Laugardalurinn skartaði sínum fegursta í kvöld þegar íslenska liðið lék sinn síðasta leik fyrir úrslitakeppni EM.  Lið Liechtenstein var lagt að velli með fjórum mörkum gegn engu.  Íslenska liðið lék af öryggi og yfirvegun og gáfu gestunum engin færi á sér.

Fyrsta markið kom á 10. mínútu þegar að Kolbeinn Sigþórsson skoraði eftir að markvörður Liechtenstein hafði varið frá Alfreði Finnbogasyni.  Tuttugasta landsliðsmark Kolbeins í 40 landsleikjum.  Á 20. mínútu var komið að Birki Má Sævarssyni sem skoraði stórkostlegt mark með þrumuskoti.  Fyrsta landsliðsmark Birkis í 57. landsleiknum.  Á 42. mínútu var svo komið að Alfreð Finnbogasyni sem skoraði af stuttu færi eftir mikla orrahríð að marki gestanna. 

Aðeins kom eitt mark í síðari hálfleik og þar var Eiður Smári Guðjohnsen að verki eftir frábæra sókn en þetta er 26. mark Eiðs Smára.  Öruggur sigur í höfn og 8.401 áhorfendur nutu leiksins og blíðunnar í Laugardalnum.  Þeir voru svo vel með á nótunum þegar Geir Þorsteinsson, formaður KSÍ, afhenti Lars Lagerbäck þakklætisvott frá knattspyrnuhreyfingunni fyrir frábær störf til handa íslenskri knattspyrnu.  Lars var gríðarlega vel fagnað en þetta var síðasti heimaleikur liðsins undir stjórn hans og Heimis Hallgrímssonar en sá síðarnefndi tekur við liðinu eftir að úrslitakeppni EM lýkur.

Liðið heldur til Frakklands á morgun og framundan er mikið knattspyrnuævintýri sem spennandi verður að fylgjast með.