Knattspyrnusambönd Íslands og Englands hafa komist að samkomulagi um að karlalandslið þjóðanna, skipuð leikmönnum 21 árs og yngri, leiki vináttulandsleik mánudaginn 28. mars næstkomandi.  Leikurinn mun fara fram í Englandi á heimavelli Preston North End, Deepdale, en leikurinn er liður í undirbúningi liðanna fyrir úrslitakeppni EM sem fer fram í Danmörku 11. – 25. júní.

Þetta er annar vináttulandsleikurinn sem íslenska liðið mun leika á skömmum tíma því liðið leikur einnig gegn Úkraínu 24. mars í Kænugarði.

Þess má geta að miðasala á úrslitakeppni EM U21 karla í Danmörku er hafin og má sjá nánari upplýsingar hér.