UEFA kynnti á dögunum lágmarksstaðla fyrir A landslið kvenna í Evrópu. Markmiðið með stöðlunum er að auka gæði, þróa og styðja við A landslið kvenna í Evrópu.

Staðlarnir, sem framkvæmdastjórn UEFA samþykkti einróma, ná yfir íþróttina, stjórnarhætti, æfingar, læknisþjónustu, þjálfun, velferð leikmanna, gistiaðstöðu og þóknun.

Hér má sjá dæmi um þá staðla sem þarf að uppfylla:

• Aðalþjálfari í fullu starfi með UEFA Pro þjálfaragráðu.
• Að minnsta kosti einn læknir og tveir sjúkraþjálfarar þurfa að vera á öllum æfingum og í öllum leikjum.
• Ferðast þarf í leiki eins beina leið og hægt er.
• Hágæða gistiaðstaða nálægt æfinga/keppnisvöllum.
• Nýta þarf landsliðsglugga til hins ítrasta.
• Aðgengi að æfingaaðstöðu landsliða, gæðabúnaði til æfinga og völlum í umsjón fagaðila.
• Samningur á milli leikmanna og sérsambands um kjör, meðgöngu og foreldrastefnu og jafnrétti.

Hvert sérsamband fær 100.000 Evrur, sem samsvarar um 14,5 milljónum króna, á ári til ársins 2028 til að uppfylla staðlana.

Hægt er að lesa nánar um staðlana á heimasíðu UEFA með því að smella hér.