Mexíkó og Ísland mættust í A landsliðum karla í borginni Queretaro í nótt í tæplega 2000 metra hæð yfir sjávarmáli.  Leiknum, sem hófst kl. 02:00 að íslenskum tíma, lauk með fjögurra marka sigri Mexíkó.

Íslenska liðið byrjaði leikinn betur og átti hættulegar sóknir en markvörður Mexíkó varði í tvígang.  Þá tók mexíkóska liðið við sér, sótti án afláts og uppskar tvö mörk með stuttu millibili um miðjan fyrri hálfleik.  Jafnvægi komst á leikinn eftir það og fleiri urðu mörkin ekki í fyrri hálfleik.

Liðin skiptust á að sækja framan af seinni hálfleik en þegar um 60 mínútur voru liðnar af leiknum bætti Mexíkó við þriðja markinu og útlit fyrir, miðað við aukinn sóknarþunga heimamanna, að á brattann yrði að sækja hjá íslenska liðinu.

Arnar Gunnlaugsson þjálfari gerði nokkrar breytingar á íslenska liðinu sem frískuðu upp á sóknarleikinn og mikið fjör færðist í leikinn.  Mexíkóar áttu þó lokaorðið og bættu við fjórða markinu áður en yfir lauk.

Íslenska liðið átti fína spilkafla í leiknum og hefði getað skorað mörk, en heilt yfir voru heimamenn sterkari og unnu verðskuldaðan sigur.

Arnar Gunnlaugsson þjálfari íslenska liðsins eftir leik:

"Það er auðvitað enginn sáttur eftir tapleik, og strákarnir voru eðlilega hundfúlir í klefanum eftir leik, en ég er samt ánægður með vinnusemina og margt fleira.  Strákarnir lögðu sig auðvitað alla fram eins og menn gera alltaf með íslenska landsliðinu og þeir voru virkilega að reyna að spila sín á milli. 

Ég sé engan tilgang með því að fara í svona leik, pakka í vörn og reyna ekki að spila fram á við, því þá læra menn svo lítið, og þessir leikir, svona leikir, eru til þess að læra af þeim.  Við vorum að spila við mjög sterkan andstæðing og ég vil miklu frekar að menn mæti bara óhræddir og spili boltanum.  Auðvitað þarf stundum að spila langt, en það er líka partur af leiknum, menn verða að finna jafnvægið í hverjum leik milli varnar og sóknar. 

Þetta voru svolítið krefjandi aðstæður, þunnt loft og mikill raki sem hafði áhrif á leikinn, en það er óhætt að segja að við höfum tapað fyrir sterkara liði."