jafna Söru Björk Gunnarsdóttur. Það er því ljóst að landsleikjametið gæti fallið hér á Laugardalsvelli á laugardag þegar Ísland mætir Englandi.

Ísland og Úkraína hafa mæst sjö sinnum og var síðasta viðureignin á Pinatar Cup árið 2020 þar sem Ísland vann 1-0 sigur með marki frá Gunnhildi Yrsu Jónsdóttur.

Fyrsta viðureign liðanna var í undankeppni HM 1999. Ísland vann leikinn á Laugardalsvelli 3-2 þar sem Ásthildur Helgadóttir skoraði tvö mörk og Sigrún Sigríður Óttarsdóttir eitt. Úkraína vann seinni leikinn í Úkraínu 1-0.

Liðin mættust aftur í undankeppni EM 2001. Fyrri leikurinn endaði 2-2 ytra þar sem Rakel Björk Ögmundsdóttir og Ásthildur Helgadóttir skoruðu mörk Íslands. Úkraína vann svo 3-2 sigur á Laugardalsvelli, en Olga Færseth og Rakel Björk Ögmundsdóttir skoruðu mörk Íslands.

Svo var það í umspili EM 2013 sem liðin mættust aftur. Ísland vann báða leikina 3-2 og tryggði sér með því sæti í lokakeppni EM 2013. Katrín Ómarsdóttir, Hólmfríður Magnúsdóttir og Margrét Lára Viðarsdóttir skoruðu mörk Íslands í leiknum ytra. Í leiknum á Laugardalsvelli skoruðu Margrét Lára og Katrín aftur, en Dagný Brynjarsdóttir skoraði þriðja markið.