Víkingsmenn hafa unnið markvisst að því að bæta aðgengi fyrir fatlaða áhorfendur í Víkinni og var ný aðstaða formlega opnuð fyrir fyrsta heimaleik liðsins. Verkefnið var unnið í góðu samstarfi við ÖBÍ – Réttindasamtök og aðgengissérfræðinga samtakanna, sem veittu ráðgjöf og faglegt mat á lausnunum.

Nýi aðgengispallurinn er staðsettur framarlega við miðja stúkuna og er hannaður til að tryggja góða yfirsýn og aðgengi fyrir hjólastólanotendur og fylgdarfólk þeirra. Markmiðið er að skapa betri upplifun fyrir alla stuðningsmenn og styðja við aukna þátttöku fatlaðs fólks í íþróttalífi.
Fyrir leik Víkings gegn Breiðabliki var haldin opnunarathöfn, þar sem einn gallharður Víkingur og dyggur stuðningsmaður í hjólastól klippti á borða ásamt fulltrúum Víkings og ÖBÍ.
KSÍ fagnar framtakinu og hvetur önnur félög til að fylgja fordæminu í umbótum á aðgengi að íþróttamannvirkjum.

Nýju aðstöðuna má sjá fyrir framan miðja stúkuna á meðfylgjandi mynd.

Myndirnar tók Hörður Ágústsson.