Valmynd
Valmynd
Samkvæmt leyfisreglugerð KSÍ hefur þeim félögum sem hyggjast sækja um þátttökuleyfi í Pepsi-deild og 1. deild karla 2013 verið sendar nauðsynlegar upplýsingar, áður en vinna við leyfisumsókn hefst. Keflvíkingar hafa þegar skilað leyfisgögnum og eru því fyrstir annað árið í röð.
Í leyfisreglugerðinni er að finna allar nauðsynlegar upplýsingar um allar forsendur sem þarf að uppfylla, félögin eru hvött til að kynna sér reglugerðina vel.
Hvert félag tilnefnir einn leyfisfulltrúa. Leyfisfulltrúi félagsins er sá aðili sem leyfisstjóri KSÍ hefur að mestu samskipti við vegna leyfiskerfisins og er sá aðili sem allar upplýsingar eru sendar á. Leyfisfulltrúi félagsins kemur skilaboðunum síðan áfram innan síns félags.
KSÍ er bundið trúnaði gagnvart leyfisumsækjendum og er ekki heimilt að gefa óviðkomandi aðilum upp neinar upplýsingar úr leyfisgögnum leyfisumsækjenda, skv. trúnaðaryfirlýsingu þar um. Allir aðilar sem koma að leyfiskerfinu fyrir hönd KSÍ hafa undirritað slíka trúnaðaryfirlýsingu.
Félög í Pepsi-deild þurfa fulla áritun endurskoðanda á ársreikning sinn. Félög í 1. deild þurfa könnunaráritun endurskoðanda á ársreikning sinn. Öll félög þurfa að skila staðfestingum vegna engra vanskila við leikmenn og þjálfara, sem og staðfestingar vegna engra vanskila vegna félagaskipta leikmanna.
Á vef KSÍ er sérstakur leyfisvefur þar sem finna má allar helstu upplýsingar, eyðublöð og gátlista, reglugerðina sjálfa, o.s.frv.
Leyfisstjóri er til taks á skrifstofu KSÍ ef spurningar vakna. Hlutverk leyfisstjóra í þessu ferli er að halda utan um kerfið og aðstoða félögin við að útbúa leyfisumsókn. Ef leyfisstjóri kemur auga á eitthvað sem hann telur að gæti komið í veg fyrir veitingu þátttökuleyfis mun hann vinna með viðkomandi félagi að úrlausn málsins.
Öll nauðsynleg skjöl og sniðmát er að finna undir Tækjakassi hér á síðunni. Heiti skjalanna eru hluti af skjalastýringu leyfiskerfisins og á sumum stöðum í gátlista yfir allar forsendur má sjá tilvísanir í ákveðin skjöl.
