Á dögunum léku tveir leikmenn ólöglega í Lengjubikar karla. Viktor Guðberg Hauksson lék með GG, en hann er skráður í Grindavík, og Baldvin Freyr Ásmundsson lék með KF, en hann var í leikbanni vegna þriggja gulra spjalda.

Í samræmi við greinar 10.1 og 11.2 í reglugerð KSÍ um Deildarbikarkeppni karla hefur skrifstofa KSÍ staðfest að Viktor Guðberg Hauksson hafi leikið ólöglegur með GG gegn Snæfell/UDN í Lengjubikar karla þann 29. mars síðastliðinn. Leikmaðurinn var skráður í Grindavík.

Einnig hefur skrifstofa KSÍ staðfest að Baldvin Freyr Ásmundsson hafi leikið ólöglegur með KF gegn Fjarðarbyggð/Huginn í Lengjubikar karla þann 25. mars síðastliðinn. Leikmaðurinn var í leikbanni vegna þriggja gulra spjalda.

Í reglugerðum KSÍ um deildarbikarkeppni karla og kvenna, greinum 10.1 og 11.2 segir: 

10. SEKTIR 

10.1 Lið, sem mætir ólöglega skipað til leiks, skal sæta sekt að upphæð kr. 30.000 og að auki kr. 30.000 fyrir hvern leikmann sem ekki hefur keppnisleyfi með viðkomandi félagi og tekur þátt í leiknum. Félag, sem notar leikmann, þjálfara eða forystumann í leikbanni, skal sæta sektum að upphæð kr. 100.000. 

11. STJÓRN KEPPNINNAR 

11.2 Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út. 

Neðangreindur leikmaður lék ólöglegur með GG: 

Nafn leikmanns: Viktor Guðberg Hauksson 

Leikur: GG – Snæfell/UDN 

Dagsetning: 29. mars 2018 

Ástæða: Leikmaður skráður í Grindavík. 

Í samræmi við ofangreinda reglugerð er GG sektað um kr. 60.000.- Úrslitum leiksins er breytt í 0 – 3 Snæfell/UDN í vil.

Neðangreindur leikmaður lék ólöglegur með KF:

Nafn leikmanns: Baldvin Freyr Ásmundsson 

Leikur: KF – Fjarðarbyggð/Huginn

Dagsetning: 25. mars 2018

Ástæða: Leikmaður í leikbanni vegna 3 gulra spjalda.

Í samræmi við ofangreinda reglugerð er KF sektað um kr. 100.000.- Úrslitum leiksins er breytt í 0 – 3 Fjarðarbyggð/Huginn í vil.