Verkefnið - FIFA Arena

FIFA Arena er nýtt verkefni sem Alþjóða knattspyrnusambandið (FIFA) hefur sett af stað til að byggja upp mini-knattspyrnuvelli (mini-pitches) víðs vegar um heiminn. Markmiðið er að skapa öruggar, aðgengilegar og góðar knattspyrnuaðstæður fyrir börn og ungmenni, sérstaklega í samfélögum þar sem aðstöðu til knattspyrnuiðkunar er ábótavant. 

Mikilvægt er að vellirnir séu öruggir fyrir börn og ungmenni til að stunda knattspyrnu eða annan leik. Vellirnir geta verið vettvangur sem eykur aðgengi að íþróttinni og getur stuðlað að aukinni þátttöku barna og ungmenna í knattspyrnu. 

Upphaf og tilgangur

Verkefnið var formlega tilkynnt og því hleypt af stokkunum af  FIFA í maí 2025. Það byggir á loforði um að bjóða börnum fleiri tækifæri til að spila og læra í gegnum fótbolta - með áherslu á menntun, jöfnuð og samfélagslegt gildi. FIFA Arena svæðin eiga að vera hluti af stærra samfélags- og menntaverkefni og er ætlað að hvetja til heilbrigðs lífsstíls, félagslegrar samheldni og tækifæra fyrir unglinga.

FIFA vinnur verkefnið með knattspyrnusamböndum víðsvegar um heiminn með þann tilgang að setja upp velli á stöðum þar sem aðstöðu skortir. 

Vellirnir

Vellirnir eru smærri en hefðbundnir knattspyrnuvellir, 20 x 40 m og henta vel fyrir 5 eða 7 manna bolta eða minni leiki og frjálsan leik. Vellirnir þola mikla notkun, bæði skipulagða og óskipulagða.

Gervigras af FIFA-vottaðri gerð er á völlunum, sérstaklega hannað fyrir mikla notkun og án innfylliefna, sem tryggir lítið viðhald en umfram allt notkun yfir allt árið.

Völlurinn er girtur og umhverfis völlinn er fjögurra metra há girðing. Innbyggð mörk eru á hvorum enda (3m x 1m) 

Kostnaður og fyrirkomulag

FIFA sér um uppsetningu vallarins og annars sem honum tilheyrir - að undanskildu undirlagi, aðgengi og umhverfisfrágangi.

FIFA og KSÍ standa straum af:

• flutningi vallarins til landsins og á viðkomandi uppsetningarstað
• öllum efnum, svo sem gervigrasi, grindverki, netum og mörkum
• uppsetningu vallarins

Hlutverk sveitarfélags/íþróttafélags er að finna vellinum staðsetningu, undirlag skal vera að stöðlum FIFA. 

Staðsetning vallar skal vera í grennd við skóla og/eða svæði sem muni nýtast sveitarfélagi/íþróttafélagi til knattspyrnuiðkunar.

Völlurinn mun vera í eigu sveitarfélags/íþróttafélags og mun eigandinn bera ábyrgð á viðhaldi og umhirðu vallar sem og daglegum rekstri. 

Myndavél

Myndavél mun vera sett upp þegar undirbúningur á uppsetningu vallar hefst til að fylgjast með uppsetningu vallarins og skrásetja sögu hans. 

Fjármögnun verkefnis og skyldur aðila

Sveitarfélag/íþróttafélag þarf að finna vellinum staðsetningu og undirbúa undirlag. 

Kostnaður

FIFA og KSÍ munu standa straum af þeim kostnaði sem hlýst við að koma vellinum til landsins og til þess hlandshluta þar sem völlurinn mun vera settur upp. FIFA mun sjá um kostnað varðandi uppsetningu og allt efni sem er í vellinum. 

Frestur

Frestur til að senda inn umsókn er til 18. september 2026.

Hér að neðan er hlekkur á rafrænt umsóknareyðublað fyrir áhugasama aðila. Umsækjendur eru hvattir til að veita ítarlegar upplýsingar og rökstyðja vel hvers vegna þeirra svæði eða félag ætti að verða fyrir valinu.

Stjórn KSÍ mun skipa nefnd sem fer yfir umsóknir og leggur mat á hvar vellir verða staðsettir.

Hægt er að senda fylgigögn með umsókninni og er aðilum bent að senda þau gögn á fannar@ksi.is. Aðilar eru beðnir um að taka fram hvaða gögn eru send með á umsóknareyðublaði. 

Upplýsingar

Frekari upplýsingar um verkefnið er hægt að nálgast hjá Fannari Helga Rúnarssyni leyfisstjóra KSÍ fannar@ksi.is eða hjá framkvæmdastjóra KSÍ, Eysteini Pétri Lárussyni eysteinn@ksi.is.