Knattspyrnusamband Íslands (KSÍ) og Íslandshótel hafa undirritað samstarfssamning sem gerir Íslandshótel að bakhjarli KSÍ og íslensku landsliðanna út árið 2030. Með samstarfinu bætast Íslandshótel í hóp helstu samstarfsaðila KSÍ og styðja við áframhaldandi uppbyggingu og þróun íslenskrar knattspyrnu. 

Íslandshótel reka hótel um allt land og hafa um árabil verið leiðandi á íslenskum hótelmarkaði. Á síðustu misserum hefur félagið eflt starfsemi sína enn frekar þar sem hótelin Hilton Reykjavík og Hótel Reykjavík Askja hafa bæst við og því hótelin orðin 19 talsins. Samstarfið við KSÍ byggir á sameiginlegum áherslum um öflug tengsl við samfélagið og starfsemi um land allt.

KSÍ vinnur með hópi bakhjarla sem gegna mikilvægu hlutverki í starfsemi sambandsins og eflingu íslenskrar knattspyrnu. Með samningnum við Íslandshótel styrkist sá hópur enn frekar og skapast aukin tækifæri til samstarfs í tengslum við landsliðsverkefni og aðra viðburði og starfsemi á vegum KSÍ. 

Bakhjarlar KSÍ eru nú Íslandshótel, N1, Icelandair, Landsbankinn, Eimskip, Lengjan og Ölgerðin.