Ísland og Kanada skildu jöfn 2-2 þegar liðin mættust í vináttuleik í Toronto.

Leikurinn byrjaði vel fyrir íslenska liðið, en Orri Steinn Óskarsson komst inn í sendingu varnarmanns Kanada eftir aðeins níu mínútna leik og setti boltann í netið.

Þrettán mínútum síðar var Orri aftur á ferðinni. Mikael Egill átti þá góða sendingu á Orra sem kláraði færið glæsilega. Frábær byrjun hjá Íslandi.

Ísland leiddi 2-0 þegar flautað var til hálfleiks.

Kanada fékk tvö víti í seinni hálfleik og skoraði Jonathan David úr þeim báðum. Þegar um fimmtán mínútur voru eftir af leiknum misstu heimamenn leikmann útaf með rautt spjald. Íslandi tókst þó ekki að nýta sér liðsmuninn og 2-2 jafntefli því niðurstaðan.

Ísland mætir Haítí á þriðjudag, einnig á BMO Field í Toronto, og hefst sá leikur kl. 16:30 að íslenskum tíma.