UEFA hefur ákveðið, líkt og áður, að hluti af þeim tekjum sem sambandið hafði af Meistaradeild UEFA (Champions League) 2006/2007 skuli renna til félaga í öllum aðildarlöndum UEFA til eflingar knattspyrnu barna- og unglinga.  Uppgjör vegna Meistaradeildarinnar sem lauk vorið 2007 hefur nú farið fram og fá íslensk félög tæpar 20 milljónir króna í sinn hlut til barna- og unglingastarfs.  Stjórn KSÍ hefur samþykkt að leggja til um 17 milljónir króna af eigin rekstrarfé til viðbótar framlagi UEFA til barna – og unglingastarfs aðildarfélaga.

UEFA setur eftirfarandi skilyrði fyrir greiðslu til félags: 

1. Greiðslan fer í gegnum viðkomandi knattspyrnusamband.
2. Aðeins félög sem hafa samþykkta uppeldisáætlun sem uppfyllir lágmarks kröfur leyfiskerfis viðkomandi knattspyrnusambands varðandi barna- og unglingastarf geta fengið greiðslu. 
3. Fjárhæðin skiptist á milli félaganna samkvæmt ákvörðun stjórnar viðkomandi sambands.
4. Félög sem tóku þátt í Meistaradeild UEFA 2006/2007 skulu ekki fá hlutdeild í þessari greiðslu. 

Í samræmi við ofangreind skilyrði ákvað stjórn KSÍ að framlag UEFA rynni til þeirra félaga sem léku í Landsbankadeild karla og 1. deild karla árið 2007 en í þeim deildum hefur KSÍ innleitt leyfiskerfi (m.a. kröfur um samþykkta áætlun um uppeldisstarf).

Samþykkt stjórnar KSÍ um úthlutun fjármagns UEFA og KSÍ til barna- og unglingastarfs 2007: 

1. Framlag UEFA til aðildarfélaga til eflingar knattspyrnu barna- og unglinga rennur til þeirra félaga sem léku í Landsbankadeild karla og 1. deild karla árið 2007.  Félög úr Landsbankadeild fá kr. 1.200.000 og félög úr 1. deild fá kr. 800.000 hvert.  Úthlutun er háð því að félög haldi úti starfsemi í yngri flokkum og hafi samþykkta áætlun um uppeldisstarf skv. forsendum K.01 í leyfiskerfi KSÍ. Framlag UEFA getur einungis runnið til félaga í Landsbankadeild karla og 1. deild karla enda hefur KSÍ aðeins innleitt leyfiskerfi í þeim deildum.     
2. Framlag KSÍ til eflingar knattspyrnu barna og unglinga rennur til félaga í 2. deild karla, 3. deild karla og aðildarfélaga KSÍ utan deilda 2007. Hvert félag í 2. deild karla fær kr. 500.000 en önnur félög kr. 400.000. Úthlutun er háð því að félög haldi úti starfsemi í yngri flokkum. 
3. Greiðslan til félaganna skal renna óskipt til eflingar knattspyrnu barna og unglinga frá yngstu iðkendum til og með 2. aldursflokks karla og kvenna.
4. Dæmi um kostnaðarliði í þessu starfi eru laun þjálfara, ferðakostnaður vegna þátttöku í keppni, aðstöðuleiga, kaup á tækjum og áhöldum. 

Rétt er að fram komi að þegar um samstarfsfélög er að ræða hljóta þau félög er að því samstarfi standa styrk ef þau sinna barna- og unglingastarfi.

Eftirfarandi tafla sýnir greiðslur í milljónum króna frá UEFA vegna Meistaradeildarinnar 2006/2007 og frá KSÍ til barna- og unglingastarfs aðildarfélaga KSÍ: 

Þess má geta að hingað til hefur framlag UEFA aðeins runnið til félaga í efstu deild karla, en með innleiðingu leyfiskerfis í 1. deild karla uppfylltu félögin úr 1. deild öll skilyrði UEFA til þess að hljóta þessa greiðslu.  Það var svo ákvörðun stjórnar KSÍ að öll aðildarfélög sambandsins sem halda úti barna- og unglingastarfi hljóti styrk og er stefnt að því að slíkt gerist árlega.