Eins og knattspyrnuáhugafólki er eflaust kunnugt um eru framundan vináttuleikir A landsliðs karla við Kanada 28. mars og Haíti 31. mars.  Báðir leikir fara fram á BMO Field í Toronto og báðir leikir verða í beinni sjónvarpsútsendingu og opinni dagskrá á Sýn.

Ísland og Kanada hafa fjórum sinnum áður mæst í A landsliðum karla og í öllum tilfellum hefur verið um vináttuleiki að ræða.  Tvisvar hafa liðin skilið jöfn og tvisvar hefur Ísland fagnað sigri.  Þrír leikjanna hafa verið í janúarglugga.

Fyrst mættust liðin á Laugardalsvelli árið 2007 og gerðu 1-1- jafntefli þar sem Gunnar Heiðar Þorvaldsson skoraði mark Íslands.  Því næst léku liðin tvo leiki í Flórída í janúar 2015 þar sem Ísland vann fyrri leikinn 2-1 (mörk Íslands skoruðu Kristinn Steindórsson og Matthías Vilhjálmsson) og 1-1 jafntefli (mark Íslands skoraði Hólmbert Friðjónsson) var niðurstaðan í seinni leiknum. Loks mættust liðin í Kaliforníu í janúar 2020 og þar vann íslenska liðið 1-0 sigur með marki frá Hólmari Erni Eyjólfssyni.

Ísland og Haítí hafa aldrei áður mæst í A landsliðum karla og raunar hefur ekkert íslenskt knattspyrnulandslið áður mætt Haítí.